Devidi-Anume 72 - FỊAFỊA BAỊBỤLỤ

Kọn Amadaḅọ Ḅe Pịrị Tẹkẹ

¹ Yei Tamụnọ, ị́ karakara mịẹ mẹ kẹ amadaḅọ ḅe toluma tẹ ọ̀ kẹ ḅẹrẹkọn; yee ori ị́ na sọ tẹ aḍụa ofori ḅẹrẹkọn,

² mịẹ tẹ ori aḍụa ofori ḅara kẹ ḅẹrẹtọn ị́ atomi ma pịrị ḅarị ḅara, pịkị karakara mịẹ ḅụ ja apụ ponomarị apụ ma ḍikiḍiki.

³ Yee amakiri mẹ lolo ḅụ ḍereku, yee inweni-mgba nimi mịnẹ anị ḅio karakara mịẹ emi.

⁴ Yee amadaḅọ ḅe iḅi ḅẹrẹ kọn igoin-apụ ma pịrị; yee ọ̀ ḅarasụa mịẹ ḅẹ ọkụ ofori apụ ma pịrị tẹ mịẹ tẹ owu in ponomarị apụ ma ḅara si.

⁵ Yee ị́ atomi ma sunsin ị́ pịrị ịrụa mẹ ḅịyarị sakị goyegoye, akalụ mẹ ḅịya tẹ bele pịrịarị sakị goyegoye, mu tọrọkọ-jụ ḅụọ, ḅụọ mamgba la.

⁶ Yee amadaḅọ ḅe ye-ḍiḅi wararị ḍụọ mẹ ọgọnọ koroarị eene kịka, yee ọ̀ kiri ọgọnọ sararị nwẹịn-nwẹịn eene kịka.

⁷ Yee ori ama-daarị sakị mẹ ḅụ karakara mịẹ ama mẹ ḅio kama, tẹ lọkọlọkọ pịkị sime akalụ mẹ ḅịya mu la sakị, la sakị la.

⁸ Ori ama-daarị anga mẹ gbọrụ abajị ḅụ mu jen abajị la ḅa, Yuferetisi tọrụ ḅụ ọkị mu kiri kunoma anga ma la ḅa,

⁹ Ịkpa ḅio ḅẹ apụ ma ọ̀ tọrọkọ iḅo ḅa; si kẹ ọ̀ tọn-arị apụ amịna aḅụụ sẹma-kiri-gbin ḅa.

¹⁰ Sipeni na sọ, sọ ma na ḅụ ama-daarị apụ ma ḍiepịrị-aị kẹ ọ̀ pịrị ḅa; Arebịya na Ẹtịyopịya na ḅẹ amadapụ ma agbamịẹ-aị kẹ ḅo ọ̀ pịrị ḅa.

¹¹ Amadapụ mamgba ọ̀ tọrọkọ iḅo ḅa; sịẹ-sịẹ mamgba fịrịmẹnjị ọ̀ pịrị ḅa.

¹² Ori ọ̀ sịn-arị igoin-apụ ma pụkọ-pakamaḅoarị, pịkị mịẹ, ḅẹ, ọkụ ofori tẹ gbọrụḅọ-sọ bala-a apụ ma sọ.

¹³ Ịnyọ ḅụụ ḅụ fa tẹ pịkị igoin wararị apụ ma ori ọkụrụkụrụ nyana ịn pịrịarị; ọ̀ mịẹ ḅẹ ọkụ ofori apụ ma aḍumo ḅọrọmarị.

¹⁴ Ponoma na gbiri-gbiri-gbiri na ḅio ori ịn pụkọ-pakamaḅoarị; ịna aḍumo kpọma ọ̀ ḅụụ yela wararị.

¹⁵ Nangwọ ḍumo sime amadaḅọ ḅe pịrịị! Yee kịnị Arebịya ḅụ ḅo golu kẹ ọ̀ pịrị; yee tomi tẹkẹ ọ̀ pịrị sakị mamgba; yee Tamụnọ aboma ori ọgọnọ sime sakị mamgba!

¹⁶ Yee amakiri mẹ kpọma tọnwa mbịaka pakama; yee ḍiḅi pakama-ḅo tẹ soku-ḅẹ afịaị ma tụndụ ma gbaịn, Lẹbanọnị ḅẹ aị kpọma sụa sara ḅara pembe ḅara. Yee opu ama ma ḅio tomi ḅin, ye-ḍiḅi akiri ḅụ osuka paka ḅin ḅara kịka ḅara.

¹⁷ Yee gbala-gbala kịnị amadaḅọ ḅe ẹrẹ kẹ ḅioḅọrọma ma; yee ori ereso mu ịrụa ḅịya mu la ene, la ene la. Yee sịẹ-sịẹ mamgba ò tokini, yee ịn Tamụnọ ḅẹ ori in boma tẹ yee in ḅii, mịnẹ amadaḅọ ḅe ḅioḅẹlẹ.

¹⁸ Ọ̀ KỊNỊNYANAḄỌ ḅe tokini, Izirẹlịapụ tẹkẹarị Tamụnọ ḅe! Ori ngẹrị mie mịna ḅụụ-buama-aị ma mịẹarị.

¹⁹ Ọmịnị ori ebube ẹrẹ mẹ tokini mu ḅẹẹ-sakị ḅẹẹ-sakị la! Yee ori ebube bebe tomikiri mẹ ḅin. Amẹnị! Amẹnị!

²⁰ Mie Devidi, Jese tụḅọ ḅe atẹkẹ ma kunoma anga.