Devidi-Anume 87 - FỊAFỊA BAỊBỤLỤ

Jeruselemu Tokini Nume

¹ KỊNỊNYANAḄỌ ḅe ori opu ama mẹ kẹ fịafịa tụndụ mẹ ọgọnọ namam.

² Ò Jeruselemu mẹ ḅẹlẹma Izirẹlị ḅẹ jen ama goyegoye nẹngịm.

³ Tamụnọ opu ama, ị́ ḅụụ ò ḍukoarị ḅụụ-buama-aị ma pokii:

⁴ “Àrị Ijiputi na Babịlonịya na kẹ sụa ḅa arị ị̀ ḅịḅị pokiarị asịẹ ma gotẹ arị sakị; Jeruselemu mẹ angarị apụ ma ogboku à Filisiteni na, Taya na, Sudanị na ḅẹ apụ kẹ sụa kịẹn ḅa.”

⁵ Zayọnị gbolomaye ḅụ ịn ḅẹẹ ḅa mịnẹ sịẹ-sịẹ mamgba anị ḅẹ apụ sọ ḅa, tẹ Kụrọ mamgba Nyanaḅọ ḅe anị mịẹ kụrọma ḅa.

⁶ KỊNỊNYANAḄỌ ḅe tomikiri ḅẹ atomi mamgba kẹ ḍiri kẹ ḅa tẹ inimgba kẹ Jeruselemu ḅẹ apụ ḅụ sụa ḅa.

⁷ Ịn sẹkịarị pịkị nume-suarị, “Zayọnị ḅụ mie wamịna aboma mamgba sime tẹ saakị paka-ḅoarị.”