Devidi-Anume 86 - FỊAFỊA BAỊBỤLỤ

Ḅarasụa Ḅii Tẹkẹ

¹ KỊNỊNYANAḄỌ, ì pokii, tẹ ị̀ pakịrịị, à ḅarasụa ḅiiarị, ị̀ ḅụụ pịkị lọkọ tẹ ẹrẹsị.

² Fịị ḅio ị̀ ḅọrọmaa, à sịḅị-tuu ị́ pịrịarị ẹrẹsị; ị̀ ḅọrọma, yẹrị ị́ fịrịmẹnjịḅọ, à pịkị ị́ kẹ ḅiokpọmarị ẹrẹsị.

³ Ị́yẹrị anie ị̀ Tamụnọọ, ọkọẹrẹsị ị̀ ḍiki-ḅụụjịrị; bebe ene mamgba à kẹ ị́ tẹkẹarị.

⁴ Yei KỊNỊNYANAḄỌ, mịẹ tẹ ị́ fịrịmẹnjịḅọ ḅioḅẹlẹ, ị̀ atẹkẹ iwo ị́ dama-ḅoarị ẹrẹsị.

⁵ Wamịna ḅụ í iḅim, ị́ pịkị wamịna si-wẹrịsoarị, kuno-a ḅẹlẹma ị́ ḅụụ ḅụ ḅin ị́ tẹkẹarị apụ ma pịrị wararị.

⁶ KỊNỊNYANAḄỌ, ị̀ tẹkẹ poki, à ḅarasụa gotẹ kọn-arị owu ma naa.

⁷ Ḅụụ-fụka asakị ḅụ arị ị́ sịn-arị, ị́ ị̀ atẹkẹ naarị ẹrẹsị.

⁸ Ị́ kịka jen Tamụnọ ofori, Yei KỊNỊNYANAḄỌ, ị́ kọrị tẹ ye kọrị tẹ jen gbọrụḅọ-sọ ofori.

⁹ Tomikiri ḅẹ asịẹ mamgba tẹ ị́ tẹmẹ tẹ apụ ma ḅo iḅo ị́ pịrị ḅa; ini í opu tokini ḅa.

¹⁰ Ị́yẹrị opu kụrọḅọ, tẹ ḅụụ-buama-aị mịẹarị ḅọ; kịngẹ anie Tamụnọ.

¹¹ KỊNỊNYANAḄỌ, í ḅiiarị à mịẹ ḅẹ ye kẹ ì toluma, tẹ à ḅioḅẹngbọ-kẹ-sịrẹrẹ-niḅi ḅara kẹ ị́ ḅịḅị poki ḅa; ì toluma tẹ à ḅụụ mẹmgba saakị ị́ pịrị ḅara kẹ fịrịmẹnjị ị́ pịrị.

¹² Yei KỊNỊNYANAḄỌ, ị̀ Tamụnọ, arị ì ḅioḅẹngbọ mẹmgba kẹ í tokini ḅa; àrị í opu ḍuko wasama mu ḅẹẹ-sakị ḅẹẹ-sakị la ḅa.

¹³ Í kuno-a ḅẹlẹma mẹ ị̀ ḅụ ḍụḅa ḅakam! Ḍuḅu ḅio ḅụ sọ ị́ ị̀ ḅọrọma tẹẹ.

¹⁴ Yei Tamụnọ, ḅụụ-gelema atomi ḅo ị̀ bịan sịẹ tẹ; kụrọ-kụrọ aị mịẹarị tomi ogbo ị̀ ḅaa ḅẹ ḍọkịarị; ị́ kẹ ye-sịn-a atomi ma.

¹⁵ Yei KỊNỊNYANAḄỌ, ị́yẹrị anie ọkụrụkụrụ na ḅẹlẹma na nyana Tamụnọọ, sakị mamgba ye-inema, sakị mamgba iḅi-yemịẹ-ḅara nyana, pịkị ḅioḅẹngbọ kẹ ḅụụ ḅụ gbana na-iḅi ḅara sime.

¹⁶ Tọrụ pịkị ị̀ da tẹ ọkụrụkụrụ nyana ị̀ pịrị; ịnyọ kẹ ị̀ ḅụụ suu tẹ ị̀ ḅọrọma-a, arị ì iyingi kẹ fịrịmẹnjị ị́ pịrị-pịrị gbọrụ ḅara mẹ kẹ fịrịmẹnjị ị́ pịrịarị ẹrẹsị.

¹⁷ KỊNỊNYANAḄỌ, í iḅi ḅẹ elekima kẹ ì ḍie; ini ma tẹ ì ḍiki-ḅioḅuarị apụ ma ḅụụ-jịrị ḅa ini í ì ḅiokpọma tẹ ḅarasụa ị̀ pịrị tẹ ye mẹ ẹrị sakị.