Devidi-Anume 96 - FỊAFỊA BAỊBỤLỤ

Tamụnọ Anie Ḍụḅatẹịn Amadaḅọ

¹ Ọmịnị ịwọ nume-su KỊNỊNYANAḄỌ ḅe pịrịị! Ọmịnị tomikiri ḅẹ apụ mamgba, ó nume-su KỊNỊNYANAḄỌ ḅe pịrịị!

² Ó nume-su KỊNỊNYANAḄỌ ḅe pịrị tẹ ò tokinii! Ene-ḅaaene-ḅaaene ọmịnị ọ̀ wa ḅọrọma tẹ ye mẹ ḅẹ iḅi-oku mẹ ḍuko wasama.

³ Ọmịnị ori ebube opu mẹ ḍuko wasama sịẹ, sịẹ ma pịrị, ori opu kụrọ kọrịnama ma ḍuko tomi mamgba pịrị.

⁴ KỊNỊNYANAḄỌ ḅe ọ̀ ḍụḅam, tẹ opu ḅara kẹ ò tokini na-iḅim; ọ́ kụn kẹ ọ̀ pịrị gbẹẹ oru-atamụnọ mamgba nẹngịm.

⁵ Osi asịẹ ma ḅẹ atamụnọ mamgba papaa oru-afụḅara famam, kụma KỊNỊNYANAḄỌ ḅe So ma tẹmẹm.

⁶ Ebube na ḅaka na ori ikelema wararị; kụrọ na iḅi na ọ̀ Warị ḅin wararị.

⁷ Ọmịnị tomikiri ḅẹ atomi mamgba, ọ́ KỊNỊNYANAḄỌ ḅe tokinii; ọmịnị ori ebube na kụrọ na tokinii.

⁸ Ọ́ KỊNỊNYANAḄỌ ḅe ebube ẹrẹ mẹ tokinii; ọmịnị agbamịẹye kẹ ọ̀ Warị ḅoo.

⁹ Ngẹrị Fịafịa Ḅọ ḅe tolu-sịẹ sakị ọmịnị ọ̀ tọrọkọ iḅoo; ọmịnị tomikiri ḅẹ atomi mamgba, ọmịnị ọ̀ tọrọkọ ḅụ oju sẹkịị.

¹⁰ Ḍuko sịẹ-sịẹ mamgba pịrị, “KỊNỊNYANAḄỌ ḅe anie Amadaḅọ! Ò tomikiri mẹ sịẹma kụrọma wararị, tẹ anị inetẹ jike ḅịa ḅara; ọ̀ karakara ḅẹrẹ kọn tomi ma pịrị ḅa.”

¹¹ Ọmịnị kiri na So-tọrụ na, ó ḅioḅẹlẹẹ! Abajị ḍụrụkụụ, tẹmẹ tẹ í ḅio sime ye goyegoye sọ ḍụrụkụ.

¹² Ọmịnị fịaị ḍiḅi akiri, na ọmịna ḅio sime-ye sime-ye na, ó ḅioḅẹlẹẹ! piri-ḅio sime asịn ma oloku ḅa ḍereku ḅụ

¹³ KỊNỊNYANAḄỌ ḅe ḅo tomikiri ḅụ ḅẹrẹtọn sakị. Ori inoma ofori ḅara na iḅi ḅara na kẹ ḅẹrẹkọn tomikiri ḅẹ atomi mamgba pịrị ḅa.