Devidi-Anume 8 - FỊAFỊA BAỊBỤLỤ

Tamụnọ Ebube Na Tomḅọ Kụn Nyana kiri Na

¹ Yei KỊNỊNYANAḄỌ, wa Nyanaḅọ, bebe tomikiri mẹ í opu ẹrị tẹẹ! Tomi í tokini wenii anị So laarị.

² Kala-awọmẹ na ndo-ndo-awọmẹ na kẹ í tokiniarị ye mẹ kụrọnị-yọ sọ kẹ ị́ pịrị tẹẹ. Si kẹ ị́ tọn apụ mamgba ịn kẹ ị́ mịẹ-mịẹ ye ofori: ị́nịna tụḅụrụḅọ tụḅụrụḅọ, ị́ mḅọ kikiarị.

³ À So-tọrụ mẹ ḍikiarị sakị, ị́yẹrị tẹmẹ aị ma — akalụ mẹ na lolia ma na tẹ ị́ kẹ arịḅẹ sime akiri ḅụ wẹrị aị ma:

⁴ tomi ḅọrọ tiye tẹ ị́ ịn kẹ ḅiokoromarị; anie papaa tomi ma, tẹ ị́ ịn balarị?

⁵ Anịsọ ị́ ọ̀ tẹmẹ ḅara ḅụ ị́yẹrị kịngẹ mie ọ̀ nẹngị yee; ị́ nwẹnị ebube na kụn na ama-da sun na kẹ ò sure.

⁶ Ị́ ọ̀ tọnm ori ị́ tẹmẹ ye goyegoye kẹ sịḅịdaa; bebe tẹmẹ ye mamgba ị́ kẹ ò suku-ḅio suum:

⁷ anana na nambulo na, pịkị piri-ḅio-ḅẹ anama na sọ;

⁸ feni amẹẹ na inji na pịkị ị́ tẹmẹ tẹ kẹ abajị ma ḅio kuroma aị ma na.

⁹ Yei KỊNỊNYANAḄỌ, wa Nyanaḅọ, bebe tomikiri mẹ í opu mẹ ẹrị tẹẹ!