Devidi-Anume 81 - FỊAFỊA BAỊBỤLỤ

Alalị Fị Sakị Ḅẹ Nume

¹ Ḍereku oloku kọn wa ḍụarị Tamụnọ ḅe pịrịị; tokini nume-su Jekọbụ Tamụnọ ḅe pịrị!

² Nume saakị tẹ akwa mẹ boboo; ọbọ na alili na kẹ ḅẹlẹ nume farịị.

³ Opu ọdụ mẹ ofuro alalị mẹ pịrị, akalụ tarị paka na akalụ bebe tẹ sakị na ḅụ.

⁴ Miemẹ Izirẹlị ḅụ olokoo, Jekọbụ Tamụnọ ḅe tọn kuroma ye.

⁵ Ori anị sụa Izirẹlịapụ ma pịrịm ori owu kẹ Ijiputi sịẹ mẹ paka sakị. Àrị à nimi-a pọkọ naarị, tẹ ḅẹẹm,

⁶ Yẹrị ó dogi iku aị ma da-koroma ọmịna apana ọgọnọ ḅụ; à mịẹ tẹ ọmịnị ó dogi abiriki ma siin kuromam.

⁷ Ọ́ ḅụụ-fụka ḅio sọ sakị, ọmịnị ị̀ sịn tẹ arị ọ́ ḅọrọmam. À kikima tẹ sime erise mẹ ḅio àrị ọmịna ḅịḅị ọkịm. Mẹrịba ḅẹ ngụngụḅa ma akaka ḅụ àrị ọ́ daaḍikim.

⁸ Ị̀ atomi, ọmịnị à kẹ ọmịna ḅeri nụnụarị ye mẹ poki; Izirẹlị, à kpọma ḅiiarị mimgbe ọmịnị ì poki tẹẹ!

⁹ Gbala-gbala ó sunsin jen Tamụnọ pịrị ḅịa.

¹⁰ Yẹrị anie KỊNỊNYANAḄỌ ọmịna Tamụnọ ḅe, tẹ Ijiputi amakiri ḅụ ọ́ pakama-ḅo ḅọ ḅe. Ọ́ ḅịḅị finji-saraa, tẹ à fịye kẹ ọ́ pịrị fị ḅa.

¹¹ Kụma ị̀ atomi ma ì poki ḍụkụ-a; Izirẹlị ị̀ ḅịḅị poki ḍụkụ-a.

¹² Ọkọẹrẹsị àrị ịn wẹrịso tẹ ini ịna kọngọ kụrọma etela ma mẹnjị tẹ in ḅii-ye ḅii-ye mịẹm.

¹³ À kpọma ḅiim mimgbe ị̀ atomi ma ì poki tẹẹ; à kpọma ḅiim mimgbe ini ị̀ ḅịḅị poki tẹẹ!

¹⁴ Mimgbe à sarasarama mịẹ tẹ owu si kẹ ịn tọn apụ ma ḅara sii ḅarị ya, tẹ ini ini na sọarị apụ ma nẹngịma fama ḅarị ya.

¹⁵ Ì ḍiki-ḅioḅuarị apụ ma ḅalafa ḅụ ị̀ tọrọkọ iḅo ḅarị ya; ịna fomu-ḅara nwẹnị mu ḅẹẹ-sakị ḅẹẹ-sakị la ḅarị ya.

¹⁶ Ọmịnị kụma àrị iḅi tẹịn mbịaka kẹ ọ́ pịrị fị ḅẹm tẹ piri-ḅio-ḅẹ ḅẹm kẹ ọ́ pịrị taḅa furo ḅinma ḅẹm.