Devidi-Anume 97 - FỊAFỊA BAỊBỤLỤ

Tamụnọ Anie Ḅaka Ḅẹrẹtọnḅọ

¹ KỊNỊNYANAḄỌ ḅe anie amadaḅọọ! kiri, ḅioḅẹlẹẹ! Ọmịnị abajị ma ḅẹ asọ mamgba, ó ḍerekuu!

² Oḅuto na kanakana na ori ikelema-koro wararị; ọ̀ karakara mịẹ na aḍụa ofori ḅara na kẹ ḅẹrẹtọn-arị.

³ Fịnị ọ̀ tọrọkọ kọrị ma muarị tẹ si kẹ ọ̀ tọn tẹ ori ikelema wararị apụ ma dọkịmarị.

⁴ Ò so ḅalapụ-ḅalapụma tẹ kẹ tomikiri mẹ belemarị; kiri mẹ anị ẹrị tẹ jikearị.

⁵ Tụndụ ma kpootẹ agba kịka tẹ sanịarị KỊNỊNYANAḄỌ ḅe tọrọkọ, bebe tomikiri mẹ Nyanaḅọ ḅe tọrọkọ.

⁶ So ma ọ̀ karakara mịẹ mẹ ḍuko wasamarị, tẹ tomikiri ḅẹ asịẹ mamgba ori ebube ẹrịarị.

⁷ Sunsin oru-afụḅara pịrịarị-ḅọ pịrịarị-ḅọ ḅụụ-jịrị ḅa; papaa atamụnọ mamgba KỊNỊNYANAḄỌ ḅe tọrọkọ iḅoarị.

⁸ Yei KỊNỊNYANAḄỌ, Zayọnị ḅẹ apụ ma ḅioḅẹlẹarị, tẹ Juda ḅẹ opu ama ma ḍerekuarị ị́ aḅẹrẹkọn ma ẹrẹsị.

⁹ KỊNỊNYANAḄỌ, kụrọmamgba Nyanaḅọ, anie bebe tomikiri mẹ ḅẹ ḅẹrẹtọnḅọ; ị́ ḍụḅa oru-atamụnọ mamgba nẹngị lamam.

¹⁰ KỊNỊNYANAḄỌ ḅe siye ḍiki-ḅioḅuarị apụ ma ḅẹlẹmarị; ori ori atomi ma aḍumo gbaịn-arị; ò si-sịḅịḅio-sụapụ ma kụrọ aḅara-ḅio ịn pụkọ-pakamaḅoarị.

¹¹ Bele ḅịya karakaraye-mịẹapụ ma saramarị, tẹ ḅioḅẹlẹ iḅi atomi ma ḅụ ḅio emi.

¹² Ọmịnị karakara mịẹarị atomi mamgba ò ḅioḅẹlẹẹ KỊNỊNYANAḄỌ ḅe kọrị tẹ ye mẹ ẹrẹsị! Ọ́ fịafịa Tamụnọ ḅe kọrị tẹ ye mẹ kẹ ḅiokoromaa, tẹ ịmịẹtẹ kẹ ọ̀ ḅẹ.