Devidi-Anume 73 - FỊAFỊA BAỊBỤLỤ

TẸRẸỊ KARAMA ḌIRI (Nume 73—89) Inoma Ḍụkụ-a Tamụnọ

¹ Karakara-ḅara-ḅụ Tamụnọ ori iḅim Izirẹlị ḅụ, ini ma tẹ fịafịa aḅioḅẹngbọ nyana apụ ma ḅụ.

² Kụma kẹlẹ kọnm à ḅarị gbọrụ ḅiokpọ sọ nyana-a so tẹ, à nyana minini sọ ị̀ ḅụụ ḅio so fama ḅẹ tọnm,

³ àrị afana tẹmẹ nyana ḅụụ-gelema apụ ma pịrịm ẹrẹsị, à ye si-sịḅịḅio-sụapụ ma na iḅi ye ẹrị sakị.

⁴ Ini akụ ye da-a; ịna oju kụrọ wararị tẹ ịn pịkị obi-a.

⁵ Ja atomi tọrụsiẹrịarị ḅara ini ini ọkọ kẹ tọrụsiẹrị; osi apụ nyanarị ḅụụ-fụka ma ini ịn nyana-a.

⁶ Tẹ anie ḅụ ịn ḅụụ-gelema kẹ pọkọsụaye sọma tẹ sụarị tẹ gbiri-gbiri-gbiri anie gbala ịna kapa;

⁷ ịna aḅioḅẹngbọ si ọsụma, ọsụma sararị, tẹ ịna akuroma ḅụ ịn tọn tẹ mịẹ ḅẹ si-sịḅịḅio amịẹaị nwẹnị mẹnjịma-mẹnjịmarị.

⁸ Ịn ja atomi ḍẹrị-ḍẹrị tẹ si-aị ḍukoarị; ịn ḅụụ-gelema tẹ ịn kẹ osi apụ ponoma ḅẹ aḅẹrẹ ḅịyarị.

⁹ In siye ḍuko So-ḅio simearị Tamụnọ ḅe ọgọnọ gbanarị tẹ ḅụụ-gelema ẹkwẹn kẹ ḅẹrẹtọn, tọn tomikiri ḅẹ atomi pịrịarị,

¹⁰ anie mịẹ tẹ Tamụnọ atomi sọ pịkị tẹ ịn dama-muarị tẹ ḅio-sẹsẹ ḅara kẹ in ḍuko ye ḍuko ye mininiarị.

¹¹ Ịn ḅẹẹarị, “Tamụnọ ò nimi ḅịa; Gele Tẹịnḅọ ḅe ọ̀ ḍọkị-nimi ḅịa.”

¹² Anị ḅara mie si-sịḅịḅio-sụapụ ma kịkarị ḅara. Ịn nyana sara wararị tẹ pịkị sakị mamgba ja aị, ja aị nyanarị.

¹³ Ọkọ ḅẹ kụma arị ị̀ ḅụụ wẹrị kpaịnma tẹ si mịẹ-a ye mẹ papaa ye sọ tịya?

¹⁴ Yei Tamụnọ, ị́ ị̀ mịẹ tẹ à bebe ene mẹ kẹ tọrụsiẹrị tẹ; dede goyegoye ị́ fomu-ḅara kẹ ị̀ pịrị tẹ.

¹⁵ Àrị ọkọ sime aị ḍukom ḅẹḅẹ, à ḅarị ị́ atomi ma ḅẹ gbọrụḅọ ḅara kẹ ye mịẹ-a.

¹⁶ Mị ḅụụ-fụkamaye mẹ à ḅụụkụrọma tẹ anị kẹ ḅiokoroma tẹ anị ḅẹ sịḅị nimi ḅẹ ḍọkịm; kụma anị kụrọ ì nimi nẹngị,

¹⁷ nwenii àrị ị́ Warị mẹ so mum. Anịtẹso à nwẹnị si-sịḅịḅio-sụapụ ma ḅụ paka ḅarịye mẹ fiearị ye naa.

¹⁸ Ị́ ịn kẹ sịnịnị akiri sịẹma ḅa tẹ mịẹ tẹ ịn ḅịkị fịị gulugulu ḅa.

¹⁹ Kirikiri in gulugulu tẹẹ; ini ideri koro mu ḅalafama kunoma laarị.

²⁰ Yei KỊNỊNYANAḄỌ, ịn kịkarị ye dede-ḅio ḅụ kẹ ḅioḅọrọmarị ḍawọ; ị́ ị́ ḅụụ jike saakịmarị sakị ini ịmaịn-faarị.

²¹ Akụtẹ akuroma ị̀ ḅụụ ḅio emi tẹ ye ị̀ ḅụụ-ḅẹsọ sakị,

²² nama oḅori-sọ ḅara à nwẹn kẹ oḅori-sọm; arị ị̀ naa ḍin-a.

²³ Anịsọ à sakị mamgba ị́ akaka emi, tẹ ị́ ḅara kẹ ị̀ ọlọ wararị.

²⁴ À mịẹ ḅẹ tẹ í ḍuko ị̀ pịrịarị ye mẹ ị̀ datụkụmarị, tẹ anị ḅẹ kunoma ḅụ ị́ kụn nyana ḅara kẹ ị̀ daa-ọkị ḅa.

²⁵ Jen tẹ à nyana ye tiye So-ḅio, í sikima tẹ? Àrị ị́ nyana wararị sakị goyegoye, àrị inetẹ nyana ḅii ḅẹ jen ye pịkị tiye tomikiri ḅụ?

²⁶ Ịnyọ ị̀ kuroma na ị̀ meni-oju mẹ na ta ḅa; kụma Tamụnọ anie ị̀ ịnyọ à nyana tẹ ḅii ḅẹ ye mamgba, ḅẹẹ-sakị ḅẹẹ-sakị ḅụ, anie ori.

²⁷ Piki-pikiye-ofori ḅara ị́ ḅụ mangị-so apụ ma ịn fịị fa ḅa; ḅioḅẹngbọ-kẹ-sịrẹrẹ-niḅi-a ḅara kẹ ị́ na mịẹ apụ ma ị́ ịn ḅaa guluguluma ḅa.

²⁸ Yẹrị kịngẹ kụma, à Tamụnọ na kpeki ye mẹ ḅụụ-buama ḅara ḍiki, tẹ Kụrọ-nyana tẹịn KỊNỊNYANAḄỌ ḅe nwẹnị ì kikimaḅọ sọ, tẹ arị ọ̀ kọrị tẹ aị mamgba ḍuko wasama!