Devidi-Anume 78 - FỊAFỊA BAỊBỤLỤ

Tamụnọ Na Ori Atomi Na

¹ Ị̀ atomi, ọmịnị à tolumarị ye mẹ pokii, ọ̀ pịkị ḅeri-tokoloma à ḍukoarị ye mẹ pịrị.

² Nimi gboloma mie à kọn ḅẹ-yearị tẹ kẹ kikima wararị elemu sakị ḅẹ aị ma puu-finji,

³ wa naa tẹ pịkị nimi tẹ aị, wamịna aḍapụ ḍuko wa pịrị tẹ aị ma.

⁴ Wa arị kẹ wamịna awọmẹ ḅọịma ḅịa; wa ḍuko tọrọkọ ḅo ḅarị ḅụọ ḅẹ apụ ma pịrị ḅa KỊNỊNYANAḄỌ ḅe kụrọ na ọ̀ kọrị tẹ opu akọrịnama na gbolomaye pịkị ọ̀ mịẹ tẹ ḅụụ-buama-aị ma na.

⁵ Ori oloko sụa-sụa Izirẹlịapụ ma pịrịm, ọ̀ tọn-tọn Jekọbụ furo-ḅẹ-apụ ma pịrị-aị ma. Ò ḍuko wamịna elemu aḍapụ ma pịrịm mịnẹ ini ori oloko ma kẹ ịna awọmẹ toluma,

⁶ mịẹ tẹ tọrọkọ ḅo ḅarị ḅụọ ḅẹ apụ ma arị ḍawọ ḅẹ ḅara tẹ ini pịkị kẹ ịna awọmẹ toluma ḅa ịna sakị ḅụ.

⁷ Mị-ḅara ḅụ ini sọ Tamụnọ kẹ ḅiokpọma ḅa, tẹ ḅarị ọ̀ kọrị tẹ aị ma kẹ ḅioḅọrọma ḅịa, kụma sakị mamgba ọ̀ tọn kuroma aị ma poki tẹ mị.

⁸ Ini ịna elemu aḍapụ ma kịka ḅịa ḅara, anie kọngọ kụrọma na ḅịḅịpoki-a na atomi ma, gbala-gbala Tamụnọ kẹ ḅiokpọma kuroma-kuroma-a apụ ma, tẹ ḅioḅẹngbọ-kẹ-sịrẹrẹ-niḅi ḅara kẹ koro-sime ọ̀ pịrị-a apụ ma.

⁹ Iferemu warị ḅẹ apụ, iboli na ḍịn na kẹ owu sọ ḅẹ tẹ ḍọkị apụ ma mangị-som ọmụ koro ene mẹ ḅụ.

¹⁰ In Tamụnọ na ini na fị ọḅọkụ mẹ koko-a; ịn ḍụkụ tẹ ọ̀ tọn kuroma aị ma poki tẹ mịẹ-a.

¹¹ Ọ̀ kọrị tẹ aị ma ịn kẹ ḅioḅọrọmam, ọ̀ mịẹ tẹ ịn tọrụngbọ kẹ ẹrị ḅụụ-buama-aị ma.

¹² Ịna elemu aḍapụ ma ḍikiarị ogbo, Tamụnọ ḅụụ-buama-aị mịẹm Zohanị ḅẹ ele ḅio ḅụ, Ijiputi sịẹ mẹ ḅẹ kiri ḅụ.

¹³ Ọ̀ tọrụ mẹ kẹ maa anga puu tẹ ini ọkị mẹnjị-tolum anị ogboku; ọ̀ mịẹ tẹ minji ma sịẹ tẹ onu kịkam.

¹⁴ Eneḅaka ḅụ ori oḅuto kẹ ịna tọrọkọ-sụnm tẹ bebe ḍin mẹ kọrị fịnị.

¹⁵ Ịkpa mẹ ḅio ori ịkụ ma puu finji tẹ pokolo ayọ ḅụ paka-ḅo minji kẹ ịn pịrị ḅuum.

¹⁶ Ọ̀ mịẹ tẹ ịkụ mẹ ḅụ ogilolo puu-paka ḅọrọ tẹ minji nwẹnị tọrụkuḅu ḅẹ minji kịka tẹ mẹnjị.

¹⁷ Kụma ịn paa si kẹ Tamụnọ mịẹ tọrọkọ, tọrọkọ mum, tẹ ịkpa mẹ ḅio ḅụ kọngọ-kụrọma Gele Tẹịnḅọ ḅe pịrịm.

¹⁸ Ịn tọrụ-gelegele Tamụnọ daaḍikim ịn fị ḅẹ ḅii fịye kẹ ịn pịrị-pịrị ịgbanị ḅụ.

¹⁹ Ịn nwẹnị Tamụnọ na tụḅụrụ ḅara kẹ ẹkwẹn ọ̀ pịrị tẹ ḅẹ, “Ịkpa mẹ ḅio Tamụnọ inetẹ fịye kẹ kịnị pịrị fị ḅa aro?

²⁰ Ò ye kẹ ịkụ mẹ gbolom mẹ karakaraye, tẹ minji sara paka-ḅo owiarị tọrụ sọm; kụma ori inetẹ pịkị fịturu kẹ wa pịrị fị tẹ pịkị nama kẹ ori atomi pịrị pẹị ḅẹ?”

²¹ Anie ḅụ KỊNỊNYANAḄỌ ḅe ịganịm ori ịn ḍuko ye naa sakị; ọ̀ nwẹnị fịnị kẹ owu kẹ ori atomi paka, tẹ ori ịganị ịna ḅụ owim,

²² ini ọ̀ ḅụụ minini nyana-a ẹrẹsị in minini-a mịnẹ ori ịn ḅọrọma ḅẹm.

²³ Kụma ori ẹkwẹn ọgọnọ-jụ So-tọrụ mẹ pịrị tẹ tọn anị ḅẹ aḅọkọ ma pịrịm arị finjii;

²⁴ So-ḅio mie ori mgbọlị afịaị kẹ sara ịn pịrịye, mana kẹ fịrịma kuroma ịn pịrị fị ḅụ.

²⁵ Mie ḅụ ini enjẹlị apụ fịye fịm, tẹ Tamụnọ in ḅii aị mamgba kẹ ịn pịrịm.

²⁶ Ọ̀ pịkị mịẹ tẹ ịrụa sakị paka-ḅoarị anga mẹ ḅụ fẹrụ fiem, tẹ ọ̀ kụrọ ḅụ ọ̀ pịkị abajị fẹrụ fiemam;

²⁷ tẹ ò feni kẹ ori atomi fịrịma tẹ ini ideri-ḅom, ịna kịẹn-ḅịḅị nimi ḅọ, tuḅu ọgọnọ ḅẹ onwimgbọlị ma kịẹn-ḅịḅị nimi tẹ;

²⁸ akpụrụ-awarị ma ikelema-koro wararị ogboku mẹ ḅụ arị afeni ma koro ḅom.

²⁹ Anie ḅụ tomi ma fị furo ḅinmam; Tamụnọ in ḅii ye kẹ ịn pịrịm.

³⁰ Kụma ịna pọkọ sịkịrị la ḅara ḅụ ịn ta-a tẹ ịn paa fị simem.

³¹ Anị sakị mẹ ḅụ Tamụnọ in ḍiki-ịganị tẹ ịna ḅụ kụrọ tẹịn atomi ma ḅaam, Izirẹlị ḅụ iḅitẹịn asawọ ma.

³² Mie mamgba ḅụ sọ tomi ma paa si mịẹ, mịẹ-mịẹm; ọ̀ mịẹ tẹ ḅụụ-buama-aị ma ḅụ sọ ịn paa ḅioḅẹngbọ kẹ ọ̀ ḅụụ gbana-a.

³³ Ọkọẹrẹsị ori ịna ene ma kpụlụmam gbọrụ ḅịḅị kẹ sara pakama ọwụ ọkụ, tẹ ịna aḍumo kẹ ḅiotọn-a opu fa ḅụ suum.

³⁴ Ori ịna ḅụ ḅẹ ja apụ ḅaa sakị, ḅaa sakị, kirikọn-apụ pịkị ọ̀ dama-ḅo; in si ḅụ pịkị tẹ tẹmẹ-la ḅara kẹ ọ̀ tẹkẹm.

³⁵ In nwẹnị kẹ ḅiokoroma mịnẹ Tamụnọ mie in gbaịn, gbaịn ḅọ; mịnẹ Kụrọ mamgba Nyanaḅọ ḅo ḅe ḅarasụa ịn pịrị, pịrịm.

³⁶ Kụma ịna ẹkwẹn ma iruo aị famam; ini ḍuko tẹ ịna tẹmẹ-la ye ofori.

³⁷ Ịn sịḅị-tuu ọ̀ pịrị, pịrị-a; ini ori na fị ọḅọkụ mẹ ḅụ in ḅioḅẹngbọ kẹ ḅụụ ḅụ gbana na-iḅi ḅara sime-a.

³⁸ Kụma Tamụnọ ori atomi ma ḍiki-tọrụ-kụrụkụrụm. Ori ịna si-wẹrịso ịn pịrị tẹ ịn ḅaa guluguluma-a. Tọnwa asakị ọ̀ nwẹn kẹ ori ịganị da ọ̀ ḅụụ pịrị tẹ ori owi ịganị mẹ ḅụ ọ̀ ḅụụ ọlọm.

³⁹ Ọ̀ kẹ ḅiokoromam mịnẹ ini ma fịị, fịị oju sụa papaa atomi, fiema ḅọrọ-soarị fẹrụ sime ọkụ.

⁴⁰ Ịkpa mẹ ḅio ịn kẹ kọngọ kụrọma ọ̀ pịrị asakị, kịẹnkịẹn-ọkụ-ofori ḅara; tọnwa asakị ịn nwẹn kẹ ò kururumam!

⁴¹ Sakị-sakị ḅụ ịn Tamụnọ daaḍiki tẹ Izirẹlị tẹkẹarị Fịafịa Tamụnọ ḅe ḅioḅẹngbọ fụkamam.

⁴² Ini ori opu kụrọ mẹ kẹ ḅioḅọrọmam, pịkị ori ini na fịya-a apụ ḅara-ḅio ịn ḅọrọma ene mẹ sọ,

⁴³ tẹ ọ̀ nwẹnị opu akọrịnama ma na ḅụụ-buama-aị ma na mị Zohanị ele mẹ ḅio, Ijiputi sịẹ mẹ ḅio.

⁴⁴ Ọ̀ mịẹ tẹ tọrụ ma ọmbie ḍim, tẹ Ijiputi-ḅẹ-apụ ma ḅarị ḅuu, ḅuu minji nyana-a.

⁴⁵ Ọ̀ tọnwa ḅara kẹ ọmọmọ kẹ ịna ama ḅio suu tẹ arị ịna ḅụụ-fụkamam, na ngụ amẹẹ na, tẹ arị ịna amakiri mẹ gulugulumam.

⁴⁶ Ori igurube amẹẹ kẹ fịrịma tẹ arị in ḍiḅi tẹ ịwọma so-pakarị afịaị ma fị siinm, pịkị ịna ye ḍiḅi akiri ma gulugulumam.

⁴⁷ Ori mgbọlị kụrọ mgbọlị ḅara kẹ koroarị eene kẹ ịna asịn ma ḅaam, tẹ oḅoku ḅụra tẹ igirigi kẹ ịna ịla asịn ma ḅaam.

⁴⁸ Ori mgbọlị-mgbọlị ḅara kẹ koroarị eene kẹ ịna opu anama ma ḅaam, tẹ ịna anama ogbo-ogbo ma sọ so-alagba ịn tẹịn ḅaam.

⁴⁹ Ọ̀ kpọma opu ḅụụ-fụka kẹ ịn pịrịm ori ori opu ịganị ọsụma ịna ọgọnọ sara ye ḅụ, anị nwẹnị fịị dogi-ḅo.

⁵⁰ Ori ịganị mẹ ọ̀ dasịẹma-a anịanịa ịna aḍumo mẹ wẹrị, kụma si-obi mie ọ̀ kẹ ịn ḅaa ye.

⁵¹ Ijiputi ḅẹ awarị mamgba ḅụ ori mgbe ma ḅaam.

⁵² Anịtẹso ọ̀ tọrọkọ-sụn ori atomi ma pịrị tẹ ịn kẹ pakam, anana-ḍikiḍikiḅọ ọkụ, tẹ nwẹnị ịn datụkụma ịkpa mẹ ḅụ mẹnjị-toluḅọrọ.

⁵³ Ye ịn la-a ḅara mie ọ̀ kẹ tọrọkọ-sụn tẹ ịn ḅalafa-a ye; kụma tọrụ mẹ mbelembele ḅo si kẹ ịn tọn apụ ma gbaịnm.

⁵⁴ Ori ịn kẹ ḅo ọ̀ fịafịa amakiri mẹ lam, ḅo ori ḅarana owu-ḅara-iḅi ḅụ nyana ọkị tụndụ ma lam.

⁵⁵ Ori atomi ma ḅo kpekiarị sakị, ori anị yọ anga apụ ma dee-dee pakamarị; ori ịna kiri mẹ ḍie Izirẹlị afuro ma pịrị tẹ ịna anga ayọ ma kẹ ori atomi pịrịm.

⁵⁶ Kụma ịn kọngọ kụrọma Kụrọ mamgba Nyana Tamụnọ ḅe pịrị tẹ ọ̀ daaḍikim. Ọ̀ tọn kuroma aị ma in poki tẹ mịẹ-a,

⁵⁷ kụma ini ịna aḍapụ ma kịka tẹ kọngọ kụrọma tẹ sịḅị-tuu ọ̀ pịrị-a, kpịkịma-kpịkịmatẹ ḍiein tẹ tẹịnḅọ ḅiotọn anga da-mu mu-a ye ọkụ.

⁵⁸ Oru tẹkẹ-ayọ tẹ ịn nama ḅụụ pịrị-aị ma ori ịganịmam, ini oru-afụḅara tẹmẹ ye mẹ pịkị kpọma ori ịganị owimam.

⁵⁹ Tamụnọ ịganịm ori anị ẹrị sakị, ọkọẹrẹsị ori ori atomi ma sịkị simam.

⁶⁰ Ọ̀ Silo ḅẹ Tamụnọ-warị mẹ sịkịm, anie ọ̀ kẹ ò sime-yọ mịẹ sime anga mẹ wamịna ogboku ḅụ.

⁶¹ Ò minini si kẹ wa tọn apụ ma pịrị tẹ ini Ọḅọkụ fị Igbe mẹ pụkọ-ọkịm, anie ọ̀ kụrọ na ori ebube na elekima mẹ.

⁶² Ori ịganị nyana ọ̀ ḅara-kuḅu ḅẹ atomi ma pịrị tẹ ịn wẹrịso si kẹ ịn tọn apụ ma pịrị tẹ ini ịn ḅaam.

⁶³ Asawọ amẹẹ ma ọmụ ḅio fịịm, tẹ iriawọ amẹẹ ma ḅarị in sime ḅẹ gbọrụḅọ-sọ nyana-a.

⁶⁴ Agbamịẹapụ ma gbiri-gbiri-gbiri ḅio fịịm, tẹ ịn ḍụkụ tẹ ịna ereme ma in ḍuu-a.

⁶⁵ Kunoma ḅụ KỊNỊNYANAḄỌ ḅe saakịm gbala ò mono sime ye ọkụ; ori iru tọrụ-ḅaa tẹ owiarị kụrọ ḅọ kịkam.

⁶⁶ Ò si kẹ ọ̀ tọn apụ ma dee pịkịm ene la ḅẹ ḅụụ-jịrịma owu-ḅara-sii ḅụ.

⁶⁷ Kụma ò Josẹfụ furo-ḅẹ-apụ ma sịkịm; Iferemu furo mẹ sọ ọ̀ sẹlẹ ọkị-a.

⁶⁸ Anie nakara ò Juda furo mẹ sẹlẹ ọkịm na Zayọnị Tụndụ mẹ na, anie ọ̀ kpọma ḅẹlẹmarị anga mẹ.

⁶⁹ Anịanga mie ori ọ̀ Warị nama tẹ kẹ ò So-ḅio ḅẹ sime-yọ mẹ kịkama ye; ori anị mịẹ kụrọma kiri mẹ ḅioju kịkamam, sakị mamgba anị kụrọ sịẹ sime wararị.

⁷⁰ Ọ̀ nwẹnị ọ̀ fịrịmẹnjịḅọ Devidi sẹlẹ ọkị; anana ḍikiḍiki anga ḅụ ori ọ̀ saakị ọkịm,

⁷¹ ò sime tẹ ori anana ogbo-ogbo ma ḍikiḍikiarị ogbo, tẹ ọ̀ kẹ Izirẹlị ḍaḅọ mịẹm, Tamụnọ atomi ma ḍikiḍikiḅọ, gbala anana ogbo ọkụ.

⁷² Devidi nwẹnị fọịn ḅụụ pịrị-a iḅi ḅara kẹ in ḍikiḍiki tẹ nimi kẹ tọrọkọ-sụn ịn pịrị.