Ditẹrọnọmị 23 - FỊAFỊA BAỊBỤLỤ

KỊNỊNYANAḄỌ Ḅe Atomi Ḅụụ Ḅụ Ịn Sikima Ḅarị Apụ

¹ Oriḅe tẹ amịna kịkọ poo wararị, anịanịa, oriḅe tẹ amịna owiḅọ ḅụụ pẹlẹ-so wararị ḅọ goḅọ-goḅọ KỊNỊNYANAḄỌ ḅe kobiri-ogbo mẹ ḅio sọ-mu ma.

² Ḍa nyana-a gbọrụḅọ-sọ KỊNỊNYANAḄỌ ḅe kobiri-ogbo mẹ ḅio sọ-mu ma; ọ̀ ḅụụ ḅụ paka-ḅo apụ ḅụ ọkị mu oyi karama ḅụọ la sọ KỊNỊNYANAḄỌ ḅe kobiri-ogbo mẹ ḅio sọ-mu ma.

³ Amọnị furo ḅẹ gbọrụḅọ, anịanịa Mohabụ furo ḅẹ gbọrụḅọ-sọ KỊNỊNYANAḄỌ ḅe kobiri-ogbo mẹ ḅio sọ-mu ma; ọkị mu oyi karama ḅụọ la sọ, sime ịn pịrị kpọkpọ gbọrụḅọ-sọ KỊNỊNYANAḄỌ ḅe kobiri-ogbo mẹ ḅio sọ-mu ḅịa gbamasom;

⁴ gbala ọmịnị Ijiputi ḅụ paka-ḅo sakị, etela mẹ ḅụ ịn ḅo fịye na, minji na kẹ ọmịnị na bịama-a, anịsakị ịn pịkị Balamụ, Mẹsopotemịya ḅẹ Pitọ ḅụ ḅo Bẹyọ owiḅọtụḅọ ḅe ọkọm ò ḅo ọmịnị ma worii ẹrẹsị.

⁵ Anịsọ KỊNỊNYANAḄỌ ọmịna Tamụnọ ḅe Balamụ pọkọ poki-a; kụma KỊNỊNYANAḄỌ ọmịna Tamụnọ ḅe wori-nume mẹ pịkị tẹ kẹ boma mịẹ ọ́ pịrịm, gbala KỊNỊNYANAḄỌ ọmịna Tamụnọ ḅe ọ́ ḅẹlẹmam ẹrẹsị.

⁶ Ọmịnị ịna dein, anịanịa ịna lọkọlọkọ ḍọkị ma gbamasoo, ọmịna ḍumo-ene mamgba ḅụ.

⁷ Ọmịnị Idọmụ ḅẹ ḅọ ḍiki-sima ma, kẹ gotẹ ọkọ ḅẹẹarị, ori anie ọmịnị na gbọrụ ḍaḅọ iyi owiḅọ; ọmịnị Ijiputi-ḅẹ-ḅọ ḍiki-sima ma, kẹ gotẹ ọkọ ḅẹẹarị, ọmịnị ori ama ḅio igoni kẹ bịan simem.

⁸ Ini iyi ịn pịrị tẹra ḅụọ karama awọmẹ ma inetẹ KỊNỊNYANAḄỌ ḅe kobiri-ogbo mẹ ḅio sọ-mu ḅa.

Ọmụgbin-apụ Ma Akpụrụ-warị Wẹrị Fịafịama Ḅarị Ḅara

⁹ Ó mu ọmịnị na fịya-a apụ ma da-paka ḅẹ akpụrụ-warị ḅio kobiri sakị, anị sakị mẹ siye goyegoye ḅụ ọmịnị ọmịna aḅụụ wẹrị ḅelema ḅa.

¹⁰ Ọmịna ogbo-ḅio ḅụ ḅẹẹ owiḅọ owiḅọ tẹ ḍin ḅụ saraye amịna ḅụụ paka-ḅo tẹ mḅọ fịafịa-a ḅara sime-sime, ori akpụrụ-warị mẹ ḅio mẹnjị paka ḅa; ori ọmụgbin-apụ ma ogbo-ḅio sime ma.

¹¹ Kụma anị ḅo ḅoḅiri-so la sakị, ò minji ḅiri ḅa, tẹ ịrụa mẹ tuukoro sakị, ori inetẹ akpụrụ-warị mẹ ḅio sọ-ḅo ḅa.

¹² Ọ́ gbọrụ anga nyana ḅa akpụrụ-warị mẹ ḅẹ etela ogbo ḅụ, tẹ ọ́ paka, paka mu ḅarị anga,

¹³ anịsakị ọ́ gbọrụ sin kẹ ọmịna ọmụgbin-aị ma ḅụ sụa ọkị ḅa, anịsakị ọ́ paka mu sombi ḅẹ sakị, ọmịnị anị kẹ kiri pokoloma ḅa, tẹ ọḅụ pịkị tẹ pọkụ-muye mẹ gbaịn ḅa.

¹⁴ Gbala KỊNỊNYANAḄỌ ọmịna Tamụnọ ḅe ọmịna ọmụgbin-apụ ma kobiri-ogbo mẹ ogbo-ḅio ọ́ ḅọrọma tẹ ọmịna tọrọkọ ḅụ ọmịnị na fịya-a apụ ma kẹ ọ́ pịrị fama ḅẹ ḅara kẹ mẹnjịarị, anịẹrẹsị ọmịnị akpụrụ-warị mẹ mịẹ fịafịama nyanam, mịẹtẹ ori ọmịna ogbo-ḅio sịḅị-ngụngụnma aị ẹrị tẹ ọmịna aḅụụ pịkị-so ḅịa ḅara.

Kịrị-kịrị Oloko Ma

¹⁵ Omoniḅọ tẹ amịna sịḅịdaḅọ ḅara ḅụ mangị-so ḅo warịḅọkọ kẹ ọ́ sụa omoniḅọ, ọmịnị ọ̀ pakama ọ̀ sịḅịdaḅọ pịrị ma;

¹⁶ ori ọmịnị na anga ḅa ọmịna ama ma ḅẹ gberie tẹ ọ̀ ḅụụ-ḅẹlẹ tẹịn tẹ ọ̀ sẹlẹ-ọkị ḅarị anga ḅụ ọmịna ogbo-ḅio ḅụ; ọmịnị ò ponoma ma.

¹⁷ Izirẹlị ḅẹ eremịna awọmẹ ma ogbo-ḅio sunsin tẹmẹ ḅẹrẹtọn minini kụrọ nyana ḅẹ ogbo ḅẹ sẹfị gbọrụ ẹrẹḅọtụḅọ, anịanịa sunsin tẹmẹ ḅẹrẹtọn minini kụrọ nyana ḅẹ ogbo ḅẹ sẹfị gbọrụ owiḅọtụḅọ sọ Izirẹlị ḅẹ owiapụ-awọmẹ ma ḅụ paka ma.

¹⁸ Kẹ sẹfị-ẹrẹḅọ ọkọ igbigi, anịanịa kẹ sẹfị owiḅọ anie obiri gbẹẹ igbigi ọ́ kẹ KỊNỊNYANAḄỌ ọmịna Tamụnọ ḅe warị mẹ ḅio sọ-ḅo tẹ kẹ gbọrụ ịlọ sọ suma ma; kẹ gotẹ ọkọ ḅẹẹarị, mịna maaịn mamgba anie KỊNỊNYANAḄỌ ọmịna Tamụnọ ḅe tọn-tọn-aị.

¹⁹ Ó ye gbanama gbẹẹ ḅara kẹ ye kẹ ọmịna pembe Izirẹlị ḅọ ḅọlọ ma, igbigi ọgọnọ gbana ye-o, ḅụụ-wẹrịma afịaị ọgọnọ gbana ye-o, ḅẹẹye-ḅẹẹye tẹ ye kẹ gbana gotẹ ọ́ kẹ kịnị ḅọlọarị ye goyegoye sọ.

²⁰ Jen sịẹ ḅẹ ḅọ ḅara ḅụ, ọmịnị inetẹ ye gbanama gbẹẹ ḅara kẹ ye kẹ mḅọ ḅọlọ ḅa, kụma ó ye gbanama gbẹẹ ḅara kẹ ye kẹ ọmịna pembe Izirẹlị ḅọ ḅọlọ ma; mịẹtẹ KỊNỊNYANAḄỌ ọmịna Tamụnọ ḅe ama mẹ tẹ ọ́ sọ anị ḅẹ aị ọkị nyana ḅẹ muarị ama mẹ ḅio ọmịnị ọkị tẹ mịẹ ḅẹ aị mamgba ḅụ ó boma ḅẹ ḅara.

²¹ Ọmịnị ịlọ minini KỊNỊNYANAḄỌ ọmịna Tamụnọ ḅe pịrị sakị, pịrị sakị, anị suma ḅụ ọ́ ḅụụ-lọkọ ma; KỊNỊNYANAḄỌ ọmịna Tamụnọ ḅe anị ḅẹ ye ḅii ḅa, anịsakị anị ọmịna ḅụụ si sọ ḅa.

²² Kụma ọmịnị ịlọ minini-a ḅẹḅẹ, anị ọmịna aḅụụ si sọ ḅịa.

²³ Ọ́ ḅụụ ẹbị tẹ ọmịna ḅịḅị finjitẹ ḍuko ye mẹ mịẹ ḅa, kẹ gotẹ ọkọ ḅẹẹarị, tọn ọ́ pịrị-a ḅara ḅụ ọmịnị ḅarana ịlọ minini KỊNỊNYANAḄỌ ọmịna Tamụnọ ḅe pịrịm tẹ ọmịna ḅịḅị kẹ karị tẹ.

²⁴ Ọ́ mẹnjị ọmịna mịnaḅọ girepu-ḍụọ ḅio sọ sakị sọ sakị, ọmịnị inetẹ anịḅẹ asịnmgbọlụ fị ọmịna furo ḅinma ḅa, ọ́ fị ḅẹ ḅii ḅara ḅii ḅara, kụma ó gberie-sọ kẹ ọmịna ye-sụaye ḅio sụa ma.

²⁵ Ọmịnị ọmịna mịnaḅọ mgbọlụ-sụa ḍụọ akaka ḅọrọ sakị ḅọrọ sakị, ọmịnị inetẹ ḅara kẹ ọ́ fị ḅẹ ye kaịn ḅa, kụma ó fịye-pẹlẹ-ogie kẹ ḍụọ mẹ ḅio gberie-sọ soku ma.