Devidi-Anume 7 - FỊAFỊA BAỊBỤLỤ

Karakara Ḅẹrẹkọn Gotẹ Kọn Tẹkẹ

¹ Yei KỊNỊNYANAḄỌ, ị̀ Tamụnọ, àrị ị́ ḍọkụma-ḅom, ị̀ gbaịn ḅọrọma-a: ì ḍukarị apụ mamgba ḅara-ḅio ị̀ pụkọ-pakamaḅo tẹ ị̀ ḅọrọmaa,

² ọkọ-a kụma ini ì dogi-so ḅa, ọkụkụ nama kun so ḅara, anịanga gbọrụḅọ-sọ inetẹ ị̀ ḅọrọma ḅịa, tẹ ini ị̀ kanị-kọsịma ḅa.

³ Yei KỊNỊNYANAḄỌ, ị̀ Tamụnọ, jen sakị à si kẹ mịẹ tẹ ḅọ emi tẹ ḅẹrẹ-ḅarasii nyana tẹ ḅẹḅẹ;

⁴ jen sakị à si kẹ ị̀ na dein ḅụ simearị ḅọ mịẹ tẹ ḅẹḅẹ mịẹ tẹ ḅẹḅẹ, anịanịa à kura-a ḅara kẹ jụmọ nye pụkọ ọkị tẹ ḅẹḅẹ,

⁵ yee si kẹ ị̀ tọn apụ ma ì ḍuka tẹ ì kun, yee ini ị̀ pẹlẹ-gbin tẹ ị̀ ḅaa tẹ ị̀ ḍụẹịn kẹ kiri-ḅio gbin kuroma tẹ so!

⁶ Yei KỊNỊNYANAḄỌ, saakịị, ị́ ịganị ḅụ! Saakị-sịẹ tẹ si kẹ ị̀ tọn-arị apụ ma na bịamaa ịna owi-ịganị mẹ ḅụ: ị́ ḅụụ jike saakị tẹ ḅarasụa ị̀ pịrị-a: karakara ḅẹrẹkọn mie í ḅiiarị,

⁷ ọkọẹrẹsị tomi kịrị-kịrị mamgba kobiri ḅo ị́ ḅụụ gborii, tẹ So-ḅio sime tẹ ḅẹrẹtọn ịn pịrịị.

⁸ Ị́yẹrị anie tomi mamgba ḅẹrẹkọnḅọ. Yei KỊNỊNYANAḄỌ, ḅẹrẹkọn ị̀ ḅara iḅimaa: í nimim à mịẹ ye ofori.

⁹ Ị́yẹrị anie kuraye mịẹarị Tamụnọ tẹ wamịna akuroma ma na wa ḅiiarị aị na kọn-arị. Si atomi ma si-sịḅịḅio mẹ dasịẹmaa tẹ iḅi kẹ iḅi-apụ ma mịẹẹ.

¹⁰ Tamụnọ anie ị̀ gbaịn-arị ḅọ: ori ọ̀ ḅịḅị pokiarị apụ ḅọrọmarị.

¹¹ Tamụnọ anie karakara ḅẹrẹkọnḅọ: tẹ sakị mamgba ọ̀ ḅẹrẹ-ḅarasii pẹlẹ si-sịḅịḅio-sụapụ ma pịrịarị.

¹² Ini ịna etela ma ḍima-a ḅẹḅẹ, Tamụnọ ori okologie farị oḅuma ḅa. Ori ori iboli nụnụ gagama tẹ anị tẹlẹma tẹ.

¹³ Ori ọ̀ kịnị-ḅaaḅa owuna-aị ma saakị ọlọ tẹẹ fịnị kọrị ḅara kọrịarị aḍịẹịn ma kẹ ọ̀ tẹịn ḅẹ apụ tụkụma tẹẹ.

¹⁴ Si-sịḅịḅio-sụa apụ ma si-aị kuroma ḅoarị ḅara ḍikii: ịn ḅụụ-fụka tọn pakama ḅo tẹ oḅori kẹ kịnị sịn amịẹaị mịẹarị.

¹⁵ Kụma in tuu jen-apụ pịrị ḍiein ma, ini rẹ mie arị kun sịẹmarị.

¹⁶ Mie ḅụ ini mịẹ si ḅarana in fomu tẹẹ, tẹ kụrọ-kụrọ mịẹ ye tẹ ịn mịẹ ye mẹ ḅo ye kẹ ịn lama tẹẹ.

¹⁷ Àrị ịmịẹtẹ kẹ KỊNỊNYANAḄỌ ḅe ḅẹẹarị ọ̀ karakara ḅẹrẹ kọn-arị gotẹ, à nume su-su KỊNỊNYANAḄỌ ḅe tokiniarị, Gele Tẹịnḅọ ḅe.