Ditẹrọnọmị 17 - FỊAFỊA BAỊBỤLỤ

¹ Ọ́ gbọrụ pootẹ-nambulo, anịanịa gbọrụ anana tẹ ḅẹkụ ḅụụ ḅụ emi nama, ḅẹ si ḅara, si ḅara sime ye sọ kẹ agba mịẹ KỊNỊNYANAḄỌ ọmịna Tamụnọ ḅe pịrị ma.

² Ọmịna ama ma tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama ma ḅụ, ḅẹ ama, ḅẹ ama ḅio, ọmịna ogbo-ḅio gbọrụ owiḅọ, anịanịa, gbọrụ ẹrẹḅọ, tẹ KỊNỊNYANAḄỌ ọmịna Tamụnọ ḅe ḍiki-tọrụ ḅụ, ori ọḅọkụ kan ḅụ siye mịẹ tẹ ọ́ ḍọkị-ẹrị-ẹrị,

³ tẹ mu tẹ fịrịmẹnjị oru-atamụnọ, anịanịa ịrụa mẹ, anịanịa akalụ mẹ, anịanịa, ḅẹẹye-ḅẹẹye tẹ So-ḅio sime ye tẹ à tọn-tọn-aị ma pịrị tẹ sunsin ịn pịrị,

⁴ tẹ ini anị ḍuko ọ́ pịrị tẹ ọmịnị anị gboloma ye naa tẹ; anịtẹrẹmẹ ọmịnị iḅiọkụ gbela ḅa, tẹ anị tụkụma ḅara ḅụ karakaraye sọm mịnẹ Izirẹlị ḅụ ọkọ sime tọn-tọnye mịẹ tẹ ḅẹḅẹ,

⁵ anịrẹ ọmịnị anị owiḅọ ḅe, anịanịa anị ẹrẹḅọ ma tẹ mị siye mẹ mịẹ ḅọ mẹ kẹ ọmịna ogigo-aḅọkọ ma ḅo ḅa tẹ ḍụḅarị kẹ anị owiḅọ ḅe, anịanịa anị ẹrẹḅọ ma gbin ḅaa ḅa.

⁶ Maa apụ, anịanịa tẹra ḅẹrẹ kiri sime apụ ịn kẹ ye nimi ḅara ḍuko tẹrẹmẹ mie ori tẹ fịị ḅẹ ḅọ ḅe ini ọ̀ ḅaa ḅarịye; gbọrụ ogbo-sịẹḅọ nimi tẹ ḍuko ye ḅụ ịn gbọrụ tomḅọ sọ ḅaa ḅịa.

⁷ Ọ̀ ḅaa mẹ ḅụ ḅẹrẹ kiri sime apụ ma ḅara tomi mamgba ḅụ tarị tarị ọ̀ da-paka ḅa, tẹrẹmẹ tomi mamgba ḅo anị ḅụ sọ ḅa. Mị-ḅara mie ọmịnị ọmịna ogbo-ḅio siye mẹ sịkịrị sin ḅarị ḅara.

⁸ Ḅẹẹ ḅẹrẹ ḅẹrẹ ọmịna ama ma ḅio saakịm tẹ ọ́ kọọn ḅẹ-ḅiiarị — anị ḅọrọ gbọrụ kịnị-ḅa jen kịnị-ḅa ḅụ kịrị-ḅele ḅara-o, anịanịa gbọrụ oloko ḅẹ karakara jen oloko ḅẹ karakara ḅụ kịrị-ḅele ḅara-o, anịanịa gbọrụ kịnị fomu-ḅara jen kịnị fomu-ḅara ḅụ kịrị-ḅele ḅara-o — tẹ anị ọmịna aḅụụ kụrọ ḅaka-ḅaka, anịrẹ ọ́ saakị iwo anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị ḅẹ anga mẹ mu ḅa,

⁹ tẹ ḅẹrẹ mẹ kẹ Livayị furo ḅe agbamịẹapụ ma na, arị asakị ma ḅụ ḅẹrẹkọnḅọ ḅe na tọrọkọ koroma tẹ ịn ḅẹrẹ-pẹlẹ ḅịḅị mẹ mịẹfinji ọ́ pịrị.

¹⁰ Anịtẹso ọkụma anịanga mẹ tẹ KỊNỊNYANAḄỌ ḅe sẹlẹ-ọkị ḅarị anga mẹ ḅụ ịn mịẹfinji ọ́ pịrị ye mẹ mie ọ́ wẹrịtẹ ye mịẹ ḅarị ḅara; anịsakị ọ́ ḅụụ ẹbị ḅa, tẹ ịn wẹrịtẹ ọ́ datụkụma ḅarị ḅara mẹmgba mịẹ ḅa;

¹¹ toluma-aị ma tẹ ịn wẹrịtẹ ḍuko ọ́ pịrị ḅara na, ḅẹrẹ-pẹlẹ ḅịḅị mẹ tẹ ịn ḍuko ọ́ pịrị ḅara mẹ mie ọ́ mịẹ ḅarịye; ḅẹrẹ-pẹlẹ ḅịḅị mẹ tẹ ịn mịẹfinji ọ́ pịrị ye mẹ ḅụ ọ́ tọrụ pịkị akaka ḅio ama-ḅara, anịanịa ere-ḅara daa ma.

¹² Tomḅọ ḅe tẹ amịna ḅiotọn ḅara tọn ḅara kẹ ye mịẹ ḅụ anịjụ sịẹsime tẹ KỊNỊNYANAḄỌ ọmịna Tamụnọ ḅe tọrọkọ fịrịmẹnjịarị agbamịẹḅọ ḅe, anịanịa ḅẹrẹkọnḅọ ḅe ḅịḅị poki-a ḅọ, poki-a ḅọ, anị tomḅọ ḅe mḅọ fịị ḅa; mị-ḅara mie ọ́ kẹ Izirẹlị ḅụ siye mẹ sịkịrị sin ḅarịye.

¹³ Anịsakị tomi mamgba anị naa, tẹ ḅalafa ḅa, tẹ ḅarị jen-maaịn kẹ amịna ḅiotọn ḅara tọn ḅara kẹ ye mịẹ ma.

Amadaḅọ Gbolomaye Ḅụ Mịẹ Ḅẹ Aị Ḍuko

¹⁴ Ó ḅo ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ la, tẹ anị nyana, tẹ anga sakị, anịtẹrẹmẹ ọ́ ḅẹẹ: Wa amadaḅọ kẹ wamịna sịḅị-dama ḅa, wa ikelema-koro wararị opu asịẹ mamgba nyana ḅara.

¹⁵ Anị ḅọ mẹ tẹ KỊNỊNYANAḄỌ ọmịna tamụnọ ḅe sẹlẹ-ọkị ḅarị ḅọ mẹ mie karakara ḅara ḅụ ọ́ kẹ ọmịna sịḅị-dama ḅarịye. Ọmịna amịnapụ ma ogbo-ḅio ḅẹ gbọrụḅọ mie ọ́ kẹ ọmịna sịḅị-dama ḅarịye. Ó jen sịẹ ḅẹ igoniḅọ tẹ ọmịna iyimbere-a ḅọ kẹ inetẹ ọmịna sịḅị-dama ma.

¹⁶ Anị ḅio sime gberie anie ọ̀ tọnwa asụ nyana ọ̀ ḅụụ pịrị ḅẹ ḅii nyana ḅịa, anịanịa tọnwa asụ nyana gotẹ mịẹtẹ tomi ma pịkịma Ijiputi mu ḅịa, KỊNỊNYANAḄỌ ḅe ọ́ ḅẹẹ tẹ: Gbala-gbala ọ́ ḅarị jen-maaịn kẹ pịkịma anị etela mu ma nwẹn ḅẹẹ sakị.

¹⁷ Anịsakị ọ̀ pịkị tọnwa ereme sime ọ̀ ḅụụ gbori ma, anieofori ò ḅioḅẹngbọ ḅofa pịkị-so jen anga da; ọ̀ pịkị gburo-gburoma tọnwa seleḅa na, golu na nyana ọ̀ ḅụụ pịrị ma.

¹⁸ Anịsakị ori ori ama-da emine mẹ ọgọnọ lẹgị sakị, mị oloko mẹ ḅẹ ḍiri mẹ tẹ Livayị furo ḅẹ agbamịẹapụ ma ḅara simearị ye mẹ ḅụ ọ̀ gbọrụ ḍiri kẹẹ amịna ḅụụ pịrị ḅa;

¹⁹ tẹ anị ọ̀ ḅara ḅụ sime tẹ ò ḍumo-ene mamgba ḅụ ori anị go ḅa, mịẹtẹ ọ̀ KỊNỊNYANAḄỌ ọ̀ Tamụnọ ḅe mangịma mẹ ḍawọ ḅẹ ḅara, mị oloko mẹ ḅẹ ẹkwẹn-aḅịḅị ma na, mịna kẹẹ wararị oloko ma na koko tẹ arị mịẹ ḅụ;

²⁰ mịẹtẹ ori ò ḅioḅẹngbọ saakị-gelema ori amịnapụ nẹngịma ḅịa, tẹ oloko mẹ ḅụ tọrụ-pịkị ama-ḅara, anịanịa ere-ḅara da ma ḅara; anieḅụ ori na, ori awọmẹ na Izirẹlị ḅụ ori ama-da ḅụ sime nangwọma ḅẹ ḅara.