Devidi-Anume 92 - FỊAFỊA BAỊBỤLỤ

Tokini Nume

¹ Yei KỊNỊNYANAḄỌ, ịmịẹtẹ kẹ ị́ ḅẹ mẹ kpọma iḅim, ị́ kụn gotẹ nume-su mẹ, Yei Geletẹịn Tamụnọ,

² í kuno-a ḅẹlẹma mẹ ḍuko wasama dede goyegoye, pịkị ḅioḅẹngbọ kẹ ị́ ḅụụ ḅụ gbana na-iḅim mẹ ḍin goyegoye,

³ ḍiki kẹ mịẹ nume farị aị na ọbọ kẹ farị ḅẹlẹ nume na ḅụ.

⁴ Yei KỊNỊNYANAḄỌ, í opu kụrọtẹ amịẹaị ma ì ḅioḅẹlẹmarị; ị́ mịẹ tẹ ye mẹ ẹrẹsị à nume su-su ḍerekuarị.

⁵ KỊNỊNYANAḄỌ, ị́ amịẹaị ma ḍụḅa la ḅara ḍiki! Ị́ akuroma ma pokolo la ḅara ḍiki!

⁶ Miemẹ oḅori tomḅọ inetẹ nimi ḅẹ ye-a; apantu inetẹ anị fiearị ye naa ḅịa;

⁷ si-sịḅịḅio-sụapụ ma osuka brebrema so-paka ḅara kẹ loloarị, kura-aye mịẹ apụ ma sọ inetẹ lolo ḅa, anịsọ ịn fịị gulugulu fama ḅa,

⁸ KỊNỊNYANAḄỌ, ḍụḅa tẹịn gbamasom ẹrẹsị.

⁹ Wa nimi wararị mịnẹ si kẹ ị́ tọn apụ fịị ḅa, tẹ si-sịḅịḅio-sụapụ mamgba owu pịkị ịna ḅara si ḅa.

¹⁰ Ị́ ị̀ mịẹ tẹ à piri-ḅio-ḅẹ pootẹ-nambulo kụrọ ḅara kụrọ tẹẹ; í ḅioḅẹlẹ kẹ ì boma tẹẹ.

¹¹ Si kẹ ị̀ tọn apụ ma owu ịna ḅara si tẹ mẹ àrị ẹrị tẹ à pịkị si-sịḅịḅio-sụapụ ma kọn-arị owu ma naa tẹ.

¹² Karakaraye-mịẹapụ ma eneme asịn berebere ḅara kẹ berebere ḅa; ịn Lẹbanọnị ḅẹ sida asịn ma kịka ḅa ịn so-pakarị ḅara ḅụ.

¹³ Ịn kịkarị ye KỊNỊNYANAḄỌ ḅe warị mẹ ḅio ḍiḅi asịn, anie wamịna Tamụnọ-warị mẹ ḅio sime tẹ bereberearị aị,

¹⁴ ini omongi tẹ sọ ịn paa mgbọlụ sụarị tẹ sakị mamgba kụrọ tẹ ịwọ-ịwọ-ịwọarị.

¹⁵ Miemẹ ḍiearị mịnẹ KỊNỊNYANAḄỌ ḅe ḅụ inoma ofori, mịnẹ ị̀ gbaịn-arị ḅọ ḅe ḅụ iri ye ofori.