Ditẹrọnọmị 26 - FỊAFỊA BAỊBỤLỤ

Fịye Soku Agbamịẹ-aị

¹ Ọmịnị ama mẹ tẹ KỊNỊNYANAḄỌ ọmịna Tamụnọ ḅe kẹ sime anga gotẹ ọ́ pịrị ama mẹ ḅio ḅo, tẹ anị ọkị nyana, tẹ anị ḅio anga sakị,

² ọmịnị ama tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ ḅẹ kiri mẹ ḅio ḅẹ tarị sịnmgbọlụ mamgba ḅụ ḅẹ jaị kẹ kana ḅio sụa, tẹ ọmịnị anị kẹ anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị tẹ ori ẹrẹ anịanga sime ḅa ḅẹẹ anga mẹ mu ḅa.

³ Tẹ ọmịnị anị sakị mẹ ḅụ agbamịẹḅọ ḅe tẹ kọrịnama kọrị warị mẹ ḅio emi ḅọ ḅe dama-ḅo tẹ ọ̀ ḅẹẹ ḅa: À mịmgba mẹ mịẹ pakama KỊNỊNYANAḄỌ ị́ Tamụnọ ḅe pịrịm mịnẹ à ḅo anị ama mẹ tẹ KỊNỊNYANAḄỌ ḅe kẹ wa pịrị ḅe ye karị ḅara kẹ minini wamịna aḍapụ pịrị ama mẹ ḅio la tẹ.

⁴ Anịtẹso ọkụma agbamịẹḅọ ḅe ọmịna ḅara ḅụ kana mẹ daa-ọkị tẹ anị kẹ KỊNỊNYANAḄỌ ọmịna Tamụnọ ḅe agbamịẹ-anga mẹ, tọrọkọ sịẹma ḅa.

⁵ Anịsakị ọmịnị nwẹnị KỊNỊNYANAḄỌ ọmịna Tamụnọ ḅe tọrọkọ ḅẹẹ ḅa: Ị̀ ḍa ḅe anie ikelekelearị ḅẹ Eramụ ḅẹ ḅọ, tẹ ori ideri Ijiputi ḅio sọ-mum, tẹ anịjụ bịanḅọ sọm; kịẹn-ḅịḅị ḅụ ịn boowa; tẹ anịjụ ḅụ ò ḅo opu sịẹ, gburo-gburo, kụrọ-nyana tẹ mana-mana atomi sọm.

⁶ Tẹ Ijiputi-ḅẹ-apụ ma nwẹnị guda-guda ḅara kẹ wa mịẹ, tẹ ḅụụ-fụka kẹ wa pịrị, tẹ wa kẹ kụrọtẹ omoniapụ sọma.

⁷ Anịtẹso wa owu KỊNỊNYANAḄỌ ḅe, wamịna aḍapụ ma Tamụnọ ḅe pịrịm, tẹ KỊNỊNYANAḄỌ ḅe wamịna pọkọ naam, tẹ wamịna ḅụụ-fụka mẹ na, wamịna nụnụ mẹ na, wamịna ponoma mẹ na ẹrịm.

⁸ Tẹ KỊNỊNYANAḄỌ ḅe ori opu kụrọ na ịnyọ na, gburo-gburotẹ tẹmẹ-naịn-naịn na, tọnwa elekima na, ḅụụ-gbiripuma aị na, kẹ wa pakama-ḅom Ijiputi ḅụ,

⁹ tẹ wa kẹ mị ama mẹ ḅio ḅom, ḅụụ-ḅẹlẹmatẹ iḅiọkụma fịye so-pakamarị amakiri mẹ.

¹⁰ Ḍikii, mịọkụ kiri mẹ ḅẹ tarị sịnmgbọlụ mẹ tẹ Yei KỊNỊNYANAḄỌ ị́yẹrị kẹ ị̀ pịrị tẹ ye ḅụ arị ọkị-ḅom. Anịtẹso ọkụma ọmịnị anị kẹ KỊNỊNYANAḄỌ ọmịna Tamụnọ ḅe tọrọkọ sịẹma, tẹ KỊNỊNYANAḄỌ ọmịna Tamụnọ ḅe tọrọkọ sunsin ḅa.

¹¹ Anịsakị ọmịnị na, Livayị furo-ḅẹ-ḅọ ḅe na, jen sịẹ ḅẹ igoni ḅọ ḅe tẹ ọmịna ogbo-ḅio simearị ḅọ ḅe na, nwẹnị iḅi mẹ tẹ KỊNỊNYANAḄỌ ọmịna Tamụnọ ḅe kẹ ọmịnị na, ọmịna warị na pịrị tẹ ye mẹ kẹ ḍereku ḅa.

¹² Tẹra akụra karama kụra mẹ, anie nyana aị kẹ oyia akiri ḍiya tẹ gbọrụ kiri gbẹẹ kụra mẹ ḅụ, ọmịnị ọ́ mịẹ pakama-ḅo aị mamgba kẹ oyia akiri ḍiya tẹ anị ḅụ gbọrụ kiri kẹ Livayị furo-ḅẹ-apụ ma na, jen sịẹ ḅẹ igoniapụ ma na, ḍapụ-na-iyingiapụ-na-fịtẹ-awọmẹ ma na, diapụ-fịtẹ-ereme ma na pịrịị, mịẹtẹ ini ọmịna ama ma ḅio inetẹ sime tẹ fị furo ḅinma ḅẹ ḅara,

¹³ anịtẹrẹmẹ mie ọ́ KỊNỊNYANAḄỌ ọmịna Tamụnọ ḅe tọrọkọ ḅẹẹ ḅarịye: À fịafịa ḍiekiri ye mẹ sin pakama tẹẹ, ị̀ warị ḅio ḅụ, anịsakị à pịkị anị kẹ Livayị furo-ḅẹ-apụ ma na, jen sịẹ ḅẹ igoniapụ ma na, ḍapụ-na-iyingiapụ-na-fịtẹ-awọmẹ ma na, diapụ-fịtẹ-ereme ma na pịrị tẹẹ, í oloko mamgba tẹ ị́ wẹrịtẹ tọn ị̀ pịrị ḅara ḅụ; í oloko ma ḅụ à kan kpọkpọ gbọrụ oloko sọ ofori, anịanịa arị kẹ ḅioḅọrọma.

¹⁴ À kururu sime sakị, à nyana-oyi-ḅụụ-gberie mẹ ọkị fị-a, anịanịa à fịafịa-a sakị ḅụ anị ḅụ ḅẹẹye-ḅẹẹye sin, anịanịa anị ḅụ ḅẹẹye-ḅẹẹye sin tẹ kẹ agba mịẹ fịtẹ-apụ pịrị. Àrị ị́ ḅịḅị pokim, yei KỊNỊNYANAḄỌ ị̀ Tamụnọ; ị́ wẹrịtẹ tọn ị̀ pịrị ḅara mamgba à nwẹn mịẹ tẹẹ.

¹⁵ So-ḅio, ị́ fịafịa sime yọ ḅụ ḍiki iderimaa, tẹ ị́ atomi Izirẹlị na, amakiri mẹ tẹ ị́ kẹ wa pịrị tẹ ye mẹ na, ị́ wẹrịtẹ ye karị ḅara kẹ minini wamịna aḍapụ ma pịrị ye mẹ, anie ḅụụ-ḅẹlẹmatẹ iḅiọkụma fịye so-pakamarị amakiri mẹ bomaa.

KỊNỊNYANAḄỌ Ḅe Soku Ḅẹ Atomi

¹⁶ KỊNỊNYANAḄỌ ọmịna Tamụnọ ḅe mịmgba mẹ ḅụ tọn ọ́ pịrị tẹ mịnẹ ọ́ mịna kẹẹ wararị oloko ma na, kụrọ ḅara-ḅio sime apụ sụa oloko ma na, koko tẹ mịẹ, anịẹrẹsị ọ́ ḅụụ ẹbị-ẹbị ọmịna ḅioḅẹngbọ mẹmgba na, ọmịna tẹmẹ mẹmgba na kẹ arị mịẹ.

¹⁷ KỊNỊNYANAḄỌ ḅe gboloma ye ḅụ mịmgba ọ́ mịẹfinji tẹ mịnẹ ori anie ọmịna Tamụnọ, anịsakị anieḅụ ọmịnị ori etela ma ḅụ mẹnjị ḅa, tẹ ori oloko ma tẹ kẹẹ wararị aị ma na, ọ̀ tọn aị ma na, kụrọ ọ̀ ḅara emi tẹ ọ̀ sụa oloko ma na, koko, tẹ ọ̀ pọkọ poki ḅa.

¹⁸ Anịsakị KỊNỊNYANAḄỌ ḅe mịmgba ó gboloma ye mịẹfinji tẹ mịnẹ ọmịnị anie ò soku ḅụ ọ̀ nyana atomi, ọ̀ wẹrịtẹ kẹ ọ́ karịma tẹ ḅara, anieḅụ ọmịnị ori oloko mamgba koko ḅa,

¹⁹ mịẹtẹ ori ọ́ saakị sịẹma gelema opu asịẹ mamgba tẹ ọ̀ mịẹ tẹ aị ma nẹngị ḅẹ ḅara, tokini ḅụ na, ereso ḅụ na, kụn na ḅụ, anieḅụ ọ́ ḅụụ fịafịama sime KỊNỊNYANAḄỌ ọmịna Tamụnọ ḅe pịrị ḅẹ ḅara, ọ̀ wẹrịtẹ ḍuko tẹ ḅara.