Ditẹrọnọmị 27 - FỊAFỊA BAỊBỤLỤ

Ḍụḅarị Ma Ọgọnọ Kẹẹ Wararị Tamụnọ Oloko Ma

¹ Mịọkụ Mozizi na Izirẹlị ḅẹ omongiapụ ma na tọn tomi ma pịrị tẹ ḅẹẹm, “Ọ́ tọn aị ma tẹ mịmgba à tọn ọ́ pịrị aị ma kokoo.

² Anịsakị ọ́ Jodanị mẹ saḅa-ḅọrọ tẹ ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ la ene mẹ ḅụ, ọ́ ḍụḅa-ḍụḅatẹ aḍụḅarị saakị sịẹma tẹ ye-oḅoloye kẹ arị oḅolo ḅa;

³ tẹ ọmịnị arị ọgọnọ mị oloko mẹ ḅẹ ẹkwẹn-aḅịḅị mamgba kẹẹ ḅa, ọ́ saḅa-ḅọrọ mu ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ḅụụ-ḅẹlẹmatẹ iḅiọkụma fịye so-pakamarị amakiri mẹ ḅio sọ-mu sakị, KỊNỊNYANAḄỌ ọmịna aḍapụ ma sunsin pịrị Tamụnọ ḅe wẹrịtẹ kẹ ọ́ karịma ḅara.

⁴ Anịsakị ọ́ Jodanị mẹ saḅa-koro sakị ọ́ mịna aḍụḅarị ma saakị sịẹma ḅa Ẹbalị Tụndụ ọgọnọ ḅụ arị aị ma tẹ à mịmgba tọn ọ́ pịrị aị ma gbolomaye ḅụ, tẹ ó ye-oḅoloye kẹ arị oḅolo ḅa.

⁵ Anịjụ ọ́ gbọrụ ḍụḅarị agbamịẹ-anga nama KỊNỊNYANAḄỌ ọmịna Tamụnọ ḅe pịrị ḅa; ọmịnị ikulele kẹ mịẹ namakọrị aị saakị gelema gelema tẹ kẹ arị ọgọnọ kọrịnama kọrị ma.

⁶ Amụ pẹlẹ-a bebe aḍụḅarị mịẹ ọ́ kẹ gbọrụ agbamịẹ-anga nama KỊNỊNYANAḄỌ ọmịna Tamụnọ ḅe pịrị ḅarịye, tẹ anị ọgọnọ dọkịma-agba mịẹ KỊNỊNYANAḄỌ ọmịna Tamụnọ ḅe pịrị ḅa.

⁷ Anịsakị ọ́ tọnwa dein-pịrị-agba mịẹ, tẹ anịjụ fịye fị ḅa; tẹ KỊNỊNYANAḄỌ ọmịna Tamụnọ ḅe tọrọkọ ḍereku ḅa.

⁸ Ḅẹlẹma giregire ḅara kẹ ọ́ ḍụḅarị ma ọgọnọ mị oloko mẹ ḅẹ ẹkwẹn-aḅịḅị mamgba kẹẹ ḅa.”

⁹ Mozizi na, Livayị furo ḅẹ agbamịẹapụ mamgba na nwẹnị Izirẹlị mẹmgba ḅẹẹ, “Ó gbọsime tẹ pokii, Izirẹlịapụ, ọ́ ḅo KỊNỊNYANAḄỌ ọmịna Tamụnọ ḅe atomi sọ tẹ mịmgba.

¹⁰ Ọmịnị anịẹrẹsị KỊNỊNYANAḄỌ ọmịna Tamụnọ ḅe pọkọ poki ḅa, ori oloko ma na, ori oloko ma tẹ kẹẹ wararị aị ma tẹ mị eneḅaka à tọn ọ́ pịrị aị ma koko ḅụ.”

Ḅịḅịpoki-a Ḅẹ Wori-anume Ma

¹¹ Anị gbọrụ ene mẹ ḅụ Mozizi tọn tomi ma pịrị tẹ ḅẹẹm,

¹² Ó Jodanị mẹ saḅa-koro sakị, mịna awarị furo ma Gẹrịzimu Tụndụ ọgọnọ ḅụ sịẹsime tẹ tomi ma boma ḅa: Simiyọnị na, Livayị na, Juda na, Ịsaka na, Josẹfụ na, Benijamịnị na.

¹³ Mịna awarị furo ma anie Ẹbalị Tụndụ ma ọgọnọ sịẹ ḅarịye, in wori-anume ma gbo sakị: Rubẹnị na, Gadi na, Asa na, Zẹbulọnị na, Danị na pịkị Nafutali na.

¹⁴ Livayị furo-ḅẹ-apụ ma opu pọkọ kẹ mịna ẹkwẹn-aḅịḅị ma kọọn ḅa.

¹⁵ Wori-nume sime oriḅe tẹ ḅara kẹ ye kịkama kara, anịanịa tẹmẹ amịna ḅụụ pịrị ḅọ ḅe pịrị, KỊNỊNYANAḄỌ ḅe ḅụụ tọn-tọn-pịrịye, ḅara akanịḅọ aḅara mịẹ gberie, tẹ ḅọị ḅara kẹ saakị sịẹma ye. Anịsakị tomi mamgba pakịrị tẹ ḅẹẹ ḅa, “Amẹnị.”

¹⁶ Wori-nume sime oriḅe tẹ kụn kẹ amịna iyingiḅọ anịanịa amịna ḍaḅọ pịrị-a ḅọ ḅe pịrị. Anịsakị tomi mamgba ḅẹẹ ḅa, “Amẹnị!”

¹⁷ Wori-nume sime oriḅe tẹ amịna pembema tomḅọ kiri ḅẹ oke sin ḅọ ḅe pịrịị. Anịsakị tomi mamgba ḅẹẹ ḅa, “Amẹnị!”

¹⁸ Wori-nume sime oriḅe tẹ mẹnjị-ḅọrọ etela ḅụ etela kẹ tọrụngbọ-pụụntẹḅọ ḍie irima ḅọ ḅe pịrị. Anịsakị tomi mamgba ḅẹẹ ḅa, “Amẹnị!”

¹⁹ Wori-nume sime oriḅe tẹ jen sịẹ ḅẹ igoniḅọ na, ḍa-na-iyingi-na-fịtẹ-tụḅọ na, diḅọ-fịtẹ-ẹrẹḅọ na karakara ḅẹrẹ pịkị iḅo ḅọ ḅe pịrị. Anịsakị tomi mamgba ḅẹẹ ḅa, “Amẹnị!”

²⁰ Wori-nume sime oriḅe tẹ amịna ḍaḅọ ta ma na gboloma ḅọ ḅe pịrị, gbala ò sime ọ̀ ḍa pịrị ḅọ ma paụma tẹ ẹrẹsị. Anịsakị tomi mamgba ḅẹẹ ḅa, “Amẹnị!”

²¹ Wori-nume sime oriḅe tẹ ḅẹ nama, ḅẹ nama na gboloma ḅọ ḅe pịrịị. Anịsakị tomi mamgba ḅẹẹ ḅa, “Amẹnị!”

²² Wori-nume sime oriḅe tẹ ori na gbọrụ ḍaḅọ na gbọrụ iyingiḅọ na iyi ẹrẹḅọtụḅọ-o, anịanịa ò iyingi iyi ẹrẹḅọtụḅọ-o, anịanịa ọ̀ ḍa iyi ẹrẹḅọtụḅọ sọ na gboloma ḅọ ḅe pịrị. Anịsakị tomi mamgba ḅẹẹ ḅa, “Amẹnị!”

²³ Wori-nume sime oriḅe tẹ amịna taḅọ iyingi na gboloma ḅọ ḅe pịrị. Anịsakị tomi mamgba ḅẹẹ ḅa, “Amẹnị!”

²⁴ Wori-nume sime oriḅe tẹ ḅọị ḅara kẹ amịna pembema tomḅọ ḅaaḅọ ḅe pịrịị. Anịsakị tomi mamgba ḅẹẹ ḅa, “Amẹnị!”

²⁵ Wori-nume sime oriḅe tẹ mịẹye-ofori tomḅọ ḅaa ḅẹ ẹrẹsị ọḅụ fị ḅọ ḅe pịrị. Anịsakị tomi mamgba ḅẹẹ ḅa, “Amẹnị!”

²⁶ Wori-nume sime oriḅe tẹ mị oloko mẹ ḅẹ ẹkwẹn-aḅịḅị ma mịẹ ḅụ arị mịẹ kụrọma-a ḅọ ḅe pịrịị. Anịsakị tomi mamgba ḅẹẹ ḅa, “Amẹnị!”