Ditẹrọnọmị 12 - FỊAFỊA BAỊBỤLỤ

Sime Sunsin Pịrị Gbọrụ Anga Mẹ

¹ Ma ma anie kẹẹ wararị oloko ma na, kụrọ ḅara ḅio sime apụ sụa oloko ma na tẹ ama mẹ tẹ KỊNỊNYANAḄỌ ọmịna aḍapụ ma Tamụnọ ḅe kẹ ọ́ pịrị tẹ ó tomikiri mẹ ḅụ ḍumo-sime wararị ene mamgba ḅụ ọ́ nyana ḅẹ ama mẹ ḅio ọ́ ḅụụ ẹbị-bịtẹ mịẹ ḅarị aị.

² Tụkụma ḅara ḅụ opu asịẹ ma tẹ ọ́ ḅara ḅụ ịn nyana aị ọkị ḅarị apụ ma, gele tụndụ ma ọgọnọ na, tụndụ ma ọgọnọ na, eleleinda tọrụ sụa opu asịn goyegoye suku ịn fịrịmẹnjị pịrị sime ịna oru-atamụnọ ma sime anga mamgba ó sima fama ḅa.

³ Ọmịnị ịna ebeka ma kaan-sara ḅa, tẹ ịna ịḅalị ma kẹ jen-jen fomu pakịrị-pakịrị puu ḅa, tẹ fịnị kẹ ịna oru-tamụnọ ịn kẹ Asirimu sịn ye mẹ dọkịma ḅa; ịna oru-atamụnọ ma tẹ ịn kẹ ye kịkama tẹmẹ-aị ma pẹlẹ-gbin tẹ anịjụ mẹ ḅụ anị ẹrẹ fama ḅa.

⁴ Ọmịnị ọkọ kẹ sunsin KỊNỊNYANAḄỌ ọmịna Tamụnọ ḅe pịrị ma.

⁵ Kụma ọmịnị ọ́ KỊNỊNYANAḄỌ ọmịna Tamụnọ ḅe furo-furo mamgba ḅụ sẹlẹ pakama-ḅo ḅarị anga mẹ tẹ ori ẹrẹ kẹ sụa tẹ anịjụ kẹ ò sime anga mịẹ ḅẹ ḅara ḍọkị ḅa, anịjụ mie ó mu ḅarịye,

⁶ Anịsakị anịjụ mie ọmịnị ọmịna dọkịma agbamịẹ-aị na, ọmịna agba ma na, ọmịna nyana-oyi-ḅụụ-gberie mẹ na, agba tẹ ọ́ mịẹ ḅẹ aị ọmịna ịlọ suma agba ma-o, ọmịna kuroma ḅụ ḅo ḅara ḅẹ agba ma-o, ọmịna anama ogbo ma na, ọmịna anana na oḅori na ogbo-ogbo ma ḅẹ tarị iyi aị ma-o kẹ ḅo ḅarị anga.

⁷ Anịjụ mie ọ́ KỊNỊNYANAḄỌ ọmịna Tamụnọ ḅe tọrọkọ fịye fị tẹ ḍereku ḅarịye, ọmịnị awarị suku na, ọ́ mịẹarị tẹ KỊNỊNYANAḄỌ ọmịna Tamụnọ ḅe kẹ ó boma aị mamgba ḅụ.

⁸ Ọ́ wẹrịtẹ ọrụḅọ-ọrụḅọ mḅọ tọrụ kura ḅara tẹ mịmgba wa mịẹarị aị mamgba mịẹ ma.

⁹ Kẹ gotẹ ọkọ ḅẹẹarị, amụ ó ḅo ịnyọsara mẹ na, sime anga mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị anga mẹ na la-a.

¹⁰ Kụma ọ́ Jodanị mẹ saḅa-ḅọrọ tẹ ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị sime ḅẹ ama mẹ ḅụ sime, tẹ ori ọmịnị ikelema-koro wararị ọmịnị na fịya-a apụ mamgba ḅụ ịnyọsara kẹ ọ́ pịrị, tẹ ọ́ kpaịnma sime sakị,

¹¹ anịtẹrẹmẹ anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ tẹ mịẹtẹ ori ẹrẹ anịjụ sime ḅẹ anga mẹ, anịanga mẹ tẹ ọmịnị à tọn ọ́ pịrị aị mamgba: ọmịna dọkịma agbamịẹ-aị na, ọmịna agba ma na, ọmịna nyana-oyi-ḅụụ-gberie mẹ na, agba tẹ ọ́ mịẹ ḅẹ aị na, ịlọ tẹ ó minini KỊNỊNYANAḄỌ ḅe pịrị tẹ suma ḅẹ aị mamgba na kẹ ḅo ḅẹ anga mẹ.

¹² Anịsakị ọ́ KỊNỊNYANAḄỌ ọmịna Tamụnọ ḅe tọrọkọ ḍereku ḅa, ọmịnị na, ọmịna owiapụ-awọmẹ na, ọmịna eremịna awọmẹ na, ọmịna fịrịmẹnjị-owiapụ na, ọmịna fịrịmẹnjị-ereme na, ọmịna ama ma ḅio simearị Livayị furo-ḅẹ-apụ ma na ini ọmịnị na gbọrụ ḍiekiri, anịanịa sime anga sọ nyana-a ḅẹ sakị.

¹³ Ọmịnị ọmịna aḅụụ ẹbị mịnẹ ọ́ ḅẹẹ-anga ḅẹẹ-anga tẹ ọmịnị ẹrị anga, ẹrị anga ḅụ ọmịna dọkịma-agba ma mịẹ-a.

¹⁴ Kụma anịanga mẹ tẹ KỊNỊNYANAḄỌ ḅe ọmịna afuro ma ḅẹ gbọrụ furo ḅio ḅụ sẹlẹ-ọkị anga mẹ ḅụ, anịjụ mie ọmịnị ọmịna dọkịma-agba ma mịẹ ḅarịye, anịsakị anịjụ mie ọmịnị à tọn ọ́ pịrịarị aị mamgba mịẹ ḅarị ye.

¹⁵ Anị sime-ḅara, sime-ḅara ọmịnị inetẹ ọmịna ama ma ḅio ó ḅii ḅara, ḅii ḅara kẹ nama ḅaa-ḅaa tẹ meni pẹị ḅa, boma mẹ tẹ KỊNỊNYANAḄỌ ọmịna Tamụnọ ḅe kẹ wẹrịtẹ ọ́ pịrị tẹ ḅara; ḅụụ fịafịama-a apụ na, ḅụụ fịafịama apụ na inetẹ anị ḅụ nama pẹị ḅa, ḍuu ḅe na, ḅụọ ḅụ okuro sụa nama ḅe na pẹị-pẹị ḅara mẹ.

¹⁶ Ọmbie mẹ kịngẹ mie ọ́ pẹị ḅịa ye; minji sara nguma ḅara.

¹⁷ Ọmịna ama ma ḅio, ọmịnị ọmịna nyana-oyi-ḅụụ-gberie mẹ fị ma, anịanịa anị ḅuu, anịanịa taḅa, anịanịa pẹị; ọmịna sịnmgbọlị ḅụ-o, ọmịna iru ḅụ-o, ọmịna pulo ḅụ-o, ọmịna anama ogbo ḅụ furo finji anama ma-o, ọmịna anana na oḅori na ogbo ḅụụ-o, ḅẹẹ ịlọ ḅẹẹ ịlọ tẹ ó minini tẹ sunmarị aị ma ḅẹ agba ma-o, kuroma ḅụ ḅo mịẹ agba-o, anịanịa ọ́ mịẹ agba mịẹ agba sọ.

¹⁸ Kụma KỊNỊNYANAḄỌ ọmịna Tamụnọ ḅe tọrọkọ mie ọ́ fị ḅarịye anịanga mẹ tẹ KỊNỊNYANAḄỌ ọmịna Tamụnọ ḅe sẹlẹ-ọkị ḅarị anga mẹ ḅụ, ọmịnị na, ọmịna owiapụ-awọmẹ na, ọmịna eremịna-awọmẹ na, ọmịna fịrịmẹnjị-owiapụ na, ọmịna fịrịmẹnjị-ereme na, Livayị furo-ḅẹ-apụ tẹ ọmịna ama ma ḅio sime apụ ma na; anịsakị ọ́ KỊNỊNYANAḄỌ ọmịna Tamụnọ ḅe Tọrọkọ ḍereku ḅa ọ́ nyana tẹ mịẹ ye, mịẹ ye mamgba ḅụ.

¹⁹ Ọmịnị ọmịna aḅụụ ẹbị mịnẹ ọmịnị ọmịna ama ḅio simearị sakị goyegoye ó Livayị furo-ḅẹ-apụ ma sịkị-a.

²⁰ KỊNỊNYANAḄỌ ọmịna ye-yọ mẹ mịẹ ḍụḅama sakị, ọ́ nama pẹị ḅẹ ḅiiarị ẹrẹsị ọ́ ḅẹẹm: à nama pẹị ḅa ḅẹẹ kụma, ọmịnị inetẹ ó ḅii ḅara, ḅii ḅara kẹ nama pẹị ḅa.

²¹ KỊNỊNYANAḄỌ ọmịna Tamụnọ ḅe anịanga mẹ tẹ ọ̀ sẹlẹ-ọkị tẹ ori ẹrẹ kẹ sụa ḅẹ anga mẹ ọmịna aḅụụ ḅụ ala ḅaka-ḅaka, anịrẹ ọmịnị inetẹ ọmịna nama ogbo, anịanịa ọmịna anana na oḅori na ogbo tẹ KỊNỊNYANAḄỌ ḅe kẹ ọ́ pịrị tẹ aị ḅụ. À wẹrịtẹ tọn ọ́ pịrị tẹ ḅara, ọmịna ama ma ḅio ó ḅii ḅara, ḅii ḅara kẹ ḅẹ ye ḅẹ ye ḅaa tẹ pẹị lama ḅa.

²² Ḍuu anịanịa ḅụọ ḅụ okuro sụa nama pẹị ḅara pembema ḅara, mie ọmịnị anị ḅẹ nama pẹị ḅarị ḅara, ḅụụ mịẹ fịafịama-a ḅọ-o, fịafịa ḅọ-o inetẹ anị ḅẹ nama pẹị ḅa.

²³ Ọ́ nimi lama ḅarịye anie ọmịnị ọmbie mẹ pẹị-a; kẹ gotẹ ọkọ ḅẹẹarị, ọmbie mẹ anie ḍumo mẹ, anịsakị ó ḍumo mẹ na, meni mẹ na pẹị gboloma ma.

²⁴ Ọmịnị anị pẹị ma, ó minji sara nguma ḅara kẹ anị nguma ḅa kiri mẹ ḅio.

²⁵ Ọmịnị anị pẹị ma; mịẹtẹ ye mamgba ọmịnị na iḅiọkụ sime ma mu, tẹ ọ́ ḅọrọtẹ so sakị ye ọmịna awọmẹ na iḅiọkụ sime ma mu ḅẹ ḅara, ọ́ KỊNỊNYANAḄỌ ḅe ḍiki-tọrụ ḅụ kuraye mịẹ sakị goyegoye.

²⁶ Kụma fịafịa aị ma tẹ ọmịnị ọkị-ḅo ḅẹ aị ma na, ọ́ kẹ ịlọ suma agba mịẹ ḅẹ aị ma na, ọmịnị arị ọkị kẹ anịanga mẹ tẹ KỊNỊNYANAḄỌ ḅe sẹlẹ-ọkị ḅẹ anga mẹ mu ḅa,

²⁷ tẹ meni mẹ na, ọmbie mẹ na kẹ ọmịna dọkịma agba mịẹ ḅa KỊNỊNYANAḄỌ ọmịna Tamụnọ ḅe agbamịẹ-anga mẹ ọgọnọ; ọmịna agba ma ḅẹ ọmbie mẹ ọmịnị anị kẹ KỊNỊNYANAḄỌ ọmịna Tamụnọ ḅe agbamịẹ-anga mẹ ọgọnọ sara ḅa, kụma meni mẹ ọmịnị inetẹ pẹị ḅa.

²⁸ Ọ́ ḅụụ ẹbị-bịtẹ mịna ẹkwẹn mamgba tẹ à kọn tẹ tọn ọ́ pịrị aị ma kẹ elekima sụa, mịẹtẹ anị ọmịnị na iḅiọkụ sime ma mu gbamaso ḅẹ ḅara, ọ́ KỊNỊNYANAḄỌ ọmịna Tamụnọ ḅe ḍiki-tọrụ ḅụ iḅiye na, kuraye na mịẹ sakị goyegoye.

Sunsin Ḅara Kẹ Tẹmẹ Ye Pịrị Ḅeri nụnụ Ẹkwẹn

²⁹ KỊNỊNYANAḄỌ ọmịna Tamụnọ ḅe ọmịna tọrọkọ pẹlẹ sin opu asịẹ ma, inima tẹ ó mu ḅara ḅụ ịn nyana aị ọkị ḅẹ muarị apụ ma, tẹ ọmịnị ịn nyana aị ma ọkị nyana tẹ ịna ama ma ḅio anga sakị,

³⁰ ọ́ ḅụụ ẹbị, mịẹtẹ ini ọmịna tọrọkọ ịn ḅaa tẹrẹmẹ ini ọ́ tuu koroma tẹ ọmịnị ịn ḍukamẹnjị ma, anieḅụ ịna oru-atamụnọ ma gboloma ye gbela: Ndẹẹ mịna opu asịẹ ma fịrịmẹnjị ịna oru-atamụnọ ma pịrịarị ḅara, mịẹtẹ yẹrị sọ ọkọ mịẹ ḅẹ ḅara?

³¹ Ọmịnị ọkọ kẹ sunsin KỊNỊNYANAḄỌ ọmịna Tamụnọ ḅe pịrị ma, kẹ gotẹ ọkọ ḅẹẹarị, tọn-tọnye tẹ KỊNỊNYANAḄỌ ḅe ḍiki-ḅioḅuarị ye goyegoye ịn mịẹ ịna oru-atamụnọ ma pịrị tẹ; kẹ gotẹ ọkọ ḅẹẹarị, ịna owiapụ-awọmẹ na, ịna eremịna-awọmẹ na sọ ịn fịnị ḅio dọkịma ịna oru-atamụnọ ma pịrị tẹ.

³² À tọn ọ́ pịrị ye goyegoye ọ́ ḅụụ ẹbị-ẹbị tẹ anị mịẹ ḅa; ó ye kẹ anị ḅụ sụa, anịanịa ye sin ma.