Devidi-Anume 98 - FỊAFỊA BAỊBỤLỤ

Tamụnọ Anie Tomikiri Mẹ Ḅẹ Ḅẹrẹtọnḅọ

¹ Ịwọ nume-su KỊNỊNYANAḄỌ ḅe pịrịị; ọ̀ ḅụụ-buama-aị mịẹ tẹẹ! Ọ̀ kụrọ na ọ̀ fịafịa ịnyọ na ḅụ ọ̀ ḅarana ọmụ mẹ gbin pẹlẹ tẹ owu-ḅara-iḅi ḅụ.

² KỊNỊNYANAḄỌ ḅe owu ọ̀ ḅara iḅi ye mẹ ḍuko-pakamam; ọ̀ mịẹ tẹ Tomikiri ḅẹ asịẹ ma ọ̀ kịnị ḅọrọma kụrọ mẹ nimi tẹ.

³ Ò minini Izirẹlịapụ ma pịrịye mẹ ọ̀ mịẹm amịna ḅịḅị ḍima-a na kuno-a ḅẹlẹma nyana ịn pịrị na ḅụ. Anga, anga ḅụ simearị apụ mamgba owu wamịna Tamụnọ ḅe ḅara iḅi ye mẹ ẹrị tẹ.

⁴ Ọmịnị bebe tomikiri mẹ ḅẹ apụ ó nume-su KỊNỊNYANAḄỌ ḅe tokini ḍereku ḅụ; ó nume su-su tẹ pịkị ḍereku oloku kọn-kọn tẹ kẹ ò tokinii!

⁵ Ó nume su-su tẹ kẹ KỊNỊNYANAḄỌ ḅe tokinii! Ọmịnị ọbọ ma kẹ nume farị!

⁶ Ọdụ ma na nama ịfalị ma na ofuro, tẹ oloku-oloku tẹ ḍereku KỊNỊNYANAḄỌ, wamịna Amadaḅọ ḅe pịrị.

⁷ Ị́yẹrị abajị, na tẹmẹ tẹ í ḅio simearị ye goyegoye na, ọ́ ḍụrụkụ; Ị́yẹrị kiri, na í ọgọnọ angarị aị mamgba na ó nume-suu!

⁸ Ọmịnị ọgọnọ-jụ ḅẹ atọrụ, ọ́ ḅara farịị; ọmịnị tụndụ amẹẹ, ó ḍereku kẹ nume-su gboloma KỊNỊNYANAḄỌ ḅe tọrọkọ,

⁹ ò tomikiri ḅẹrẹtọn ḅẹ ḅoarị ẹrẹsị. Ori inoma ofori ḅara na iḅi ḅara na kẹ ḅẹrẹtọn tomikiri ḅẹ atomi ma pịrị ḅa.