Ditẹrọnọmị 30 - FỊAFỊA BAỊBỤLỤ

Mịẹtẹ Siin Pịkịma-ḅo Na Boma Na Nyana Ḅẹ Ḅara

¹ Boma mẹ na, wori-nume mẹ na, mịna aị mamgba tẹ à kẹ ọmịna tọrọkọ koroma tẹ aị ma ḅo ọmịnị ọgọnọ gbana tẹ opu asịẹ mamgba ogboku ḅụ arị ó dee mu koroma anga mẹ ḅụ ọmịnị arị kẹ ḅiokoroma sakị,

² tẹ ọmịnị na, ọmịna awọmẹ na, pịkịma KỊNỊNYANAḄỌ ọmịna Tamụnọ ḅe ḍọkụma-ḅo, tẹ mịmgba à tọn ọ́ pịrị aị mamgba ḅụ ọmịna ḅioḅẹngbọ mẹmgba na, ọmịna ḅala mẹmgba na kẹ ọ̀ ḅịḅị poki rẹ,

³ anịtẹrẹmẹ mie KỊNỊNYANAḄỌ ọmịna Tamụnọ ḅe ọmịna iḅi fụḅara mẹ pịkịma-ḅo ọ́ pịrị tẹ ọkụrụkụrụ nyana ọ́ pịrị ḅarịye; tẹ sin tomi-kụlọkụlọ ma tẹ KỊNỊNYANAḄỌ ọmịna Tamụnọ ḅe ọ́ gala-galama suu anga mamgba ḅụ ó kobiri ḅarịye.

⁴ Ọmịna aḅụụ ịn sịkị tẹ kẹ mu tomikiri mẹ ḅẹ ala-tẹịn anga ḅụ gbin-koroma apụ sọ, anịjụ mẹ ḅụ KỊNỊNYANAḄỌ ọmịna Tamụnọ ḅe ó kobiri ḅa, anịjụ mẹ ḅụ ori ọmịnị ọkị-ḅo ḅa;

⁵ tẹ KỊNỊNYANAḄỌ ọmịna Tamụnọ ḅe ọmịnị ọkị-ḅo ama mẹ tẹ ọmịna aḍapụ ma nyana ama mẹ ḅio koroma ḅa, mịẹtẹ ọmịnị anị nyana ḅẹ ḅara; anịsakị ọ̀ mịẹtẹ ó lolo ḅa, tẹ kịẹn-ḅịḅị ḅụ ḍụḅa ọmịna aḍapụ ma nẹngị ḅa.

⁶ KỊNỊNYANAḄỌ ọmịna Tamụnọ ḅe ọmịnị na, ọmịna aḅụụ paka-ḅo apụ ma na ḅioḅẹngbọ ḅẹ tarị-ḅụụ sin ḅa, anieḅụ ọmịnị ọmịna ḅioḅẹngbọ mẹmgba na, ọmịna tẹmẹ mẹmgba na kẹ KỊNỊNYANAḄỌ ọmịna Tamụnọ ḅe ḅẹlẹma ḅa, mịẹtẹ ó ḍumo ḅẹ ḅara.

⁷ Anịsakị KỊNỊNYANAḄỌ ọmịna Tamụnọ ḅe mịna wori-anume mamgba kẹ ọmụ ḅio ọmịnị na fịya-a apụ na, ó ḍiki-ḅioḅuarị tẹ ḅaa-ḅọkọ kẹ ọ́ ḍọkị apụ na ọgọnọ gbana ḅa,

⁸ tẹ ọ́ pịkị sin KỊNỊNYANAḄỌ ọmịna Tamụnọ ḅe pọkọ poki tẹ ori oloko mamgba tẹ mịmgba à tọn ọ́ pịrị aị ma koko ḅa.

⁹ KỊNỊNYANAḄỌ ọmịna Tamụnọ nwẹnị ọ́ mịẹtẹ ọmịna ḅara ḅẹ kọrịnama mamgba ḅụ na, ọmịna oju ḅẹ mgbọlụ ma ḅụ na, ọmịna opu anama ma ḅẹ mgbọlụ ma ḅụ na, ọmịna kiri ḅẹ mgbọlụ ma na ḅụ ọ́ tọnwa ḅara kẹ lolo-kama ḅa; kẹ gotẹ ọkọ ḅẹẹarị, KỊNỊNYANAḄỌ ḅe pịkị sin ọ́ mịẹtẹ ó lolo ḅụ tọrụ-ḅẹlẹ nyana ḅa ọ̀ wẹrịtẹ ọmịna aḍapụ ḅụ tọrụ-ḅẹlẹ nyana ḅara,

¹⁰ ọ́ nwẹnị KỊNỊNYANAḄỌ ọmịna Tamụnọ ḅe pọkọ poki ḅụ ori oloko ma na, kẹẹ wararị oloko ma tẹ mị oloko ḍiri mẹ ḅio simearị aị ma na koko, koko; tẹ ọmịna ḅioḅẹngbọ mẹmgba na, ọmịna bala mẹmgba na kẹ pịkị KỊNỊNYANAḄỌ ọmịna Tamụnọ ḅe da daa.

¹¹ Mị tọn-pịrịye mẹ tẹ mịmgba à tọn ọ́ pịrị ye mẹ ọmịna aḅụụ kụrọ ḅakam, anịanịa anị ala ḅaka ye-a.

¹² Anị So-ḅio ofori, tẹ ó gbela ḅa: Tụḅọ iwo So-ḅio mu tẹ anị ọkị-ḅo wa pịrị ḅẹ mịẹtẹ wa anị naa, tẹ anị mịẹ ḅẹ ḅara?

¹³ Anị pịkị anịanịa opu tọrụ mẹ saḅa anga ḅụ ofori, tẹ ó gbela ḅa: Tụḅọ opu tọrụ mẹ saḅa-koro, tẹ anị ọkị-ḅo wa pịrị ḅẹ, mịẹtẹ wa inetẹ anị naa, tẹ anị mịẹ ḅẹ ḅara?

¹⁴ Kụma ẹkwẹn-ḅịḅị mẹ anị kpọma ọmịnị na kpeki lama wararị; anị ọmịna ḅịḅị-ḅio na, ọmịna ḅioḅẹngbọ na ḅụ emi, anie mịẹtẹ ọmịnị inetẹ anị mịẹ ḅa.

¹⁵ “Ḍikii, mịmgba ḅụ à ḍumo na, iḅi na; fịị na, siye na, kẹ ọmịna tọrọkọ koroma tẹ.

¹⁶ Ọ́ nwẹnị KỊNỊNYANAḄỌ ọmịna Tamụnọ ḅe ḅẹlẹma ḅẹ ori etela ma ḅụ mẹnjị, ori oloko ma na, ori oloko ma tẹ kẹẹ wararị aị ma na, kụrọ ọ̀ ḅara ḅio emi tẹ ọ̀ sụa oloko ma na, koko ḅụ KỊNỊNYANAḄỌ ọmịna Tamụnọ ḅe tọn aị ma tẹ mịmgba ḅụ à tọn ọ́ pịrị aị ma koko, koko, anịrẹ ó ḍumo tẹ lolo-kama ḅa, tẹ KỊNỊNYANAḄỌ ọmịna Tamụnọ ḅe nwẹnị ó boma ḅa ọ́ sọ tẹ anị ọkị nyana ḅẹ muarị ama mẹ ḅio.

¹⁷ Kụma ọmịna ḅioḅẹngbọ pịkị-so tẹ ọ́ naa-a, kụma sunsin oru-atamụnọ pịrị, tẹ fịrịmẹnjị ịn pịrị ḅẹ ẹrẹsị ọ́ nụnụ so-so,

¹⁸ à mịmgba ḅụ mịẹfinji ọ́ pịrịarị mịnẹ ọ́ fịị fa ḅa ama mẹ tẹ ọ́ Jodanị mẹ saḅa-ḅọrọ tẹ nyana ḅẹ sọ-muarị ama mẹ ḅio ó ḍumo alama ḅịa.

¹⁹ À mịmgba So na Kiri na sịn ḅẹrẹ-kiri sime aị mịẹ ọ́ pịrịarị, mịnẹ à ḍumo na fị na, Tamụnọ boma na Tamụnọ wori-nume na kẹ ọmịna tọrọkọ koroma tẹẹ; anịẹrẹsị ó ḍumo sẹlẹ-ọkị, mịẹtẹ ọmịnị na, ọmịna aḅụụ paka-ḅo apụ na ḍumo ḅẹ ḅara.

²⁰ Ọ́ KỊNỊNYANAḄỌ ọmịna Tamụnọ ḅe ḅẹlẹmaa, ọ̀ pọkọ pokii, tẹ ori oḅoloo; aniemẹ gbala ḍumo na nangwọ ene na fie ọ́ pịrịarị ẹrẹsị, mịẹtẹ ama mẹ tẹ KỊNỊNYANAḄỌ ḅe ye karị ḅara ḅụ, kẹ ọmịna aḍapụ Ebira-amụ na, Ayịzịkị na, Jekọbụ na pịrị ḅẹ minini ịn pịrị ama mẹ ḅio ọmịnị anga ḅẹ ḅara.”