Devidi-Anume 75 - FỊAFỊA BAỊBỤLỤ

Tamụnọ Anie Ḅẹrẹkọnḅọ Ḅe

¹ Yei Tamụnọ, wa ịmịẹtẹ kẹ ị́ ḅẹẹarị, wa ịmịẹtẹ tẹ kẹ ị́ ḅẹẹarị! Wa í opu la ḅara ḍuko wasamarị, pịkị ị́ mịẹ tẹ ḅụụ-buama-aị ma goarị!

² Tamụnọ ḅẹẹarị, “Àrị à ḅẹrẹkọn ḅẹ sakị tọn tẹ, nwẹnị aḍụa ofori ḅara kẹ ḅẹrẹkọn ḅa.

³ Tamụnọ tẹmẹ tẹ ḍumo wararị ye goyegoye oju sẹkịarị, tẹ kiri mẹ ḅioju sọ jikearị sọ, à mịẹ tẹ anị ḅẹ suku-saakị anga ma kụrọ-sịẹ sime ḅa.

⁴ À ḍuko si-sịḅịḅio-sụapụ ma pịrị ḅa in ḅarị opu aị ḍuko ma.

⁵ À ḍuko ịn pịrịarị mịnẹ ịn ḅarị ḅụụ-boma ma.”

⁶ Ḅẹrẹkọn ịrụa mẹ saakị pakarị anga anịanịa anị tuuideriarị anga ḅụ ḅo-a, pịkị tomikiri mẹ ọgọnọ-jụ, anịanịa anị ḅẹ suku-jụ ḅo-a;

⁷ Tamụnọ anie ḅẹrẹkọnḅọ ḅe, tẹ ḅẹrẹkọn ja apụ ḅara simarị, tẹ osi apụ ḅarị in soo ịn mịẹ ye ofori.

⁸ KỊNỊNYANAḄỌ ḅe ori ịganị ḅụ kụrọ tẹ iru kẹ kọpụ ḅio sụa ḅinma tẹ ọlọ wararị. Ori anị sara, sara tẹ kẹ si-sịḅịḅio-sụapụ mamgba pịrị ḅuuarị, in ḅuu nwenii tẹ tusuku mẹ ḅẹ kunoma mẹ sọ mẹnị ḅọrọmarị.

⁹ Kụma Jekọbụ Tamụnọ ḅe gbolomaye ḍuko ḅụ gbala-gbala à sịkọpẹlẹ ḅịa, anịanịa nume su-su ò tokini ḅụ.

¹⁰ Ò si-sịḅịḅio-sụapụ ma kụrọ mẹ kan siin ḅa, kụma karakaraye-mịẹapụ ma kụrọ tọrọkọ-tọrọkọ mu ḅa.