Devidi-Anume 68 - FỊAFỊA BAỊBỤLỤ

Sịẹ Owu-ḅara-iḅi Ḅụ Su Nume

¹ Tamụnọ saakị-sịẹ tẹ si kẹ ọ̀ tọn apụ ma gala-galamarị. Ò ḍiki-ḅioḅuarị apụ ma owu-ḅara-sii ḅụ mangị-soarị.

² Fẹrụ onwi ofuro siin-arị ḅara mie ọ̀ kẹ ịn dee ḅelemarị ḅara; agba fịnị na kpeki tẹ sanị ḅara mie si-sịḅịḅio-sụapụ ma Tamụnọ tọrọkọ ḅụ fịị faarị ḅara.

³ Kụma karakaraye-mịẹapụ ma ḅioḅẹlẹ tẹ ḍerekuarị ọ̀ tọrọkọ ḅụ; in ḅioḅẹlẹ tẹ olokuarị ḍereku ḅụ.

⁴ Nume su Tamụnọ bomaa, tokini anume su ori ẹrẹ bomaa; mẹnjị-ḅọrọ-anga tẹlẹma ọ̀ pịrị, oḅuto ọgọnọ mẹnjịarị ḅọ ḅe. KỊNỊNYANAḄỌ anie ori ẹrẹ tọrọkọ ḅụ ḅioḅẹlẹ!

⁵ Amịna fịafịa Warị ḅio angarị Tamụnọ ḅe, ḍapụ na iyingiapụ na fịtẹ awọmẹ kokoarị, ọ̀ pịkị diapụ-fịtẹ-ereme gbaịn ḅọrọmarị.

⁶ Ori mie sime-yọ kẹ ngẹrị ḅọ mẹ pịrị angarị, tẹ ọ̀ pịkị ikoliapụ ma ḅọrọma pakama-ḅo tẹ ịn ḅioḅẹlẹarị, kụma kọngọ kụrọ maa apụ ma ini ngẹrị kịnị ofori anga ḅụ ḅụụ-yaụ ḅụ anga ḅa.

⁷ Yei Tamụnọ, ị́ ị́ atomi ma tọrọkọ-sụn sime sakị, ị́ mẹnjị ịkpa mẹ saḅa sakị,

⁸ kiri mẹ jikem, So-tọrụ pịkị eene ọsụma saram, Sayịnayị Tamụnọ ḅe ḅoarị ẹrẹsị, Izirẹlịapụ tẹkẹarị Tamụnọ ḅe ḅoarị ẹrẹsị.

⁹ Ị́ mịẹ tẹ eene opuma korom, tẹ í ye pakama-a kiri mẹ ḅo ye pakama;

¹⁰ ị́ atomi ma anịanga kẹ ịna sime-yọ mị; í iḅi ḅụ í igoin-apụ ma kẹ anga ḅẹ aị kẹ ịn pịrịm.

¹¹ KỊNỊNYANAḄỌ ḅe tọnm, tẹ tọnwa ereme nwẹnị mu oku mẹ ḍuko kịnị pịrị mịnẹ:

¹² “Amadapụ ma na ịna ọmụ-ogbo ma na mangị, mangị-soarị!” Warị ḅio sime-ereme mie ọmụ ḅio fọịn ḅo aị ma ḍie ọkị ye:

¹³ tomi seleḅa kẹ olosịkịya kịkama tẹmẹ-aị sọ simem, tẹ pamba ma pịkị golu-golu ḅịyam. (Tiye ẹrẹsị ọmịna ḅụ ḅẹ ja apụ ọmụgbin ene mẹ ḅụ anana koko anga ma ḅụ sime?)

¹⁴ Kụrọmamgba nyana Tamụnọ ḅe Zalimọnị Tụndụ ọgọnọ ḅụ amadapụ ma gala-galama sakị, ọ̀ mịẹ tẹ eene mgbọlị saram anịanga ḅụ.

¹⁵ Basani tụndụ mẹ ḍụḅa la opu ḅara ḍiki, tọnwa tọpị-tọpịtẹ-anga nyana wararị tụndụ mẹ!

¹⁶ Tiye ẹrẹsị ị́ ị́ tụndụ mẹ opu tọpị-tọpịtẹ-anga ma ḅụ sime tẹ Tamụnọ sẹlẹ ọkị tẹ anga ḅẹ tụndụ mẹ ḍiki iderimarị ḍiki-sima ḅụ, ọkọ kẹ Tamụnọ anga ḅẹ tẹ sẹlẹ ọkị tụndụ mẹ ḍikiarị? Anịanga mie KỊNỊNYANAḄỌ ḅe anga mu ḅẹẹ-sakị ḅẹẹ-sakị la ḅarịye.

¹⁷ Ẹndẹ-ẹndẹ, tọnwa opu kụrọ tẹ kiri mẹnjị ọmụ-arụ mie KỊNỊNYANAḄỌ ḅe kẹ Sayịnayị ḅụ sime tẹ ọ̀ fịafịa-yọ mẹ sọ-ḅoarị.

¹⁸ Ori iwo gele anga ma muarị, ọmụ ḅio ò kun-ḅo tọnwa-apụ ma na ori na, kọngọ kụrọma atomi ma aḅara ò ḍiepịrị-aị daa-ọkịarị. KỊNỊNYANAḄỌ, Tamụnọ ḅe, anị yọ anga ḅa.

¹⁹ Ọ̀ KỊNỊNYANAḄỌ ḅe tokinii, anie ene-ḅaaene-ḅaaene wamịna ḅụụ-fụka ma dogiarị ḅọ ḅe; ori anie wa ḅọrọmarị Tamụnọ ḅe.

²⁰ Wamịna Tamụnọ ḅe anie kịnị ḅọrọmarị Tamụnọ; ori anie KỊNỊNYANAḄỌ, wa Nyanaḅọ ḅe, tẹ fịị ḅio wa pụkọ-pakamaḅoarị ḅọ ḅe.

²¹ Piki-pikiye-ofori ḅara ḅụ Tamụnọ si kẹ ọ̀ tọn-arị apụ asịḅị fomu kan ḅa, ini ma tẹ ḍụkụ-a tẹ paa ịna si etela ma ḅụ simearị apụ ma.

²² KỊNỊNYANAḄỌ ḅe ḅẹẹ tẹẹ, “À Basani ḅụ si kẹ ọ̀ tọn apụ ma pịkịma-ḅo ḅa; abajị owolo ma ḅio ḅụ sime apụ sọ arị ịn pịkịma ḅo ḅa;

²³ à mịẹ tẹ ọmịnị ịna ọmbie kẹ minji sọma tẹ anị ḅio mẹnjịma, mẹnjịma ḅa, tẹ ọmịna obiri ma in ḅii ḅara, ḅii ḅara kẹ anị mẹnị ḅa.”

²⁴ Yei Tamụnọ, í owu-ḅara-iḅi ọgbụrụ-sụn mẹnjị mẹ inweni-mgba ẹrị tẹ, Tamụnọ, ị̀ amadaḅọ ḅe ọgbụrụ-sụn mẹnjị mẹ tẹ ị́ fịafịa-yọ mẹ sọ ḅẹ-muarị ye mẹ.

²⁵ Nume su apụ ma tọrọkọ emi, ye ofuro apụ ma ọḅụjụ, ịna ogboku akwa farị eremịna-awọmẹ ma emi.

²⁶ “Ọ́ Tamụnọ tokinii, ori atomi kobiri wararị anga ḅụ; ọ̀ KỊNỊNYANAḄỌ ḅe tokinii, ọmịnị Jekọbụ furo-ḅẹ-apụ mamgba!”

²⁷ Benijamịnị tarị ḅoarị, ịrụ tẹịn furo mẹ, tẹso, Juda ḅẹ sịḅịdapụ na ịna ogbo na ḅom, Zẹbulọnị na Nafutali na sịḅịdapụ nwẹnị ịn palị.

²⁸ Yei Tamụnọ, ị́ kụrọ ḍie-pakamaa, ị́ kẹ nama kọrị wa pịrị tẹ kụrọ mẹ

²⁹ ị́ Warị mẹ ḅụ Jeruselemu ḅụ, anie amadapụ ḍiepịrị-aị kẹ ḅo ị́ pịrị-pịrị anga mẹ.

³⁰ Ijiputi ḍiki-ịganịị, anie asịra ḅio angarị piri-ḅio-ḅẹ nama ḅe; sịẹ-sịẹ ma ḍiki-ịganịị, anie nambulo ogbo mẹ na ịna awọmẹ ma na, nwenii inimgba sịḅị-tuu kiri lama tẹ ịna seleḅa kẹ ị́ pịrị. Ọmụ gbin ḅẹlẹmarịapụ ma gala-galama!

³¹ Amịna asịẹ tọrụ ḍima tẹ ja sịẹ ḅụ simearị apụ ma Ijiputi ḅụ sime tẹ ḅo ḅa; Sudanị ḅẹ apụ ma amịna aḅara saakị-gelema tẹ Tamụnọ tẹkẹ ḅa.

³² Ọmịnị tomikiri ḅẹ amadapụ ma ama-daarị anga mamgba, ó nume-su Tamụnọ bomaa; ó nume-su KỊNỊNYANAḄỌ ḅe tokinii,

³³ ó su So-tọrụ mẹnjịarị ḅọ ḅe bomaa elemu sakị kụra-ḅio emi So-tọrụ mẹ. Ọmịnị ori opu ma oloku tẹ fiearị ye mẹ pokii.

³⁴ Ọ́ Tamụnọ kụrọ mẹ ḍuko-wasamaa; ori opu na ḅaka na nyana wararị Izirẹlị ḅụ, ori opu kụrọ mẹ So-tọrụ ḅụ emi.

³⁵ Ori ọ̀ fịafịa yọ mẹ ḅụ sime tẹ ḅoarị ḅara ḅụụ-gbiripuma ḅara ḍikii — Izirẹlịapụ tẹkẹarị Tamụnọ ḅe! Ori ịnyọ na kụrọ na kẹ ori atomi pịrịarị. Ọ́ Tamụnọ tokinii!