Devidi-Anume 84 - FỊAFỊA BAỊBỤLỤ

Tamụnọ-warị Gotẹ Ḅio-sẹsẹ

¹ Kụrọmamgba nyana Tamụnọ, àrị ị́ Warị mẹ ḅẹlẹma la ḅara ḍikii!

² Àrị anịjụ mu ḅii la ḅara ḍiki! Ị̀ tẹmẹ KỊNỊNYANAḄỌ Warị mẹ ḅio sime ịgbanịarị. Àrị ị̀ ḅụụ mẹmgba kẹ ḍereku tẹ nume-su ḍumo wararị Tamụnọ ḅe pịrịarị.

³ Asiya afeni ma ḅioju sọ warị nama wararị, tẹ opulo-ngịangịa afeni ma sọ arịḅẹ sime-yọ nyana wararị; ini ị́ agbamịẹ-anga mẹ kpeki ḅụ ịna awọmẹ kẹ wẹrị wararị. Kụrọmamgba nyana KỊNỊNYANAḄỌ, ị̀ amadaḅọ pịkị ị̀ Tamụnọ.

⁴ Ị́ Warị ḅio angarị apụ tọ-ḅara kẹ ḅioḅẹlẹ ḅẹ, sakị mamgba nume su-su í tokiniarị apụ ma.

⁵ Ịna ịnyọ ị́ ḅara ḅoarị apụ ma tọ-ḅara kẹ ḅioḅẹlẹ ḅẹ, anie mu Zayọnị Tụndụ la mẹ gotẹ ḅio-sẹsẹarị apụ ma.

⁶ Ḅaka ḅẹ tụndụ ogboku ḅụ ịn mẹnjị-ḅọrọarị sakị, anị ngụngụḅa, ngụngụḅa yọ sọarị; kụra aya-ḅịḅị ḅẹ eene mẹ mịẹ tẹ anị ḅụ minji sịẹ-sịẹ wararị.

⁷ In muarị sakị in kụrọ tọrọkọ, tọrọkọ muarị; Zayọnị tụndụ mẹ ọgọnọ ịn Tamụnọ ma Tamụnọ ḅẹ ẹrị ḅa.

⁸ KỊNỊNYANAḄỌ, kụrọmamgba nyana Tamụnọ, ị̀ tẹkẹ naa. Yei Jekọbụ Tamụnọ, ị̀ poki!

⁹ Yei Tamụnọ, wamịna amadaḅọ ḅe bomaa, ḅarana sẹlẹ pakama-ḅo amadaḅọ ḅe.

¹⁰ Gbọrụ ḍin kẹ ị́ Warị ḅio sime mẹ iḅi ḍin maa ẹndẹ oyia asi finji kẹ jen anga ḅụ sime nẹngịm; à si-sịḅịḅio-sụapụ ma sime-ayọ ma ḅụ anga ḅarị nakara àrị ị̀ Tamụnọ ḅe warị mẹ ḅẹ ogigo ḅọkọ anga sịẹsimee.

¹¹ KỊNỊNYANAḄỌ ḅe anie wa gbaịn-arị ebube amadaḅọ ḅe, iḅi ḅara kẹ wamịnị na mịẹ na kụn na kẹ wa boma. Kụra mịẹarị apụ ma gbọrụ iḅiye tẹ ọ̀ ḍụkụ tẹ kẹ ịn pịrị, pịrị-a ye ofori.

¹² Kụrọmamgba nyana Tamụnọ, ị́ kẹ ḅiokpọma apụ ma ḅioḅẹlẹ la ḅara ḍiki!