Devidi-Anume 74 - FỊAFỊA BAỊBỤLỤ

Sịẹ Ḍụa Ḅọrọma Gotẹ Kọn Tẹkẹ

¹ Yei Tamụnọ, tiye ẹrẹsị ị́ mị-ḅara kẹ wa kẹ gbin kuroma-so? Ị́ ịganị sime ị́ pịrị apụ ma pịrị gbamaso ḅẹ mụnọọ?

² Ị́ atomi ma kẹ ḅiokoroma, iḅere-iḅerea kụra-ḅio ị́ sẹlẹ ọkị apụ ma, omoni ḅara-ḅio ị́ pakama-ḅo tẹ kẹ sime ị́ pịrị furo-ḅẹ-apụ sọma tẹ apụ ma. Zayọnị Tụndụ kẹ ḅiokoroma-a, sakị ḅẹ gbọrụ sakị ḅụ ị́ anga yọ mẹ.

³ Mịna ye-kọnma-a ḅara kẹ kan gboloki sara wararị aị ma ọgọnọ mẹnjị saḅaa; si kẹ wa tọn apụ ma ị́ Warị mẹ ḅio sime-ye, sime-ye guluguluma fama tẹ.

⁴ Si kẹ ị́ tọn apụ ma ị́ Warị ḅio sime tẹ olokum owu-ḅara-iḅi ḅụ; ini ịna arụ pike-ḅịtẹ kẹ anịanga pike tẹ owu-ḅara-iḅi elekima ḅara ḅụ.

⁵ Ḍiki-tọrụ ḅụ ịn kịkaye opu asịn pẹlẹ apụ, tẹ ịna akumbu kẹ sịn ma pẹlẹ, pẹlẹ-gbin-arị.

⁶ Ḍụḅọ tẹ kẹ warị mẹ ḅirima aị mamgba ini ịna akumbu na opu amana ma na kẹ fomu kan famam.

⁷ Ịn nwẹnị ị́ Warị mẹ kan kọsịma tẹ fịnị kẹ anị dọkịmam; tomi sunsin ị́ pịrị-pịrị anga mẹ ini anị pilemam.

⁸ In ḅiim wa gbẹẹ kọsịma fama; amakiri mẹ ḅụ fịafịa yọ tẹ ịn dọkịma-a anga ofori.

⁹ Fịafịa aị elekima tẹ wa nyana aị mamgba so tẹ; ịkịankoroapụ ḅụ kọn ḅọ ofori, tẹ gbọrụḅọ-sọ nimi-a miemẹ sime mu la ḅẹ sakị.

¹⁰ Yei Tamụnọ, si kẹ wa tọn apụ ma ị́ ḍẹrị nwenii mu tọ sakị la ḅẹ? Ini ị́ ẹrẹ mẹ guluguluma gbamaso ḅẹ mụnọọ?

¹¹ Tiye ẹrẹsị ị́ ḅarasụa wa pịrị ḍụkụ-a? Tiye ẹrẹsị ị́ ị́ aḅara kẹ ọḅụ pịrị tẹ simearị?

¹² Yei Tamụnọ, sukuyọ-saakị kụra-ḅio, kọkọ wamịna amadaḅọ; ị́ tọnwa asakị kẹ wa ḅọrọma tịya.

¹³ Amịna opu kụrọ mẹ kẹ tọrụ mẹ kẹ maa anga puu tẹ minji ḅio ḅẹ opu anama asịḅị kan, kan kọsịma ḅọ kọkọ ị́yẹrị;

¹⁴ ị́yẹrị opu nama Lẹvịyatanị ḅe asịḅị kọsịmam, tẹ nwẹnị ori oju mẹ kẹ ịkpa ḅio ḅẹ anama koko.

¹⁵ Pịrị ọgọnọ ḅẹ okolo ma na ngụngụḅa ma na ḅụ minji pakamarị ḅọ; opu atọrụ ma mịẹ tẹ arị kụlụkụlụ-kpaịkpaị ḅọ ị́yẹrị.

¹⁶ Ị́yẹrị ḍin na eneḅaka na tọnm, ị́yẹrị ịrụa mẹ na akalụ mẹ na kẹ arị sime anga wẹrị;

¹⁷ ị́yẹrị kpongbo-kiri mẹ daasịẹ ḅẹ anga tọnm, ị́yẹrị ịrụa-kụra na fẹngụ na mịẹm.

¹⁸ Kụma kẹ ḅiokoroma, Yei KỊNỊNYANAḄỌ, mịnẹ si kẹ ị́ tọn apụ ma ị́ ḍẹrịarị, mịnẹ ịn Tamụnọ nimi-a, ịn pịkị í ḍiki-simarị.

¹⁹ Ị́ atomi tẹ ḅarasụa ḅiiarị apụ ma kẹ gbin kuroma si kẹ ịn tọn-arị tẹ kụrọ-kụrọ ḅara kẹ ini na mịẹarị apụ ma pịrị ma, ị́ atomi tẹ kịnị ịn ḅaa ḅẹ ḍọkịarị apụ ma kẹ ḅioḅọrọma ma!

²⁰ Ị́ wamịnị na fị tẹ ọḅọkụ mẹ kẹ ḅiokoroma-a. Amakiri mẹ ḅụ kpiti wararị ịkọlị goyegoye ḅụ gbiri-gbiri-gbiri emi.

²¹ Ḍụkụ tẹ kịnị ponomarị apụ ma ḅụụ-jịrị ḅụ sọma; yee ini igoin tẹ mịẹ ḅẹ ọkụ ofori apụ ma í tokini.

²² Tamụnọ, ị́ ḅụụ jike saakị tẹ ị́ ḅụụ ḍụa! Kẹ ḅiokoroma mịnẹ Tamụnọ nimi-a apụ ị́ ḍẹrịarị bebe ene mẹ ḅụ.

²³ Si kẹ ị́ tọn apụ ịganị, ịganị tẹ olokuarị aị ma kẹ ḅioḅọrọma ma; owu kẹ ị́ na sọarị apụ ma ḍụkụ tẹ ḅeri ḅarịye naa-a gbamasoarị ye mẹ.