Ditẹrọnọmị 11 - FỊAFỊA BAỊBỤLỤ

KỊNỊNYANAḄỌ Ḅe Opu

¹ Ọmịnị anịẹrẹsị KỊNỊNYANAḄỌ ọmịna Tamụnọ ḅe ḅẹlẹma tẹ ọ̀ tọn ọ́ pịrị aị ma na, ori oloko ma tẹ kẹẹ wararị aị ma na, kụrọ ọ̀ ḅara emi ḅara kẹ ọ̀ sụa oloko ma na, ori Oloko ma na koko tẹ arị mịẹ ḅa.

² Anịsakị ọ́ mịmgba mẹ kẹ kuroma ḅụ suu (arị ẹkwẹn ọmịna awọmẹ tẹ amụ anị nimi, anịanịa anị ẹrị-a apụ ma pịrị-a ḅẹ sakị) ọ́ KỊNỊNYANAḄỌ ọmịna Tamụnọ ḅe ḅioḅẹngbọ na, ye-mịẹ-ḅara na datụkụma mẹ na, ọ̀ ḍụḅa la ḅara na, ori opu na, ọ̀ kụrọ nyanatẹ opu ḅara mẹ na, ọ̀ sụụn-paka tẹ ḅara-kọngọ mẹ na,

³ ori elekima ma na, ori amịẹaị ma tẹ Ijiputi ḅụ ọ̀ kẹ Fero, Ijiputi ḅẹ amadaḅọ ḅe na, ori ama mẹmgba na mịẹ aị ma;

⁴ na ọ̀ kẹ Ijiputi ḅẹ ọmụ-ogbo mẹ, ịna asụ na, ịna kirimẹnjị-ọmụarụ na mịẹ ye mẹ; ọ̀ wẹrịtẹ mịẹtẹ Awụ Tọrụ mẹ ḅẹ minji mẹ ini ó ḍukarị ogbo, seri ḅo in gbaịn ḅara mẹ na, KỊNỊNYANAḄỌ ḅe wẹrịtẹ ịn ḅaa guluguluma ḅo mịmgba la ḅara mẹ na

⁵ ịkpa mẹ ḅio ọ̀ kẹ ọ́ mịẹ nwenii ó ḅo mịanga la aị ma na;

⁶ ọ̀ kẹ Detanị na, Abiramu na, Rubẹnị owiḅọtụḅọ Ẹlịyabụ owiapụ-awọmẹ ma mịẹ ye mẹ, kiri mẹ amịna ḅịḅị finjitẹ ini na, ịna awarị kpo-kpo ma na, ịna akpụrụ awarị ma na, ḍumo wararị ye goyegoye tẹ Izirẹlị mẹmgba ogboku ḅụ ịn ḍukamẹnjị ye goyegoye mẹnị ọkị ḅara.

⁷ Kẹ gotẹ ọkọ ḅẹẹarị, ọmịna atọrụngbọ KỊNỊNYANAḄỌ ḅe gburo-gburotẹ kọrịnama mẹmgba tẹ ọ̀ kọrị ye mẹ ẹrị tẹ.

Ọ̀ Kẹ Ịn Karịma Ama Mẹ Ḅẹ Aboma Ma

⁸ Ọmịnị anịẹrẹsị oloko mamgba tẹ mịmgba à tọn ọ́ pịrị aị ma koko ḅa, mịẹtẹ ọmịnị ịnyọ nyana, tẹ sọ-mu tẹ ama mẹ tẹ ọ́ saḅa-ḅọrọ tẹ nyana ḅẹ muarị ama mẹ ọkị nyana ḅẹ ḅara.

⁹ Mịẹtẹ ama mẹ tẹ KỊNỊNYANAḄỌ ḅe ye karị ḅara ḅụ kẹ ọmịna aḍapụ ma na, ịna aḅụụ paka-ḅo apụ ma na pịrị ḅẹ ama mẹ ḅio ó ḍumo alama ḅẹ ḅara, anị ḅụụ-ḅẹlẹmatẹ iḅiọkụma fịye so-pakamarị amakiri mẹ ḅio.

¹⁰ Kẹ gotẹ ọkọ ḅẹẹarị, ama mẹ tẹ ọmịnị ọkị nyana ḅẹ muarị ama mẹ anị Ijiputi ḅẹ ama mẹ tẹ ó sime tẹ ḅo ama mẹ sime-ḅara sime-a, anịanga mẹ tẹ ọ́ sịnmgbọlị, ọgụ ḍụọ pembe ye ḍiḅi tẹ ḅụọ kẹ mẹnjị-mẹnjị tẹ minji kẹ arị suku sara sara ye mẹ;

¹¹ kụma ama mẹ tẹ ọ́ saḅa-ḅọrọ tẹ ọkị nyana ḅẹ muarị ama mẹ anie tụndụ na, tụndụ ogboku na tẹ So-ḅio ḅẹ eene-minji sararị anga.

¹² Ama tẹ KỊNỊNYANAḄỌ ọmịna Tamụnọ ḅe ḍikiḍikiarị ama; KỊNỊNYANAḄỌ ọmịna Tamụnọ ḅe atọrụngbọ sakị mamgba anị ọgọnọ emi, kụra mẹ Suku-saakị ḅụ ọkị mu kụra mẹ ḅẹ kunoma la.

¹³ Anịsakị ọ́ nwẹnị KỊNỊNYANAḄỌ ọmịna Tamụnọ ḅe ḅẹlẹma, tẹ ọmịna ḅioḅẹngbọ mẹmgba na ọmịna tẹmẹ mẹmgba na kẹ fịrịmẹnjị ọ̀ pịrị ḅẹẹm tẹ ì oloko ma tẹ mịmgba à tọn ọ́ pịrị aị ma poki poki,

¹⁴ ori ọmịna ama mẹ gotẹ eene koroma ḅa anị ḅẹ sakị mẹ ḅụ, ayaya koro eene mẹ na, ọḅụkọn koro eene mẹ na, mịẹtẹ ọmịnị ọmịna sịnmgbọlị na, ọmịna iru na, ọmịna pulo na kobiri suu ḅẹ ḅara.

¹⁵ Anịsakị ọ̀ pịkị ọmịna piri mẹ ḅio osuka pakama ọmịna opu anama na pịrị ḅa, tẹ ó fịye fị ọmịna furo ḅinma ḅa.

¹⁶ Ọmịnị ọmịna aḅụụ ẹbị anieofori ịn ḅofa oḅori kẹ ọmịna ḅioḅẹngbọ sịn, tẹ ọ́ tọrụ pịkị akaka da tẹ fịrịmẹnjị oru-atamụnọ pịrị, tẹ sunsin ịn pịrị,

¹⁷ tẹ KỊNỊNYANAḄỌ ḅe ịganị mẹ kẹngẹma ọmịna ọgọnọ sara, tẹ ò so ḅọkọ mẹ ịkasị ọ́ pịrị tẹ eene ḅarị koro-a tẹ kiri mẹ ḅarị fịye pakama-a so, tẹ iḅi ama mẹ tẹ KỊNỊNYANAḄỌ ḅe kẹ ọ́ pịrị ama mẹ ḅụ ó ḅofa fọnya fịị fa fama.

¹⁸ Ọmịnị ọkọẹrẹsị mịna ị̀ ẹkwẹn-aḅịḅị ma kẹ ọmịna ḅioḅẹngbọ na, ọmịna tẹmẹ ḅio na ḅụ wẹrịị, anịsakị ọmịnị arị kẹ elekima sọma ọmịna ḅara ḅụ fịna wẹrị ḅa, tẹ arị ọmịna tọrụ-ogbo emi aị sime-ḅara sime ḅa.

¹⁹ Anịsakị ọmịnị arị kẹ ọmịna awọmẹ toluma ḅa, tẹ arị gboloma ẹkwẹn kọn ḅa ọmịnị ọmịna warị ḅio lẹgị-sime wararị sakị na, ọmịnị ọmịna etela ḅụ mẹnjịarị sakị na ọ́ ḅọlọlọ sakị na, ọ́ saakị sakị na ḅụ.

²⁰ Ọmịnị arị kẹ ọmịna warị ḅụ ḅọkọ ḅẹ maa sịn ma na, ọmịna ogigo-aḅọkọ ma na ḅụ kẹẹ ḅa.

²¹ Mịẹtẹ ọmịna ene ma na, ọmịna awọmẹ ene ma na sun ḅẹ ḅara ama mẹ tẹ KỊNỊNYANAḄỌ ḅe ye karị ḅara ḅụ kẹ ọmịna aḍapụ ma pịrị ḅẹ minini ama mẹ so ma kiri mẹ ḅẹ ọgọnọ-jụ ḅụ emi sakị goyegoye.

²² Kẹ gotẹ ọkọ ḅẹẹarị, ọmịnị ma nwẹnị ọmịna aḅụụ ẹbị ḅa mịna oloko mamgba tẹ à tọn ọ́ pịrịm ọ́ mịẹ ḅẹẹ aị ma mịẹ ḅụ, KỊNỊNYANAḄỌ ọmịna Tamụnọ ḅe ḅẹlẹmarị, ori etela mamgba ḍukamẹnjịarị, tẹ ọ̀ fịnamarị ḅẹḅẹ,

²³ anịrẹ KỊNỊNYANAḄỌ ḅe ọmịna tọrọkọ mịna opu asịẹ mamgba dee pakama fama ḅa, anịsakị ọ́ ḍụḅa ọ́ nẹngị ịnyọ nyana ọ́ nẹngị-nẹngịtẹ opu asịẹ ḅara ḅụ ịn nyana aị ọkị ḅa.

²⁴ Ḅẹ yọ, ḅẹ yọ tẹ ọmịna aḅụọ-kuḅu sịẹtẹ mẹnjị-ḅọrọ-anga goyegoye sime ọ́ pịrị ḅa; ọmịna ye-yọ ịkpa mẹ ḅụ ọkị mu Lẹbanọnị la ḅa, pịkị Tọrụ mẹ, Yuferetisi Tọrụ mẹ ḅụ ọkị mu ịrụa-ideriarị-anga ḅẹ opu tọrụ mẹ la ḅa.

²⁵ Inetẹ ọmịna kuḅu daasịẹ ḅẹ gbọrụ owiḅọ sọ ofori KỊNỊNYANAḄỌ ọmịna Tamụnọ ḅe ó ḍiki-ḅalafa mẹ na, ọmịna aḅụụ opu ḅalafa nyana mẹ na kẹ ọ́ mẹnjị-ḅọrọ ḅarị ama mamgba ọgọnọ gbana ḅa ọ̀ wẹrịtẹ kẹ ọ́ karịma ḅara.

²⁶ Ḍikii, mịmgba ḅụ à boma na, wori-nume na kẹ ọmịna tọrọkọ koromarị:

²⁷ boma mẹ anie, ọ́ KỊNỊNYANAḄỌ ọmịna Tamụnọ ḅe oloko ma tẹ mịmgba à tọn ọ́ pịrị aị ma poki poki,

²⁸ anịsakị wori-nume mẹ anie ọ́ KỊNỊNYANAḄỌ ọmịna Tamụnọ ḅe oloko ma poki-a, kụma etela mẹ tẹ à mịmgba tọn ọ́ pịrị ye mẹ ḅụ tọrụ pịkị akaka da, tẹ mu oru-atamụnọ tẹ amụ ó nimi-a aị ma ḍukamẹnjị-mẹnjị.

²⁹ Anịsakị KỊNỊNYANAḄỌ ọmịna Tamụnọ ḅe ọmịnị ọkị-ḅo ama mẹ tẹ ọ́ sọ tẹ anị ọkị nyana ḅẹ muarị ama mẹ ḅio suu sakị, ó boma gbo koromaa, Gẹrịzimu Tụndụ ọgọnọ ḅụ, tẹ wori-nume gbo koromaa, Ẹbalị Tụndụ ọgọnọ ḅụ.

³⁰ Mịna ma Tụndụ ma, Jodanị mẹ saḅa-koro ḅẹ ọgọnọ-jụ tẹ Kenanị ḅẹ apụ ma tẹ ịkpa ḅio ḅẹ ele mẹ ḅio angarị apụ ma ama mẹ ḅio emi. Arị ịrụa-ideriarị-anga dama-mu tẹ More ḅẹ oku nwẹn-sịn opu sịn mẹ akaka, anie Giligalị ama kpeki anga mẹ ḅụ emi.

³¹ Kẹ gotẹ ọkọ ḅẹẹarị, sọ-mu ama mẹ tẹ KỊNỊNYANAḄỌ ọmịna Tamụnọ ḅe kẹ ọ́ pịrị ama mẹ ọkị nyana mẹ ọ́ Jodanị mẹ saḅa-ḅọrọ ḅa; tẹ ọmịnị anị nyana, tẹ anị ḅio anga sakị,

³² ọmịnị ọmịna aḅụụ ẹbị ḅa, tẹ kẹẹ wararị oloko ma na, kụrọ ḅara-ḅio sime apụ sụa oloko ma na, tẹ mịmgba à kẹ ọmịna tọrọkọ koroma aị mamgba mịẹ ḅa.