Devidi-Anume 90 - FỊAFỊA BAỊBỤLỤ

INI KARAMA ḌIRI (Nume 90—106) Tamụnọ Na Tomḅọ Na Gboloma Aị

¹ Yei KỊNỊNYANAḄỌ, ị́yẹrị anie ḅụọ-fa-ḅụọ-paka ḅụ wamịna sime-yọ.

² Tẹrẹmẹ ị́ tụndụ ma tẹmẹ anịanịa mịẹ tẹ tomikiri mẹ paka-ḅo tẹ sime, ị́yẹrị sime gbamaso Tamụnọọ, tẹ ị́ Tamụnọ sọ nwenii gbamaso la ḅa.

³ Í ḍuko tomḅọ pịrịarị ọ̀ pịkị-ḅo tarị ò sime-ḅara sime; í ò ḍima ḅo fọọn sọmarị.

⁴ Ị́ ḅụụ ḅụ kụra maa ẹndẹ oyia asi finji gbọrụ ene kịkarị; gbala ḅịẹịn ọkụ, ḅọrọ so tẹ ye mẹ, ḍin ḅẹ naa-saakị mẹ ḅẹ boowa sakị mẹ ọkụ.

⁵ Í opu minji ye fọnọ so ḅara kẹ wa dogi-soarị, wa sime mu laarị sakị mẹ ḍawọ kọn sakị nẹngị-a. Wa dede-ḅio puu-pakarị osuka kịkarị,

⁶ anie so-paka tẹ ḅo iḅi ye mẹ, tẹso, ḅoḅiri-so anị kpatụ tẹ fịịarị.

⁷ Ị́ ịganị wa ḅaa gulugulumarị; í owi ịganị mẹ wamịna tẹmẹ-naịn-naịnmarị.

⁸ Wamịna asi ma ị́ tọrọkọ emi, wamịna ḅọị tẹ asi ma í inetẹ ẹrị ḅa.

⁹ Ị́ ịganị wamịna ḍumo-ene ma kpụlụmarị, arị ḅọrọ-soarị ḅeri-ḅio ḅeri-ḅio kọn ẹkwẹn mịẹ ḅara.

¹⁰ Wa kẹ tomikiri ḍumo ḅẹ akụra anie tesi oyi finji; wamịna ḅụụ kụrọm ḅẹḅẹ, kụra inia si; anịsọ arịmgba dogi-ḅoarị ḅụụ-fụka na kururu na; ala-a ḍumo mẹ pẹlẹ tẹ wa ḅarị ofori.

¹¹ Ḅintẹ ḅara kẹ ị́ ịganị mẹ ḅẹ iku da tẹ ḅọ tụḅọ? Tụḅọ nimi, í owi ịganị mẹ inetẹ dogi-ḅo ḅẹ ḅalafa?

¹² Kẹ wa toluma mịnẹ wamịna ḍumo sakị boowa, mịẹ tẹ wa ye-nimiapụ sọ ḅẹ ḅara.

¹³ Ị́ ịganị nwenii mu tọ sakị la ḅẹ? Yei KỊNỊNYANAḄỌ, wamịnị ị́ afịrịmẹnjịapụ ma ḍiki-sịḅị-kụrụkụrụụ.

¹⁴ Dede goyegoye í kuno-a ḅẹlẹma mẹ kẹ wa pịrị ḅinmaa, mịẹ tẹ wa ḍumo sime ḅarị ene mamgba ḅụ wa nume su-su ḅioḅẹlẹ ḅẹ ḅara.

¹⁵ Wa ḅụụ-fụka da sime akụra ma ḅụ í kururu kẹ wa pịrịm, mịọkụ pịkị ọkọ la ḅioḅẹlẹ kẹ wa pịrịị.

¹⁶ Yee wamịnị ị́ afịrịmẹnjịapụ ma í opu kụrọtẹ amịẹaị ma ẹrị, yee wamịna awọmẹ í ebube opu kụrọ mẹ ẹrị.

¹⁷ KỊNỊNYANAḄỌ wamịna Tamụnọ, yee ị́ aboma ma wamịnị na sime. Wamịna amịẹaị mamgba ḅụ lolo kẹ wa pịrịị.