Ditẹrọnọmị 31 - FỊAFỊA BAỊBỤLỤ

Jọsụwa Ḅo Mozizi Kiri Ḍima Ḅọ Sọm

¹ Anie ḅụ Mozizi sịkọpẹlẹ-a ḅara kẹ mịna ẹkwẹn-aḅịḅị ma kọn Izirẹlị mẹmgba pịrịm,

² tẹ ori ịn ḅẹẹm “Mịmgba ị̀ sịḅị kụra sonioa si (120) ḅọrọ tẹ; à ḅarị inetẹ mẹnjị-paka-na-sọ-na ḅịa. KỊNỊNYANAḄỌ ḅe ị̀ ḅẹẹ tẹ, ‘Ị́ mị Jodanị mẹ saḅa-ḅọrọ ḅịa.’

³ KỊNỊNYANAḄỌ ọmịna Tamụnọ ḅe ḅioju ḅarana tarị ọmịna tọrọkọ saḅa-ḅọrọ mu ḅa; ori ọmịna tọrọkọ mịna opu asịẹ ma fama ḅa, mịẹtẹ ọmịnị ịn aḅara ịn nyana aị ọkị ḅẹ ḅara; anịsakị KỊNỊNYANAḄỌ ḅe wẹrịtẹ ḍuko tẹ ḅara, Jọsụwa saḅa mu ọmịna sịḅịda ḅa.

⁴ KỊNỊNYANAḄỌ ḅe ọ̀ kẹ Siyọnị na, Ogu na, Amọrayịtị amadapụ ma na, ịna ama mẹ na fama sakị ọ̀ kẹ ịn mịẹ ḅara kẹ ịn mịẹ ḅa.

⁵ KỊNỊNYANAḄỌ ḅe ịn saḅama ọ́ pịrị ḅa, tẹ tọn wararị ḅara mẹmgba tẹ à tọn ọ́ pịrị tẹ ḅara mẹ kẹ ọmịnị ịn mịẹ ḅa.

⁶ Iḅi ḅiokpọ ḅụ ọ́ kụrọ sịẹsime, ó siye ḅụụ la ḅẹ kuroma, anịanịa opu ḅalafa nyana ma ịna aḅụụ; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe mie ọmịnị na muarị ye; ori ó pikirima, anịanịa ọ́ sịkị ḅịa.”

⁷ Anịtẹso Mozizi nwẹnị Jọsụwa sịn, tẹ ọ̀ ḅẹẹ Izirẹlị mẹmgba tọrọkọ ḅụ, “Iḅi ḅiokpọ ḅụ kụrọ sịẹsime; kẹ gotẹ ọkọ ḅẹẹarị, ị́ mịna atomi ma na ama mẹ tẹ KỊNỊNYANAḄỌ ḅe kẹ ịna aḍapụ pịrị ḅẹ ye karị ḅara kẹ minini tẹ ama mẹ ḅio sọ-mu ḅa, tẹ ini anị nyana ḅẹ ḅara kẹ ị́ ịn koroma ḅa.

⁸ KỊNỊNYANAḄỌ ḅe mie tọrọkọ tarị ị́ pịrị wararị ḅọ. Ori ị́nịna sime ḅa; ori í pikirima, anịanịa ị́ sịkị ḅịa; siye ị́ ḅụụ la ḅẹ kuroma, anịanịa ekpe tukutuku nyana ma.”

Sọnọma Akụra Goyegoye Ḅụ Oloko Mẹ Goo Ḅa

⁹ Mozizi mị Oloko mẹ kẹẹ tẹ anị kẹ agbamịẹapụ ma na, Livayị owiapụ-awọmẹ ma tẹ KỊNỊNYANAḄỌ ḅe Ọḅọkụ-Igbe mẹ dogi apụ ma na, Izirẹlị ḅẹ omongiapụ mamgba na pịrịm.

¹⁰ Mozizi tọn ịn pịrịm, “Sọnọma akụra kunoma sakị goyegoye kụra mẹ ḅẹ saa wẹrịso sakị mẹ, Sịḅị-kikima-aị Alalị kopini mẹ sakị ḅụ,

¹¹ Izirẹlị mẹmgba ḅo anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị ḅẹ anga mẹ ḅụ, ọ̀ tọrọkọ, ḅụụ kẹ ò ḍie ḅarị sakị mẹ ḅụ, ọmịnị Izirẹlị mẹmgba tọrọkọ ịn naarị ḅara kẹ mị Oloko mẹ go ḅa.

¹² Ó tomi ma kobirii, owiapụ na, ereme na, ḍọkọḍọkọ-awọmẹ na, ọmịna ama ma ḅio simearị jen sịẹ ḅẹ igoniḅọ ḅe na, mịẹtẹ ịn naa, tẹ KỊNỊNYANAḄỌ ọmịna Tamụnọ ḅe mangịma ḅẹ ḅara ḍawọ, tẹ ḅụụ ẹbị-ẹbị tẹ mị Oloko mẹ ḅẹ ẹkwẹn-aḅịḅị mamgba mịẹ ḅẹ ḅara.

¹³ Mịẹtẹ ịna awọmẹ tẹ amụ anị nimi-a apụ anị naa, tẹ KỊNỊNYANAḄỌ ọmịna Tamụnọ ḅe mangịma ḍawọ ḅẹ ḅara ọmịnị ama mẹ tẹ ọ́ Jodanị mẹ saḅa-ḅọrọ nyana ḅẹ muarị ama mẹ ḅio ó ḍumo mu la ḅiri, la ḅiri.”

KỊNỊNYANAḄỌ ḅe Kẹ Mozizi Toluma Kunoma Ye

¹⁴ KỊNỊNYANAḄỌ ḅe Mozizi ḅẹẹm, “Ḍikii, ene ma sọma kpekiarị, ị́ fịị nyanam nwẹn ḅẹẹ sakị mẹ. Jọsụwa sịn, tẹ Kobiri Akpụrụ-warị mẹ ḅio ọmịnị ọmịna aḅụụ ḍie-pakama, mịẹtẹ à kụrọ kẹ ọ̀ pịrị ḅẹ ḅara.” Tẹ Mozizi na, Jọsụwa na, ịna aḅụụ ḍie-pakamam Kobiri Akpụrụ-warị mẹ ḅio.

¹⁵ KỊNỊNYANAḄỌ ḅe nwẹnị oḅuto gbọrụ kpo ḅio tolu-paka Akpụrụ-warị mẹ ḅio, tẹ oḅuto kpo mẹ Akpụrụ-warị mẹ ḅẹ ḅọkọ ḅụ sịẹsimem.

¹⁶ KỊNỊNYANAḄỌ ḅe nwẹnị Mozizi ḅẹẹ: Ḍikii, ị́ ị́ aḍapụ ma na mono gboloma ḅẹ tẹ, anịtẹso ọkụma mịna tomi ma saakị tẹ ama mẹ ḅẹ igoni oru-atamụnọ ḍukamẹnjị sẹfị mẹnjị kọn ḅa ịn mu ini ogboku sime ḅarị anga ḅụ, tẹ ini ị̀ sịkị ḅa, tẹ ị̀ ọḅọkụ mẹ tẹ arị ini na fị ye mẹ kan ḅa.

¹⁷ Anịtẹso ọkụma ị̀ ịganị anị ene mẹ ḅụ kẹngẹma ịn ọgọnọ sara ḅa, tẹ arị ịn sịkị ḅa, tẹ ịna aḅụụ ị̀ tọrụ ḅọị ḅa, tẹ ini ịn ḅaa ḅa, anịsakị tọnwa asi-aị na, ḅụụ-fụka na, ḅo ini ọgọnọ gbana ḅa, anieḅụ anị eneḅaka ḅụ ịn ḅẹẹ ḅa: Wamịna Tamụnọ ḅarị wamịna ogbo-ḅio ofori ẹrẹsị mie mịna asi-aị ma gotẹ ḅo wamịna ọgọnọ gbana tẹ ye ọkọ-a?

¹⁸ Anịsakị tụkụma ḅara ḅụ, àrị ị̀ tọrụ ḅọị ḅa anị ene mẹ ḅụ, siye mẹmgba tẹ ịn mịẹ tẹ ye mẹ gotẹ, gbala ịn tọrụ pịkị oru-atamụnọ da ye mẹ ẹrẹsị.

¹⁹ Anịẹrẹsị mịọkụ mị nume mẹ kẹẹ, tẹ anị kẹ Izirẹlịapụ ma tolumaa; anị kẹ ịna aḅịḅị ḅio suu, mịẹtẹ mị nume mẹ Izirẹlịapụ ma na tụḅụrụ ḅara ḅụ ḅẹrẹ-kiri sime ye sọ ị̀ pịrị ḅẹ ḅara.

²⁰ Kẹ gotẹ ọkọ ḅẹẹarị, àrị ịn ọkị-ḅo ḅụụ-ḅẹlẹmatẹ iḅiọkụma fịye so-pakamarị amakiri mẹ, anie à ye karị ḅara ḅụ kẹ ịna aḍapụ ma pịrị ḅẹ minini ye mẹ, tẹ ịn fịye fị ịna furo ḅinma tẹ ḅẹlẹkị sụa sakị, ịn tọrụ pịkị oru-atamụnọ da tẹ fịrịmẹnjị ịn pịrị, tẹ ì ḍiki-sima tẹ ị̀ ọḅọkụ mẹ kan ḅa.

²¹ Tọnwa asi-aị na, tọnwa ḅụụ-fụka na ḅo ini ọgọnọ gbana sakị, mị nume mẹ ḅẹrẹ-kiri sime ye ḅara ḅụ ịn ẹngbẹsẹ ḅa, kẹ gotẹ ọkọ ḅẹẹarị, anị ḅioḅọrọ-ḅọrọ-a ye sọ ḅa ịna furo ḅẹ awọmẹ aḅịḅị ḅio ḅụ. Tẹrẹmẹ àrị ini ọkị-ḅo ama mẹ tẹ à ye karị ḅara kẹ mininim à pịrị ḅa ḅẹẹ ama mẹ la, ịn mịẹ ḅẹ sụa pakama-ḅoarị kuroma à nimi wararị.

²² Anieḅụ Mozizi anị gbọrụ ene mẹ ḅụ mị nume mẹ kẹẹ, tẹ anị kẹ Izirẹlịapụ ma tolumam.

²³ KỊNỊNYANAḄỌ ḅe kụrọ kẹ Jọsụwa, Nọnị owiḅọtụḅọ ḅe pịrịm, tẹ ḅẹẹm: Iḅi-ḅiokpọ ḅụ kụrọ sịẹsimee; kẹ gotẹ ọkọ ḅẹẹarị, ị́ Izirẹlị ḅẹ awọmẹ ma ọkị-ḅo ama mẹ tẹ à ye karị ḅara kẹ mininim à kẹ ịn pịrị ḅẹ ama mẹ ḅio suu ḅa; àrị ị́nịna sime ḅa.

²⁴ Mozizi gbọrụ ḍiri ḅio mị Oloko mẹ ḅẹ ẹkwẹn-aḅịḅị ma kẹẹ mu gbọrsịḅị anịḅẹ kunoma mẹ la fama tẹso,

²⁵ Mozizi tọn Livayị furo-ḅẹ-apụ ma tẹ KỊNỊNYANAḄỌ ḅe Ọḅọkụ-Igbe mẹ dogi apụ ma pịrịm:

²⁶ Ọ́ mị Oloko mẹ ḅẹ ḍiri mẹ ọkịị, tẹ anị kẹ KỊNỊNYANAḄỌ ọmịna Tamụnọ ḅe Ọḅọkụ-Igbe mẹ akaka ḅụ suu, mịẹtẹ anị anịjụ ḅụ sime tẹ ḅẹrẹ-kiri sime ye sọ ọmịnị ẹngbẹsẹ ḅẹ ḅara.

²⁷ Kẹ gotẹ ọkọ ḅẹẹarị, arị ọ́ sịḅị-kụrọ la ḅara na, ọ́ kịnị na kura-a la ḅara na, nimi wararị; ḍikii, mịmgba à paa ḍumo tẹ ọmịnị na sime wararị sakị ḅụ sọ ọ́ sịḅị-kụrọma KỊNỊNYANAḄỌ ḅe pịrị tẹ, à fịtẹ so sakị, anị tọ-ḅara la ḅara kẹ ḅaka ḅa!

²⁸ Ọmịnị ọmịna afuro ma ḅẹ omongiapụ mamgba na, ọmịna fịrịmẹnjị-opuapụ na, kobiri ḅo gboloma ị̀ pịrịị, mịẹtẹ arị ịna aḅeri ḅio mịna ẹkwẹn-aḅịḅị ma kọn suu, tẹ So na Kiri na sịn ḅẹrẹ-kiri sime aị sọ ini ẹngbẹsẹ.

²⁹ Kẹ gotẹ ọkọ ḅẹẹarị, à nimi wararị mịnẹ, à fịtẹ so sakị ọ́ tụkụma ḅara ḅụ ó sime iḅi ḅara mẹ sima ḅara kẹ ye mịẹ ḅa; tẹ etela mẹ tẹ à tọn ọ́ pịrị ye mẹ ḅụ vuunma tọrụ pịkị akaka da ḅa; anịsakị ḅo ḅarị ene ma ḅụ siye ḅo ọmịna ọgọnọ gbana ḅa, gbala ọ́ KỊNỊNYANAḄỌ ḅe ḍiki-tọrụ ḅụ aniemẹ tẹ siye mịẹ ḅa ẹrẹsị, tẹ ọmịna aḅara ḅẹ kọrịnama ḅụ ori ịganị sịn saakị ḅa.

Mozizi Nume Mẹ

³⁰ Anịtẹso Mozizi mị nume mẹ ḅẹ ẹkwẹn-aḅịḅị ma ḍuko nwenii arị faam, Izirẹlị ḅẹ kobiri-ogbo mẹmgba aḅeri ḅio ḅụ.