Ditẹrọnọmị 13 - FỊAFỊA BAỊBỤLỤ

¹ Ọmịna ogboku ịkịankoroḅọ, anịanịa ḍawọ-puuḅọ saakị paka-ḅo tẹ gbọrụ elekima, anịanịa gbọrụ ḅụụ-buamaye ḍuko ọ́ pịrị,

² tẹ elekima mẹ, anịanịa ḅụụ-buamaye mẹ tẹ ò ḍuko ọ́ pịrị ye mẹ paka-paka, tẹ ó yee wa ja oru-atamụnọ tẹ amụ ó nimi-a aị ḍukamẹnjị tẹ fịrịmẹnjị ịn pịrị kẹ ọ́ ḅẹẹ ḅẹẹ,

³ ọmịnị anị ịkịankoroḅọ ḅe anịanịa anị ḍawọ-puuḅọ ḅe ẹkwẹn-aḅịḅị poki ma; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọ́ daaḍikiarị, ọmịnị ọmịna ḅioḅẹngbọ mẹmgba na, ọmịna tẹmẹ mẹmgba na kẹ KỊNỊNYANAḄỌ ọmịna Tamụnọ ḅe ḅẹlẹma ḅoto.

⁴ Ọ́ KỊNỊNYANAḄỌ ọmịna Tamụnọ ḅe ḍukamẹnjị ḅa, tẹ ò mangịma tẹ ori oloko ma koko, tẹ ọ̀ pọkọ poki, tẹ fịrịmẹnjị ọ̀ pịrị, tẹ ọ̀ fịnama ḅa.

⁵ Kụma anị ịkịankoroḅọ ḅe, anịanịa anị ḍawọ-puuḅọ ḅe ini ọ̀ ḅaa ḅa, gbala ọ̀ sịḅị-kụrọ toluma tẹ, KỊNỊNYANAḄỌ ọmịna Tamụnọ ḅe tẹ Ijiputi ḅẹ ama mẹ ḅio ọ́ pakama-ḅo, tẹ omoni-sọ anga mẹ ḅio ọ́ pakịrị ḅọ ḅe na tụḅụrụ ye tolumam ẹrẹsị, kẹ ó mịẹtẹ ọmịnị etela mẹ tẹ KỊNỊNYANAḄỌ ọmịna Tamụnọ ḅe tọnm ọ́ mẹnjị ḅẹẹ ye mẹ wẹrịso ḅẹ ḅara. Mị-ḅara mie ọ́ kẹ ọmịna ogbo-ḅio siye mẹ sịkịrị sin ḅarị ḅara.

⁶ Í iyimbere, í iyingi owiḅọtụḅọ, anịanịa í owiḅọtụḅọ, anịanịa ị́ ẹrẹḅọtụḅọ, anịanịa ị́ tẹmẹ ḅio sime taḅọ, anịanịa í ikiaḅọ tẹ ị́ ọkị ị́ tẹmẹ lama ḅọ ḅọị ḅara kẹ í toluma tẹ ḅẹẹm: Yee wa mu fịrịmẹnjị oru-atamụnọ pịrị, oru-atamụnọ tẹ ị́yẹrị, anịanịa ị́ aḍapụ sọ nimi-a ye;

⁷ tomi-kụlọkụlọ ma tẹ ọmịnị ikelema-koro wararị apụ ma oru-atamụnọ ma ọmịnị na kpeki aị-o, ala-jụ ḅụ sime aị-o, tomikiri mẹ ḅẹ gbọrụ kunoma ḅụ ọkị mu osi kunoma la,

⁸ ọ́ ḅụụ-sịkị ọ̀ pịrị anịanịa ò poki ma, anịanịa ọmịnị ò ḍiki sịḅị-jịrị, anịanịa wẹrịso ọ̀ pịrị, anịanịa ọ̀ gbaịn;

⁹ kụma ọmịnị ọ̀ ḅaa ḅa; ọ̀ ḅaa ḅụ, ọmịna ḅara tarị ọ̀ da-paka ḅa, anịtẹrẹmẹ tomi mamgba ḅara sọ ḅa.

¹⁰ Ḍụḅarị mie ọ́ kẹ ò gbin ḅaa ḅarịye, gbala ọ̀ KỊNỊNYANAḄỌ ọmịna Tamụnọ ḅe tẹ Ijiputi ḅẹ ama mẹ ḅio, ọmịnị omoni-sọ anga mẹ ḅio ọ́ pakama-ḅo ḅọ ḅe ḅụụ ḅụ ọ́ nụnụ sin ḅẹ ḍọkịm ẹrẹsị.

¹¹ Anịsakị Izirẹlị mẹmgba anị naa tẹ ḅalafaa ḅa, tẹ ọmịna ogbo-ḅio ḅụ gbọrụḅọ-sọ gbala-gbala ḅarị miemẹ kịkama si-sịḅịḅio-sụa ma.

¹² Ọmịna opu ama ma tẹ KỊNỊNYANAḄỌ ọmịna Tamụnọ ḅe kẹ ọ́ pịrịm ọmịnị anịjụ anga ḅẹẹ aị ma ḅẹ gberie ḅio ọ́ naa, naa,

¹³ mịnẹ ofori-ofori gbọrụ atomi ọmịna ogbo-ḅio paka mu opu ama mẹ ḅio sime apụ ma nụnụ so tẹ ḅẹẹm: Ó yee wa mu fịrịmẹnjị oru-atamụnọ pịrị, arị aị ma tẹ amụ ọ́ nimi-a aị ma,

¹⁴ anịrẹ ó gbela ḅa, tẹ ḍọkị, tẹ iḅiọkụ gbela ḅa; tẹ ḍikii anị karakaraye ye sọm, mịnẹ ọkọ sime tọn-tọnye ọmịna ogboku mịẹ tẹ ḅẹḅẹ,

¹⁵ tụkụma ḅara ḅụ ọmịnị anị opu ama mẹ ḅio sime apụ ma kẹ koroma okologie mẹ pịrị ḅa, ịkatakirikọn-a-ḅara kẹ okologie mẹ kẹ anị ḅio sime apụ mamgba na, anị ḅẹ opu anama na ḅaa ḅụ.

¹⁶ Ọmịnị anị ḅio ḅẹ aị mamgba kobiri anị ḅẹ ama-ogbo ḅụ sara ḅa, tẹ fịnị kẹ bebetẹ dọkịma agba mịẹ ḅara kẹ opu ama mẹ na, anị ḅio ḅẹ fọịn aị mamgba dọkịma KỊNỊNYANAḄỌ ọmịna Tamụnọ ḅe pịrị ḅa; anị gbọrụ kiri ḅụ kpoli sime gbamaso ḅa, ịn ḅarị jen kẹ sin anị nama ḅịa.

¹⁷ Sime sima pịrị aị ma ḅẹ gberie-sọ ọmịna ḅara sọ ma; mịẹtẹ KỊNỊNYANAḄỌ ḅe ọ̀ ḅalafama ịganị ḅụ pịkị tẹ ọkụrụkụrụ na, ḍiki-ḅụụjịrị na nyana ọ́ pịrị, tẹ ọ̀ wẹrịtẹ ye karị ḅara kẹ minini ọmịna aḍapụ ma pịrị ḅara ori ọ́ mịẹtẹ ọ́ kama ḅẹ ḅara,

¹⁸ ó nwẹnị KỊNỊNYANAḄỌ ọmịna Tamụnọ ḅe pọkọ poki, ori oloko mamgba tẹ mịmgba à tọn ọ́ pịrị aị ma koko, tẹ KỊNỊNYANAḄỌ ọmịna Tamụnọ ḅe ḍiki-tọrụ ḅụ aniemẹ tẹ kuraye mịẹ-mịẹ.