Devidi-Anume 88 - FỊAFỊA BAỊBỤLỤ

Ḅarasụa Gotẹ Kọn Owu

¹ KỊNỊNYANA-TAMỤNỌ, ị̀ ḅọrọmaḅọ, bebe ene mamgba à kẹ owu pakamarị, à pịkị ḍin ḅụ ị́ tọrọkọ ḅoarị.

² Ị̀ tẹkẹ naa; à ḅarasụa gotẹ kọn-arị owu mẹ pokii!

³ Tọnwa ḅụụ-fụka ì ponoma tẹ à fịị ḅẹ-yearị.

⁴ Àrị osi apụ mamgba tẹ fịị ḅẹ-yearị apụ ma na kịka tẹ; ị̀ ịnyọ mamgba fa tẹ.

⁵ Fịtẹ-apụ ogboku ini ị̀ kẹ gbin kuroma tẹ so tẹẹ; ịn ḅaa tẹ amịna aḍuḅu ḅio koro-simearị apụ mie à kịkarị, anie ị́ gbọrsịḅị kẹ ḅioḅọrọma famatẹ apụ ma, anie ị́ ḅarasụa gbarị tẹ apụ ma.

⁶ Ị́ ị̀ kẹ pokolo tẹịn ḍuḅu ḅio gbin suu tẹ, kanakana tẹịn, pịkị pokolo tẹịn olulu ḅio ḅụ.

⁷ Ị́ ịganị iku ì ponomarị, tẹ anị ḅẹ ọnụngọ ma suku-ḅio ḅụ à wọlọgị fa tẹẹ.

⁸ Ị́ mịẹ tẹ ì ikiapụ ị̀ kẹ gbin kuroma so tẹ; ị́ mịẹ tẹ àrị ịna sịḅị-ngụngụnma tẹ. À gbala kiri ikoli kẹ sụa ḅọ sọ tẹ ḅarị inetẹ paka-ḅo-a;

⁹ tọrụsiẹrị ị̀ atọrụngbọ furuma tẹ. KỊNỊNYANAḄỌ, ene goyegoye àrị ị́ sịn tẹ ị̀ aḅara saakị ị́ da tẹ tẹkẹarị.

¹⁰ Ị́ fịtẹ-apụ ma gotẹ ḅụụ-buama-aị mịẹ-mịẹ? Ịn saakị tẹ í tokini-tokini?

¹¹ Ḍuḅu ḅio ḅụ ini í kuno-a ḅẹlẹma mẹ ḅẹrẹ ḍuko-ḍuko? Anịanịa ị́ í mininiye-mịẹarị ye mẹ gulugulu yọ mẹ ḅụ ini anị ḍuko-ḍuko?

¹² Anị kanakana yọ mẹ ḅụ ị́ ḅụụ-buama-aị ma kịnị ẹrị-ẹrị? Anịanịa í iḅi mẹ ịn kẹ ḅioḅọrọma tẹ apụ ma ama mẹ ḅụ?

¹³ KỊNỊNYANAḄỌ, à ḅarasụa gotẹ ị́ sịn-arị; dede goyegoye àrị ị́ tẹkẹarị.

¹⁴ KỊNỊNYANAḄỌ, tiye ẹrẹsị ị́ ị̀ sịkịarị? Tiye ẹrẹsị ị́ ọḅụ pịkị ì gbin-arị?

¹⁵ Ị̀ asambịrịma sakị kụra-ḅio à tọrụsiẹrị tẹ fịị na kpeki tẹ; ị́ afomu-ḅara ma iku ì ponoma ḅaa ḅẹ tẹ.

¹⁶ Ị́ kụrọtẹ ịganị mẹ ị̀ gbẹẹ kọsịmarị; ị́ ḅalafama ḅara kẹ ị̀ pakarị owu ma ị̀ ḅaa gulugulumarị.

¹⁷ Bebe ene mẹ ḅụ àrị ẹgẹnẹ-minji seri sọ ḅara sọ ḅo ì gbori-ikelemarị; pakịrị, pakịrị ḅụ ịn sọ ḅo ị̀ bịan-arị.

¹⁸ Ị́ mịẹ tẹ ị̀ na kpeki tẹịn ikiapụ sọ ì koroma-som, tẹ kanakana kịngẹ nwẹnị ị̀ na mẹnjịarị ḅọ sọ.