Devidi-Anume 69 - FỊAFỊA BAỊBỤLỤ

Ḅarasụa Gotẹ Kọn Owu

¹ Yei Tamụnọ, ị̀ ḅọrọmaa! Minji mẹ seri ḅo ị̀ kọngọ la tẹẹ;

² Ḅụọ sọ mu kụrọ kiri sịẹ-sịẹ-a opou ḅio à sọ faarị, tẹ kụrọ kiri gbala-gbala ofori; owolo ḅio àrị emi, tẹ ọnụngọ ì sombi ḅaa ḅẹ-yearị.

³ À ḅarasụa sịn nwenii ịnyọ ị̀ ḅụụ fa tẹẹ, tẹ ị̀ pọkọ ḅẹ ololo sọ fụkarị, à tọrụ saakị tẹ kẹ ị́ ḅarasụa ḅoarị ḅoto ḍiki nwenii ị̀ atọrụngbọ fụka tẹ.

⁴ À mịẹ ye ofori tẹ ì ḍiki-ḅioḅuarị apụ ma kịẹn-ḅịḅị ị̀ sịḅị-ḅẹ-inume kịẹn-ḅịḅị nẹngịm. Si kẹ ị̀ tọn-arị apụ ma iruo aị ḍuko ị̀ ọgọnọ gbanarị; ịn kụrọ wararị tẹ ị̀ ḅaa ḅẹ-ḅiiarị. Ini ì ponoma tẹ arị yẹrị furu-a aị pakama-ḅo ịn pịrịm.

⁵ Yei Tamụnọ, ị̀ asi ma ị́ ḅụ kikima-a, àrị oḅori-sọ la tẹ ḅara í nimi wararị.

⁶ Ḍụkụ tẹ à ḅụụ-jịrị dogi-ḅo ị́ kẹ ḅiokpọmarị apụ ma pịrị ma, kụrọmamgba nyana Opu ama-da KỊNỊNYANAḄỌ! Ḍụkụ tẹ à sunsin ị́ pịrịarị apụ ma tọrụ tuuma, Yei Izirẹlị ḅẹ Tamụnọ!

⁷ Ị́ sịḅị ẹrẹsị tomi ị̀ mịẹ-sima tẹ, tẹ ḅụụ-jịrị ị̀ gbaịn tẹ.

⁸ Ị̀ amịnapụ ma ḅụ à kịnị tọrụ nimi-a ḅọ kịka tẹ, ị̀ warị-kuḅu ḅẹ apụ ḅụ à jen sịẹ ḅẹ ḅọ kịka tẹ.

⁹ À kẹ ị́ Warị mẹ ọkị ḅara mẹ ị̀ ḅụụ ḅio sime tẹ fịnị kọrị ḅara kọrịarị; ịn kẹ ị́ mịẹ simarị aị ma ị̀ ọgọnọ sararị.

¹⁰ Àrị ị̀ ḅụụ-iderimarị ḅuru-ịmọ ḅụ, tẹ tomi nwẹnị anị kẹ ì woriarị.

¹¹ Àrị ono ḅiri tẹ tomi ị̀ ḍẹrịarị.

¹² Etela ogbo ma ḅụ tomi ị̀ kẹ ẹkwẹn-arị, tẹ iru ḅuu apụ nwẹnị ị̀ kẹ nume-suarị.

¹³ KỊNỊNYANAḄỌ, yẹrị kịngẹ kụma, àrị ị́ tẹkẹ ḅa, Tamụnọ, ị̀ pakịrịị, ị́ ḅụụ-ḅẹlẹ sakị ḅụ. Ị́ opu ḅẹlẹma mẹ ẹrẹsị ị̀ pakịrịị, ị́ kịnị ḅọrọma ḅẹ tẹ minini ye mẹ ị́ mịẹarị ẹrẹsị.

¹⁴ Opou ḅio sọ mu fa mẹ ḅụ ị̀ ḅọrọma-a; ḍụkụ tẹ si kẹ ị̀ tọn-arị apụ ma ḅara kẹ ị̀ lama ma; ḍụkụ tẹ àrị owolo ḅio fa ma.

¹⁵ Ḍụkụ tẹ ẹgẹnẹ-minji sọ ḅo ị̀ gbaịn ma; ḍụkụ tẹ à pokolo anga ma ḅio sombi fịị ma anịanịa mu ḍuḅu ḅio sọ.

¹⁶ KỊNỊNYANAḄỌ, í kuno-a ḅẹlẹma mẹ ḅẹ iḅi mẹ ḅụ, ị̀ pakịrịị; í opu ọkụrụkụrụ mẹ ḅụ, iḅi tọrụ kẹ ì ḍikii!

¹⁷ Ị́ ḅụụ kikima ị́ fịrịmẹnjịḅọ ḅe pịrị ma; opu ḅụụ-fụka ḅio àrị emii — mịọkụ ị̀ pakịrị!

¹⁸ Ḅo ị̀ la tẹ ị̀ ḅọrọma-a; si kẹ ị̀ tọn-arị apụ ma ḅara-ḅio ị̀ pụkọ-pakamaḅo.

¹⁹ Tomi kẹ ị̀ mịẹ-sima la ḅara í nimi wararị, ịn kẹ ị̀ tọrụ-tuu tẹ ị̀ kẹ kụn nyana-a kiri ḅụ kuroma la ḅara sọ; si kẹ ị̀ tọn-arị apụ mamgba ị́ ini ẹrịarị.

²⁰ Gọlị-aị ì ḅioḅẹngbọ kan saratẹ tẹ, à ḅarị tẹmẹ nyana-a. À ḍiki sịḅị-kụrụkụrụ kẹ ḅiokpọmam, kụma gberie-sọ àrị ẹrị-a; à ḅiokpọma ẹkwẹn naa ḅẹ ḅiim, kụma àrị ọkọ sime ye naa-a.

²¹ Ḅuru ị̀ tarị sakị, kịnị-ḅaaḅa ye mie ịn kẹ ị̀ pịrịye; minji ḅuu ị̀ pọkọ tarị sakị, ịn tụgbakịtẹ iru kẹ ị̀ pịrịm.

²² Yee alalị sakị ịn fịarị afịaị ma si kẹ ịn mịẹ ḅẹ aị sọ; yee ịn fịarị fịafịa alalị nwẹn ḅẹẹ aị ma ịn sukuruma-gbin ḅe aị sọ.

²³ Ịna atọrụngbọ pụnma! Mịẹtẹ ịna oḅukulo ḅẹ mgbe ma kpọkọrọ-kpọkọrọ.

²⁴ Ị́ ịganị ọsụma ịna ọgọnọ sara; ḍụkụ tẹ ịn mangị í opu ịganị mẹ ḅọrọma.

²⁵ Yee ịna akpụrụ-awarị in kobiri tẹ simearị anga mẹ ḅụ kịnị mamgba mangị-so; yee gbọrụḅọ-sọ ḍumo sime ma ịna akpụrụ-awarị ma ḅio.

²⁶ Ị́yẹrị fomu-ḅara kẹ pịrị tẹ so tẹ apụ mie ịn ḅaa-ḅọkọ kẹ ḍọkịarị; ye kẹ lamatẹ so tẹ apụ ma mie ini ịna ḅụụ-fụka kẹ ẹkwẹn pịrịarị.

²⁷ Ịna asi mamgba kẹ elekima sụa; ḍụkụ tẹ ị́ ḅọrọma ḅụ ịn ḍiekiri nyana ma.

²⁸ Yee ḍumo wararị apụ ẹrẹ ma simearị ḍiri mẹ ḅio ịna ẹrẹ ma kụrọrọ so; yee ini ị́ atomi ma kịẹn-ḅịḅị ḅụ sọma.

²⁹ Kụma fụka-ye ị̀ ḅaarị, tẹ à ḅarị tẹmẹ nyana-a; Yei Tamụnọ, ị̀ saakị sịẹma, tẹ ị̀ ḅọrọma-a!

³⁰ À nume-su Tamụnọ tokini ḅa; àrị ori opu mẹ ḍuko wasama ḅa, ịmịẹtẹ kẹ ọ̀ ḅẹ ḅụ.

³¹ Miemẹ KỊNỊNYANAḄỌ ḅe ḅụụ-ḅẹlẹ asambịrịma anambulo kẹ mịẹ agba nẹngị ḅa, pịkị ḍụḅa famatẹ nambulo kẹ mịẹ agba sọ nẹngị ḅa.

³² Tomi ponomarị apụ ma mie mẹ ẹrị sakị in ḅioḅẹlẹ ḅa; sunsin Tamụnọ pịrịarị apụ ma nwẹnị ḅiokpọ nyana ḅa.

³³ KỊNỊNYANAḄỌ ḅe mịẹ ḅẹ ọkụ ofori apụ ma ḍukoarị aị pokiarị, ọ̀ pịkị ikoli-warị ḅio simearị apụ ma kẹ ḅioḅọrọma-a.

³⁴ Yei So na Kiri na, ọ́ Tamụnọ tokinii, yee abajị ma na arị aḅio Tamụnọ tẹmẹ kuroma wararị aị mamgba na sọ ò tokini.

³⁵ Ò Jeruselemu ḅọrọma tẹ siin Juda ḅẹ ama ma nama ḅa. Ori atomi ma anịanga anga tẹ anị kẹ ịna amakiri sọma ḅa;

³⁶ ori afịrịmẹnjịapụ ma furo-ḅẹ-apụ ma anị nyana ọkị ḅa ḍuu ḅara ḅụ, tẹ ọ̀ ḅẹlẹmarịapụ ma anịanga anga ḅa.