Devidi-Anume 83 - FỊAFỊA BAỊBỤLỤ

Si Kẹ Izirẹlị Tọn Apụ Ma Nẹngịma Gotẹ Kọn Tẹkẹ

¹ Yei Tamụnọ, gbọsime ma; ḅụụ-jikea ḅara sime ma, yaụ-sime ma!

² Ḍikii! Si kẹ ị́ tọn apụ ma saakị tẹ ị́ na tụḅụrụ tẹ, tẹ í ḍiki-ḅioḅuarị apụ ma kọngọ kụrọma tẹ.

³ In ḅọị ḅara kẹ si-aị tọn ị́ atomi ma ọgọnọ gbanarị; ịn si ḅẹrẹ-ḅiya ị́ gbaịn-arị apụ ma pịrịarị.

⁴ Ini mẹẹ, “Ó ḅo wa ịna sịẹ mẹ kan sara, anịsakị tomi Izirẹlị kẹ ḅioḅọrọma gbamaso ḅa.”

⁵ Ịn gbọrụ-ḅịḅị-fie tẹ ịn tọn-arị ye mẹ ḅụ, tẹ ị́ na tụḅụrụ ḅẹ owu sọ gboloma ogbo sọ tẹ:

⁶ Ọkụkụ na Isimẹlị ḅẹ atomi na; Mohabụ na Aga ḅẹ apụ na;

⁷ Gẹbalị na, Amọnị na, Amalẹkị na ḅẹ apụ ma, pịkị Filisiteni na Taya na ḅẹ apụ ma na.

⁸ Asiriya sọ ịna ḅụ sọ tẹ tẹ Lọtị furo-ḅẹ-apụ ma na kụrọ tẹ ọmụ gbin gboloma ogbo mịẹ tẹ.

⁹ Ị́ kẹ Midiyanị ḅẹ apụ mịẹ ye kẹ ịn mị, ị́ pịkị kẹ Sisera na Jabini na mịẹ ḅara mẹ Kisọnị Tọrụ akaka ḅụ.

¹⁰ Ị́ ịn nẹngịmam Ẹndọ ḅụ, tẹ ịna oju akpakpa ma kiri ọgọnọ sime tẹ ḅụrụm.

¹¹ Ị́ kẹ Orẹbụ na Zibu na mịẹ ḅara kẹ ịna sịḅịdapụ mịẹẹ; ị́ kẹ Zeba na Zalimuna na mịẹ ḅara kẹ ịna ḅẹrẹtọn-apụ nẹngịma.

¹² Anie ḅẹẹ apụ ma, “Wa sime Tamụnọ pịrị amakiri mẹ ọkị nyana ḅa.”

¹³ Yei Tamụnọ, fọọn gala-galama ḅara kẹ ịn gala-galamaa, gbala fẹrụ samụnọtẹ asịra kẹ fiin-soarị ye ọkụ.

¹⁴ Gbala fịnị opu pịrị dọkịmarị ye ọkụ, gbala fịnị-ḅẹlẹ tụndụ ọgọnọ ḅẹ pịrị ḅụ sọ tẹ bebe tụndụ mẹ kọrịma ḅara,

¹⁵ ị́ erise kẹ in dee ḅelema tẹ ị́ kụrọ fẹrụ kẹ ịna tẹmẹ-naịn-naịnmaa.

¹⁶ Yei KỊNỊNYANAḄỌ, ịna ḅụụ-jịrịmaa, tẹ mịẹ tẹ ini ị́ kụrọ lekiri tẹ minini.

¹⁷ Yee owu ịna ḅara si tẹ ịn tẹmẹ-naịn-naịn mu ḅẹẹ-sakị ḅẹẹ-sakị la; yee ịn tọrụ-tuu ḅụ sime fịị.

¹⁸ Yee in nimi mịnẹ ị́yẹrị kịngẹ anie KỊNỊNYANAḄỌ ḅẹẹ, bebe tomikiri mẹ ḅụ ḅẹ tẹịn ḅẹrẹtọnḅọ.