Devidi-Anume 76 - FỊAFỊA BAỊBỤLỤ

Tamụnọ Anie Owu-kụrọnịḅọ Ḅe

¹ Juda ḅụ ịn Tamụnọ nimi wararị; tomi ori ẹrẹ kụn-arị Izirẹlị ḅụ.

² Jeruselemu anie ò sime-yọ; Zayọnị Tụndụ ọgọnọ anie ori angarị.

³ Anịanga ò si kẹ ọ̀ tọn apụ ma aḍịẹịn ma anyịmam, karakara-ḅara-ḅụ ịna ekpeke ma na okologie ma na, pịkị ịna owuna-aị mamgba sọ.

⁴ Yei Tamụnọ, í ebube nyana la ḅara ḍikii! Í tụndụ ma ọgọnọ sime tẹ pịkị ḅoarị sakị í opu mẹ ebube nyana ḅara ḍikii, í owu kẹ ị́ na sọ apụ ma nẹngịma anga mẹ.

⁵ Ịna ọmụapụ ma ḅẹ ḅiokpọ apụ ma ḅara ḅụ sime owuna-aị mamgba ị́ kprọnị sara fama tẹ mịọkụ in fịị mono kọn-arị; ịna ịnyọ na ọmụ aka mẹmgba ḅo ye ḅụụ sọ-a aị sọm.

⁶ Yei Jekọbụ Tamụnọ, í ini ẹrẹma sakị, ịna asụ ma na arị dọkụapụ ma na ḅịkị tẹ fịịm.

⁷ KỊNỊNYANAḄỌ, kụma kịnị mamgba í ḍiki-ḅalafaam. Ị́ ịganịarị sakị gbọrụḅọ-sọ inetẹ ị́ tọrọkọ sịẹ-sịẹ-a.

⁸ So-ḅio mie í sime tẹ ị́ ḅẹrẹkọn mẹ mịẹ tẹ tomi nimi ye; tomikiri ḅẹ atomi nwẹnị ḅalafa tẹ gbọsime,

⁹ ị́ ḅẹrẹ-pẹlẹ ḅẹ tẹ saakị sịẹ sakị, í tomikiri ḅụ tomi ponomarị apụ mamgba ḅọrọma ḅẹ ḅara.

¹⁰ Tomi kọn-arị ịganị mẹ jen tokini kịngẹ mie anị dogi-ḅo ị́ pịrịarị; ọmụ ḅio fa-a apụ ma ị́ alalị ma fị ḅa.

¹¹ Ị́ minini KỊNỊNYANAḄỌ ị́ Tamụnọ ḅe pịrịye kẹ ọ̀ pịrị; ọmịnị kpeki anga simearị asịẹ mamgba ò ḍiepịrị-aị ọkị-ḅo ọ̀ pịrị. Tamụnọ mịẹ tẹ tomi ò ḍiki-ḅalafarị;

¹² ọ̀ ḅụụ-gelemarị amadapụ awọmẹ ma siin iderima tẹ opu amadapụ ma tẹmẹ-naịn-naịnmarị.