Devidi-Anume 85 - FỊAFỊA BAỊBỤLỤ

Izirẹlị Iḅi Gotẹ Kọn Tẹkẹ

¹ KỊNỊNYANAḄỌ, ị́ ọkụrụkụrụ nyana ị́ amakiri mẹ pịrị tẹẹ; ị́ mịẹ tẹ Izirẹlị siin lọkọlọkọ tẹẹ.

² Ị́ ị́ atomi ma asi wẹrịso tẹ pịkị ịna amịẹ-irima mamgba ḍiki-tọrụsin tẹ.

³ Ị́ ị́ ḅụụ dasịẹmam in ḍiki ịganị ḅụ, tẹ í owi ịganị mẹ nụnụ ọkịm.

⁴ Wa kẹ pịkịma-ḅoo, Yei Tamụnọ wa ḅọrọmaḅọ, tẹ ḅarị ịganị wa pịrị ma.

⁵ Ị́ ḅọrọ ịganị wa pịrị gbamaso ḅẹ? Ị́ ịganị mẹ gbala-gbala wamịna ḅụ kunoma ḅịa?

⁶ Mịẹtẹ wa siin kụrọ, anịsakị, wamịnị, ị́ atomi ma, í tokini ḅa.

⁷ Yei KỊNỊNYANAḄỌ, í kuno-a ḅẹlẹma mẹ kẹ wa ḍie, tẹ ị́ ḅọrọma mẹ kẹ wa pịrịị.

⁸ KỊNỊNYANA-TAMỤNỌ ḅe ḍukoarị ye mie à pokiarị; ò dein minini wamịnị ori atomi ma pịrịarị, wa pịkị mu wamịna oḅori etela mẹnjị-a ḅẹḅẹ.

⁹ Tụkụmaye ọ̀ tẹlẹma wararị, ọ̀ kụn-arị apụ ma ḅọrọma, anịsakị ori emi tẹ wa ḅọrọmarị mẹ wamịna amakiri mẹ ḅụ sime tọrọkọ mu ḅa.

¹⁰ Ḅẹlẹma na ḅioḅẹngbọ-kẹ-sịrẹrẹ-niḅi ḅara sime na donia ḅa; karakara mịẹ na dein na fịnama ḅa.

¹¹ Tomḅọ ḅịḅịpoki mẹ iwo Tamụnọ da mu ḅa, tẹ Tamụnọ karakara mẹ So-ḅio sime tẹ ideri ḅo ḅa.

¹² KỊNỊNYANAḄỌ ḅe mịẹ tẹ wa lọkọlọkọ ḅa, tẹ wamịna kiri pịkị kpọma fịaị pakama ḅa.

¹³ Karakara KỊNỊNYANAḄỌ ḅe tọrọkọ tarị ḅa; anị ọ̀ mẹnjị ḅọrọ ḅe anga tẹlẹma ọ̀ pịrị ḅa.