Devidi-Anume 99 - FỊAFỊA BAỊBỤLỤTamụnọ Ḅaka Amadaḅọ Ḅe 1 KỊNỊNYANAḄỌ ḅe anie amadaḅọọ; tomi ma oju sẹkịarị. Ori tẹmẹ tẹ pamba-sụa aị ma ọgọnọ-jụ ori amịna emine ọgọnọ lẹgị wararị tẹ kiri mẹ jikearị. 2 KỊNỊNYANAḄỌ ḅe Zayọnị ḅụ ori opu kụrọ nyanam; tomikiri ḅẹ asịẹ mamgba sịḅịdaḅọ, ọ̀ ḅakam. 3 Ḅẹḅọ-ḅẹḅọ ori opu ḅaka ẹrẹ mẹ tokini ḅa. Fịafịa anie ori! 4 Opu kụrọ nyana Amadaḅọ, í kuraye ḅẹlẹmarị; ị́ tọn kuroma tẹ Izirẹlị ḅụ jụmọ-jụmọ inoma paka ma; ị́ karakara mịẹ na kuraye mịẹ na oloko tọn wa pịrị tẹẹ. 5 KỊNỊNYANAḄỌ wamịna Tamụnọ ḅe tokini; sunsin ọ̀ pịrị ori emine tọrọkọ ḅụ! Fịafịa anie ori! 6 Mozizi na Erọnị na anie ori agbamịẹapụ, tẹ Samụwẹlị anie ọ̀ tẹkẹ, tẹkẹ ḅọ; ịn KỊNỊNYANAḄỌ ḅe sịn tẹ ori ịna ḅịḅị-ọkịyam. 7 Sịẹsime sime oḅuto ḅio ò sime tẹ ẹkwẹn ịn pịrịm; ịn nwẹnị ori oloko ma na ọ̀ tọn ịn pịrị-aị ma na poki tẹ mị. 8 Yei KỊNỊNYANAḄỌ, ị̀ Tamụnọ, ị́ ị́ atomi ma ḅịḅị ọkị-ọkịm; ị́ kẹ in ḍiem mịnẹ si-wẹrịso, so Tamụnọ, karakaraye ị́ ịna asi gotẹ in fomu, fomu ḅẹsọ. 9 Ọ̀ KỊNỊNYANAḄỌ wamịna Tamụnọ ḅe tokini, tẹ ọ̀ fịafịa tụndụ akaka ḅụ sunsin ọ̀ pịrị! KỊNỊNYANAḄỌ wamịna Tamụnọ ḅe fịafịaḅọ. |
(C) The Bible Society of Nigeria
Bible Society of Nigeria