Devidi-Anume 80 - FỊAFỊA BAỊBỤLỤ

Izirẹlị Sịẹ Siin kobiri Ḅẹ Ye Gotẹ Kọn Tẹkẹ

¹ Yei, Anana-ḍikiḍikiḅọ ḅara kẹ Izirẹlị ḍikiḍikiarịḅọ, wa pokii; tọrọkọ tarị amịna anana-ogbo pịrịarị ḅọ, wa naa. Ị́yẹrị amịna tẹmẹ tẹ pamba-sụa wararị aị ọgọnọ jụ ḅụ emine kuroma tẹ lẹgị wararị ḅọ,

² ị́ ḅụụ mịẹfinji Iferemu na, Benijamịnị na Manasẹ na afuro ḅẹ apụ ma pịrịị. Ị́ ịnyọ ḍie-pakamaa; ḅo wa ḅọrọmaa!

³ Yei Tamụnọ, wa kẹ pịkị-ḅoo! Ị́ ọkụrụkụrụ kẹ wa ḍie, anịsakị wa ḅọrọma ḅa!

⁴ KỊNỊNYANAḄỌ, kụrọmamgba nyana Tamụnọ, ị́ atomi ma atẹkẹ ma paa ị́ ịganịma mu tọ sakị la ḅẹ?

⁵ Í kururu kẹ ḅuru sọma wa pịrị fị tẹ, í opu kọpụ kẹ owu-minji sụa wa pịrị ḅuu tẹ.

⁶ Ị́ wẹrịso tẹ wa ikelema-koro wararị asịẹ ma wamịna amakiri gotẹ owu sọarị; si kẹ wa tọn apụ ma wa mịẹ-simarị.

⁷ Kụrọmamgba nyana Tamụnọ, wa kẹ pịkị-ḅoo! Ị́ ọkụrụkụrụ kẹ wa ḍie, anịsakị wa ḅọrọma ḅa!

⁸ Ijiputi ḅụ ị́ gbọrụ girepu sịn soku ḅom; í osi asịẹ ma dee-pakama tẹ anị kẹ ịna amakiri ḅụ ḍiḅim.

⁹ Í pịrị pẹlẹ ḅelema anị pịrị tẹ anị so-pakam; anị ḅẹ akuno ma kiri ḅio sọ ḍiḅim, tẹ anị wasama kiri mẹ ikelema-korom.

¹⁰ Anị ịrụa kikima tụndụ ma pịrịm; anị ḅẹ aḅara ma pịkị gele mu sida sịn asịn ma jụụm.

¹¹ Anị ḅẹ aḅara ma wasama mu Mẹdịterenanị abajị mẹ la tẹ pịkị mu Yuferetisi tọrụ mẹ sọ lam.

¹² Tiye ẹrẹsị ị́ ị́ kẹ anị gbori onu ma kan sara? Mịọkụ mẹnjị-ḅọrọarịḅọ-ḅọrọarịḅọ inetẹ anị ḅẹ mgbọlụ ma furu kaịn ḅa;

¹³ Oḅoin anị nanga-nanga kiri pịrị tẹ piri-ḅio-ḅẹ anama anị kẹ ḅụụ ḍikiḍikiarị.

¹⁴ Kụrọmamgba nyana Tamụnọ, tọrụ kẹ wa daa! So-ḅio sime tẹ tọrụ-toluma wa ḍikii; ḅo ị́ atomi ḅọrọmaa.

¹⁵ Ḅo ḍiḅi iru mịẹ mgbọlụ sụarị kụrọ sịn mẹ ḅọrọma, mịẹ ịwọ kụrọ sịn mẹ tẹ ị́ mịẹ tẹ so-paka kụrọ lama ye mẹ.

¹⁶ Si kẹ wa tọn apụ ma fịnị kẹ anị ḅụ sụa tẹ anị pẹlẹ-gbin tẹ; ịganị tọrụ kẹ in ḍiki tẹ ịn ḅaa guluguluma!

¹⁷ Ị́ sẹlẹ ọkị tẹ atomi ma wẹrị kpaịnma tẹ ịn gbaịn, ị́ mịẹ kụrọma lama tẹ sịẹ mẹ.

¹⁸ Gbala-gbala wa ḅarị jen kẹ ị́ ḅụ pịkị so ḅịa; yee wa ḍumo sime, anịsakị wa í tokini ḅa.

¹⁹ KỊNỊNYANAḄỌ, kụrọmamgba nyana Tamụnọ, ị́ ọkụrụkụrụ kẹ wa ḍie, anịsakị wa ḅọrọma ḅa.