Devidi-Anume 79 - FỊAFỊA BAỊBỤLỤ

Izirẹlị Sịẹ Mẹ Ḅọrọma Ḅẹ Gotẹ Kọn Tẹkẹ

¹ Yei Tamụnọ, oru nimi apụ ma owu kẹ ị́ amakiri mẹ paka ḅẹ ḅo tẹ. Ini ị́ fịafịa Warị mẹ pilema tẹ Jeruselemu mẹ kan sara tẹ.

² Ini ị́ atomi ma oju akpakpa ma kẹ ẹdẹlẹ amẹẹ pịrị pẹị ḅẹ tẹ kẹ koroma-som, ị́ afịrịmẹnjịapụ ma oju akpakpa ma kẹ kuroma piri-ḅio-ḅẹ anama pịrị pẹị ḅẹm.

³ In minji ọsụma ḅara kẹ ị́ atomi ma ọmbie ọsụmam; ọmbie minji kịka tẹ mẹnjị Jeruselemu ikelema-korom kirikọntẹ ḍụẹịn ma ḍiḅi ḅẹ gbọrụḅọ-sọ paka-a.

⁴ Wa gbori wararị asịẹ ma wa mịẹ-simarị; ịn wa ḍẹrịarị, pịkị wa komboarị.

⁵ KỊNỊNYANAḄỌ, ị́ ịganị wa pịrị gbamaso ḅa aro? Ị́ ịganị mẹ fịnị kọrị ḅara kọrị tọrọkọ-tọrọkọ mu ḅẹ?

⁶ Ị́ ịganị mẹ pịkị sịẹ ma tẹ sunsin ị́ pịrị-a apụ ma da, kẹ ị́ tẹkẹ-a apụ ọgọnọ sara.

⁷ Ini ị́ atomi ma ḅaa tẹ ẹrẹsị; ini ị́ sịẹ mẹ kan sara tẹ.

⁸ Wamịna elemu aḍapụ mịẹ asi ma gotẹ fomu-ḅara kẹ wa pịrị ma. Mịọkụ ọkụrụkụrụ nyana wa pịrịị; wa kẹ ḅiokpọmarị gberie-sọ ḅarị ofori.

⁹ Yei Tamụnọ, ḅarasụa wa pịrị tẹ wa ḅọrọmaa; wa pụkọ-pakamaḅo tẹ wamịna si-wẹrịso, sime ì pịrị ḅe kụn ẹrẹsị

¹⁰ Tiye ẹrẹsị sịẹ-sịẹ ma wa gbela ḅẹ, “Ọmịna Tamụnọ ḅe ọ̀ tọ-anga emi?” Yee wa ị́ kẹ sịẹ-sịẹ ma tẹ ị́ afịrịmẹnjịapụ ma ọmbie ọsụma apụ ma pịrị fomu-ḅara mẹ ẹrị.

¹¹ Ikoli ḅio simearị apụ ma kọn-arị iningi ma poki, tẹ í opu kụrọ ḅụ ịn kun tẹ ḅaa, ḅẹrẹ-pẹlẹ pịrị tẹ apụ ma pakama-ḅo.

¹² KỊNỊNYANAḄỌ, sọnọma asakị kẹ osi asịẹ ma mịẹ ye mẹ ḅụ ịn gbẹẹ, ịn kẹ ị́ mịẹ-sima tẹ aị mamgba ḅụ.

¹³ Anịtẹso wamịnị, ị́ atomi ma, ị́ anana ogbo mẹ, ịmịẹtẹ kẹ ị́ ḅẹ mu ḅẹẹ-sakị ḅẹẹ-sakị la tẹ í tokini ḅa tọrọkọ ḅo ḅarị sakị mamgba ḅụ.