Ditẹrọnọmị 10 - FỊAFỊA BAỊBỤLỤ

Mozizi Pịkị Siin Oloko Ma Ọkịm

¹ Anị sakị mẹ ḅụ KỊNỊNYANAḄỌ ḅe ị̀ ḅẹẹm: Tarị maa aḍụḅarị ma sime-ḅara sime maa aḍụḅarị pẹlẹ pakama-ḅo, tẹ tụndụ mẹ ọgọnọ kpọlị iwo ị̀ ḍọkụma-ḅo, tẹ ḍụḅọ kẹ gbọrụ igbe ịkasị.

² Anịsakị arị ẹkwẹn-aḅịḅị ma tẹ tarị aḍụḅarị tẹ ị́ ḅaa aị ma ọgọnọ kẹẹ wararị ẹkwẹn-aḅịḅị ma kẹ kẹẹ tẹ ị́ kẹ ḍụḅọ igbe mẹ ḅio sụa ḅa.

³ Anieḅụ arị ịn kẹ akasiya sịn, sịn ḍụḅọ kẹ gbọrụ igbe ịkasịm, tẹ tarị aị ma sime-ḅara sime ye kẹẹ maa aḍụḅarị pẹlẹ pakama-ḅom, tẹ ị̀ ḅara ḅio à maa aḍụḅarị ma ọlọ tẹ kẹ tụndụ mẹ kpọlị iwom.

⁴ Tẹ ọ̀ wẹrịtẹ tarị sakị ḅụ kẹẹ ḅara kẹ Oyi Oloko ma kẹẹm ye kẹẹ aḍụḅarị ma ọgọnọ, arị aị ma tẹ KỊNỊNYANAḄỌ ḅe tụndụ mẹ ọgọnọ kọrị fịnị mẹ ogboku ḅụ ẹkwẹn ọ́ pịrị tẹ aị ma kobiri ene mẹ ḅụ; tẹ KỊNỊNYANAḄỌ ḅe arị kẹ ị̀ pịrịm.

⁵ Anịtẹso à vuunma pịkịm, tẹ tụndụ mẹ ọgọnọ koro-ḅom, tẹ ye kẹẹ aḍụḅarị ma kẹ igbe mẹ tẹ arị ịkasị ye mẹ ḅio sụam; anịsakị anịjụ arị emi KỊNỊNYANAḄỌ ḅe wẹrịtẹ tọn ị̀ pịrị ḅara ḅụ.

⁶ (Izirẹlịapụ ma Berọtị-bene-jakanị ḅụ igoni dọkụ mu Mosera lam. Anịjụ Erọnị fịịm, tẹ anịjụ ini ò ḍiḅim; tẹ ori owiḅọtụḅọ Ẹlịyeza agbamịẹ fịrị mẹ mẹnjịm ò kiri ḅụ.

⁷ Anịjụ ḅụ ini igoni dọkụ ḅo Gudugoda lam, tẹ Gudugoda ḅụ ḅo Jotibata minji akuroro emi ama lam.

⁸ Anị sakị ḅụ mie KỊNỊNYANAḄỌ ḅe Livayị furo mẹ sikima KỊNỊNYANAḄỌ ḅe Ọḅọkụ-Igbe mẹ dogi pịrị ye, KỊNỊNYANAḄỌ ḅe tọrọkọ sịẹsime tẹ fịrịmẹnjị ọ̀ pịrị, tẹ ori ẹrẹ ḅụ ye boma ḅo mịmgba lam.

⁹ Anịẹrẹsị Livayị ori owiapụ-amịnapụ ma na gbọrụ ḍiekiri, anịanịa sime-anga sọ nyana-a; KỊNỊNYANAḄỌ ḅe anie ò ḍiekiri, KỊNỊNYANAḄỌ ọmịna Tamụnọ ḅe wẹrịtẹ ọ̀ ḅẹẹ ḅara.)

¹⁰ À tụndụ mẹ ọgọnọ eneḅaka amesi na ḍin amesi na simem tarị sakị mẹ ḅụ à sime la ḅara pembe ḅara, tẹ KỊNỊNYANAḄỌ ḅe anị sakị mẹ ḅụ sọ ị̀ naam; KỊNỊNYANAḄỌ ḅe ḅarị ọ́ ḅaa ḅẹ ḅii-a.

¹¹ KỊNỊNYANAḄỌ ḅe nwẹnị ị̀ ḅẹẹ: Saakị! tẹ ọmịna igoni mẹ dọkụụ, tomi ma kẹ sịḅịdaḅọ ḅara ḅụ, mịẹtẹ ini ama mẹ tẹ à kẹ ịna aḍapụ ma pịrị ḅẹ ye karị ḅara kẹ minini ye mẹ ịn nwẹn sọ-mu tẹ ama mẹ nyana ḅẹ ḅara.

Tamụnọ Ḅii Ye

¹² Anịsakị Izirẹlị, mịọkụ KỊNỊNYANAḄỌ ọmịna Tamụnọ ḅe ọmịna aḅara tiye ḅii? KỊNỊNYANAḄỌ ọmịna Tamụnọ ḅe ḍiki-ḅalafaa, ori etela mamgba ḅụ mẹnjịị, ọ̀ ḅẹlẹmaa, ọmịna ḅioḅẹngbọ mẹmgba na, ọmịna tẹmẹ mẹmgba na, kẹ fịrịmẹnjị ọ̀ pịrịị,

¹³ tẹ KỊNỊNYANAḄỌ ḅe Oloko ma na, kẹẹ wararị oloko ma na tẹ ọmịna iḅi gotẹ mịmgba à tọn ọ́ pịrị aị ma kokoo.

¹⁴ Ḍikii, geletẹịn so ma na kiri mẹ na anị ḅio simearị aị mamgba na sime KỊNỊNYANAḄỌ ọmịna Tamụnọ ḅe pịrịm.

¹⁵ Anịsọ KỊNỊNYANAḄỌ ḅe ḅẹlẹma ḅụ ò ḅioḅẹngbọ kẹ ọmịna aḍapụ ma ọgọnọ gbanam, tẹ ịn ḅọrọ tẹso, ịna aḅụụ paka-ḅo apụ ma sẹlẹ-ọkị tomi-kụlọkụlọ mamgba nẹngịmam anị wẹrịtẹ mịmgba ḅụ sime-ḅara.

¹⁶ Anịẹrẹsị ọmịnị ọmịna ḅioḅẹngbọ ḅẹ tarị ḅụụ mẹ sin tẹ ḅarị jen-maaịn kẹ kịnị na kura-a ḅara sime ma.

¹⁷ Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe, tẹ tẹmẹ-naịn-naịnma Tamụnọ ḅe aḍụa nyana-a, ọ̀ pịkị ọḅụ-fị nyana-a.

¹⁸ Ọ̀ karakara ḅẹrẹ kọn ḍaḅọ ofori tụḅọ ḅe na, diḅọ-fịtẹ-ẹrẹḅọ ma na pịrịarị, tẹ jen sịẹ ḅụ ḅo igoniḅọ ḅe ḅẹlẹmam, fịye na, kapa na kẹ ọ̀ pịrị ḅụ.

¹⁹ Ọmịnị anịẹrẹsị jen sịẹ ḅụ ḅo igoniḅọ ḅẹlẹmaa; kẹ gotẹ ọkọ ḅẹẹarị, ọmịnị sọ Ijiputi ḅẹ ama mẹ ḅio igoniapụ sọ simem.

²⁰ Ọ́ KỊNỊNYANAḄỌ ọmịna Tamụnọ ḅe ḍiki ḅalafa ḅa, ọ́ fịrịmẹnjị ọ̀ pịrị tẹ ọ̀ fịnama ḅa anịsakị ori ẹrẹ ḅụ mie ọ́ ḅụụ pikima ḅarịye.

²¹ Ori mie ọ́ kẹ tokini ḅarịye, ori anie ọmịna Tamụnọ, tẹ mịna gburo-gburotẹ, tẹmẹ-naịn-naịnma aị ma tẹ ọmịna atọrụngbọ ma ẹrị tẹ aị ma mịẹ ḅọ.

²² Ọmịna aḍapụ ma ideri Ijiputi mum, ini kịnị atesi oyi finji; anịsakị mịọkụ KỊNỊNYANAḄỌ ọmịna Tamụnọ ḅe tomi ogbo ḅụ ọ́ kẹ So-tọrụ ḅẹ alolia ma ḅin ḅara kẹ kama sara tẹ.