Devidi-Anume 65 - FỊAFỊA BAỊBỤLỤ

Tokini Na Ịmịẹtẹ Ḅẹ Na

¹ Yei Tamụnọ, anị kuram wa Zayọnị ḅụ sime tẹ í tokini tẹ wa minini ị́ pịrị-aị ma mị,

² ị́ tẹkẹ pakịrịarị ẹrẹsị. Anga, anga ḅụ kịnị sime tẹ ị́ ḍọkụma-ḅo ḅa,

³ ịna asi gotẹ. Wamịna amịẹ-kọn ma wa nẹngịmarị, kụma arị wẹrịso wa pịrịarị.

⁴ Ị́yẹrị sẹlẹ ọkịarị apụ ma ḅioḅẹlẹ sime ịn pịrịm anie ị́ kẹ ḅo tẹ ị́ fịafịa yọ mẹ ḅụ angarị apụ ma. Ị́ warị ḅio simearị iḅi aị ma wamịnị na-iḅi ḅa, ị́ Fịafịa Warị mẹ ḅẹ aboma ma.

⁵ Ị́ owu-ḅara-iḅi kẹ wa pịrị ḅụ ḅọrọ tẹ wa pakịrịarị, tẹ ị́ ḅụụ-buama-aị mịẹ-mịẹ tẹ kẹ wa ḅọrọmarị. Tomikiri ḅẹ apụ mamgba, pịkị iḅere-iḅerea anga tẹ abajị saḅa ḅụ simearị apụ sọ, ị́ kẹ ḅiokpọmarị

⁶ Ị́ ịnyọ ḅụ ị́ ḅọrọ tẹ tụndụ ma kẹ ọrụtọn wẹrịm, kẹ í opu kụrọ mẹ ḍie-pakamarị.

⁷ Abajị ma ḍarịarị sakị arị deinmarị, pịkị ọnụngọ ma ḅẹ fie mẹ sọ; Tomi ma ḍụrụkụarị ye mẹ sọ í deinmarị.

⁸ Bebe tomikiri mẹ ị́ kọrị tẹ opu akọrịnama ma ḅụ ḅụụ-gbiripu ḅụ sịẹsime wararị. Ị́ kọrị tẹ aị ma nwẹnị ḍereku oloku dogi-ḅoarị, tomikiri mẹ ḅẹ gbọrụ ịkọlị ḅụ mu osi jụ la.

⁹ Í eene kẹ fịrịma tẹ ḍie pakamarị mịnẹ kiri mẹ ḍikiḍikiarị; ị́ mịẹ tẹ anị iḅiọkụ fịaị pakamarị. Piri ọgọnọ ḅẹ atọrụ ma ḅụ í minji sụa ḅinma tẹ; tẹ ị́ mịẹ tẹ kiri mẹ fịaị pakamarị. Mie ị́ wẹrị anị kọrịarị ḅara:

¹⁰ Ye ḍiḅi ḅẹ tẹ soku tẹ aḍụọ ma ḅụ í gburo-gburoma eene ọsụma sararị, tẹ minji kẹ arị pisima tẹlẹmarị; í igirigi kẹ kiri mẹ lọkọmarị, tẹ mịẹ tẹ ịwọma ḍiḅi asịn ma so-pakarị.

¹¹ Í iḅi mẹ mịẹ tẹ fịye soku sakị mẹ ḅụ ye lolo ḅara kẹ paka-ḅoarị ḅara ḍiki! Í mu anga, mu anga fịaị ḅakam.

¹² Nama osuka fị-fị anga ma ḅụ nama ogbo-ogbo ḅin wararị; tụndụ ma akaka mamgba ḅụ ḍereku ḅin wararị.

¹³ Ḍụọ ma ḅio mamgba anana-anana-anana; Tụndụ ogboku ma ḅẹ lẹsẹrẹ-akiri ma ḅụ mbịaka sụa sara wararị. Ye goyegoye oloku-oloku nume su-su tẹ ḍerekuarị.