Ditẹrọnọmị 24 - FỊAFỊA BAỊBỤLỤ

Ama-Na-Ere-Na Siya Tẹ Pịkị Siin Sime

¹ Owiḅọ ẹrẹḅọ ọkị tẹ árị na simem, anịtẹrẹmẹ ori á ḅụụ ḅụ tọrụ gbẹẹ-a ye ḍọkị-ẹrịm, ẹrẹsị á ḅarị ọ̀ ḅụụ-ḅẹlẹ-a ḅẹḅẹ tẹ ò siya ḍiri kẹẹ tẹ anị kẹ á ḅara-ḅio sụa tẹ ọ̀ warị ḅio á dee pakamam, tẹ á som,

² tẹ á mu jen owiḅọ taḅọ sọm,

³ tẹ ọḅụkọ á sime diḅọ ḅe á ḅarị ọ̀ ḅụụ-ḅẹlẹ-a tẹ siya ḍiri kẹẹ tẹ anị kẹ á ḅara-ḅio sụa, tẹ ọ̀ warị ḅio á dee pakamam, anịanịa á maaịn karama diḅọ ḅe tẹ arị ọkị ọ̀ ta sọma ḅọ ḅe fị-fịị,

⁴ á tarị diḅọ ḅe tẹ á dee pakama ḅọ ḅe, anịtẹrẹmẹ ḅarị inetẹ á pilema tẹrẹmẹ á kẹ sin ọ̀ ta sọma ma; kẹ gotẹ ọkọ ḅẹẹarị, aniemẹ anie KỊNỊNYANAḄỌ ọmịna Tamụnọ ḅe tọrọkọ tọn-tọnye, anịsakị ama mẹ tẹ KỊNỊNYANAḄỌ ọmịna Tamụnọ ḅe kẹ sime anga gotẹ ọ́ pịrị ama mẹ ọ́ ḅẹrẹ-ḅarasii ọkị-ḅo anị ọgọnọ gbana ḅịa.

Kịrị-kịrị Oloko

⁵ Owiḅọ ayaya ẹrẹḅọ sime sakị sime sakị, ori ọmụ-ogbo mẹ ḅụ sọ tẹ ọmụ mu, anịanịa ḅẹ kọrịnama, kọrịnama sọ kẹ ọ̀ pịrị kọrị ma; ori ori ama ḅụ gbọrụ kụra kẹ sịḅị nyana tẹ sime ḅa, mịẹtẹ ori ọ̀ ta ma tẹ ò sime ḅọ ma na tọrụ-ḅẹlẹ ḅẹ ḅara.

⁶ Gbọrụḅọ-sọ pakịrị ḅụ ye-gbẹẹ-ḍụḅarị daa-ọkị ma, kẹ gotẹ ọkọ ḅẹẹarị, gbala anị pakịrị mẹ kịkarị ye anie tomḅọ ḍumo ọkị.

⁷ Gbọrụ owiḅọ Izirẹlịapụ ma, ori amịnapụ ma ḅẹ gbọrụḅọ furuarị tẹ ọ́ ḍọkị-ẹrịm, tẹ ori omoniḅọ mịẹ ḅara kẹ mḅọ mịẹarị, anịanịa mḅọ dẹrị-dẹrị, anịrẹ anị furuḅọ ḅe fịị ḅa; mị-ḅara mie ọ́ kẹ ọmịna ogbo-ḅio siye mẹ sịkịrị sin ḅarị ḅara.

⁸ Ọmịnị ọmịna aḅụụ ẹbị sofịnị-obi ḅo ọ́ la sakị la sakị, ḅẹlẹma iḅiọkụ ḅụụ ẹbị tẹ Livayị furo ḅẹ agbamịẹapụ ma kẹ ọ́ daa-karakarama ḅara, karakarama ḅara mịẹ ḅụ, à wẹrịtẹ tọn ịn pịrị ḅara mie ọ́ ḅụụ ẹbị tẹ mịẹ ḅarị ḅara.

⁹ Ọ́ KỊNỊNYANAḄỌ ọmịna Tamụnọ ḅe ọmịnị Ijiputi ḅụ paka-ḅoarị sakị ḅụ kẹ Mirihamụ mịẹ ḅara kẹ ḅiokoroma.

¹⁰ Ọ́ ḅẹẹye-ḅẹẹye kẹ ọmịna mịnaḅọ ḅọlọ sakị ḅọlọ sakị, ọmịnị ọ̀ warị ḅio sọ-mu tẹ ọ̀ kẹ ọmịna ḅara anị pakịrị ḅẹ ye mẹ ọkị ma.

¹¹ Ọmịnị etela-ogbo ḅụ sịẹsime ḅa, tẹ tomḅọ ḅe tẹ ọmịnị igbigi mẹ kẹ ḅọlọarị ḅọ ḅe, ọ̀ kẹ ọmịna ḅara pakịrị ḅẹ ye mẹ pakama-ḅo ọ́ pịrị ḅa.

¹² Anịsakị tomḅọ ḅe igoinḅọ ḅẹḅẹ, ọmịnị ọ́ kẹ anị pakịrị ye mẹ kẹ ọmịna warị ḅio wẹrịtẹ mono ma;

¹³ ịrụa mẹ tuuideri sakị, ọ́ pịkị ye mẹ pịkịma-ḅo ọ̀ pịrịị, mịẹtẹ ori ọ̀ kikima anga ḅụ mono tẹ ó boma ḅẹ ḅara; anịsakị anị karakara sọ ọ́ pịrị ḅa KỊNỊNYANAḄỌ ọmịna Tamụnọ ḅe tọrọkọ ḅụ.

¹⁴ Ọmịnị ori ḅe tẹ igoin wararị tẹ ngiriarị ọkọ fịrịmẹnjịḅọ ḅe ponoma ma, ori ọmịna amịnapụ ma ḅẹ gbọrụḅọ-o, anịanịa ja asịẹ ḅẹ igoniapụ ma tẹ ọmịna ama ma ḅio simearị apụ ma ḅẹ gbọrụḅọ sọ.

¹⁵ Ọmịnị ori ọkọ igbigi mẹ kẹ ọ̀ pịrịị, ọ̀ kọrịnama mẹ kọrị tẹ anị fị ḅẹ ene mẹ ḅụ, tẹrẹmẹ ịrụa mẹ tuuideri sakị la, kẹ gotẹ ọkọ ḅẹẹarị, ori igoin wararị, tẹ anị mie ọ̀ kẹ ọ̀ ḅụụ ḍikiḍiki ḅẹ tẹ koruarị. Anie ofori, ò ḅofa ọmịnị na tụḅụrụ ḅụ tẹmẹ-la ḅara kẹ ḍuko-sụa KỊNỊNYANAḄỌ ḅe pịrị, tẹ anị siye sọ kẹ ọ́ pịrị.

¹⁶ Ini awọmẹ mịẹ asi ma gotẹ ḍapụ-na-iyingiapụ-na ḅaa ma, anịanịa ḍapụ-na-iyingiapụ-na mịẹ asi ma gotẹ awọmẹ ma ḅaa ma; tomḅọ goḅọ-goḅọ mḅọ soku-ḅẹ si gotẹ fịị ḅa.

¹⁷ Ọ́ karakara ḅẹrẹkọn pịkị-iḅo jen sịẹ ḅẹ ḅọ, anịanịa ḍaḅọ-na-iyingiḅọ-na-fịtẹ-tụḅọ pịrị ma, anịanịa pakịrị ye ḅụ diḅọ-fịtẹ-ẹrẹḅọ ḅara ḅụ opu kapa da ọkị ma.

¹⁸ Kụma ọ́ kẹ ḅiokoroma ḅa mịnẹ ọmịnị Ijiputi ḅụ omoni-sọ simem, tẹ KỊNỊNYANAḄỌ ọmịna Tamụnọ ḅe anịanga ọ́ pakịrị ọkịm, anịẹrẹsị à tọn ọ́ pịrịm ó miemẹ mịẹ.

¹⁹ Ọmịnị ọmịna ḍụọ ḅio ọmịna afịaị sokum tẹ ḍụọ mẹ ḅio fịye gbọrụ puku kẹ ḅioḅọrọma sakị ḅọrọma sakị, ọmịnị ọḅụ pịkị tẹ mu anị ọkị ma; anị sime jen sịẹ ḅẹ igoniḅọ ḅe na, ḍaḅọ-na-iyingiḅọ-na-fịtẹ-tụḅọ na, diḅọ-fịtẹ-ẹrẹḅọ ma na pịrịm; mịẹtẹ KỊNỊNYANAḄỌ ọmịna Tamụnọ ḅe ọmịna aḅara ḅẹ kọrịnama mamgba ḅụ ọ́ boma ḅẹ ḅara.

²⁰ Ọmịnị ọmịna olivu asịn ma ḅẹ sịnmgbọlụ ma kaịn sakị, kaịn sakị, ọ́ ḅarị sin sịn aḅara ma ḍiki ikelema-koro ma; anị sime kẹ jen sịẹ ḅẹ igoniḅọ ḅe na, ḍaḅọ-na-iyingiḅọ-na-fịtẹ-tụḅọ na, diḅọ-fịtẹ-ẹrẹḅọ ma na pịrịm.

²¹ Ọmịnị ọmịna girepu-ḍụọ ḅẹ asịnmgbọlụ ma kobiri sakị kobiri sakị, ọ́ ḅarị ọḅụkọ mu siin arị kaịn ma; arị sime igoniḅọ mẹ na, ḍaḅọ-na-iyingiḅọ-na-fịtẹ-tụḅọ mẹ na, diḅọ-fịtẹ-ẹrẹḅọ ma na pịrịm.

²² Ọ́ kẹ ḅiokoroma ḅa mịnẹ, ọmịnị omoni-sọ simem Ijiputi ḅụ; anịẹrẹsị à tọn ọ́ pịrịm ó miemẹ mịẹ.