Devidi-Anume 64 - FỊAFỊA BAỊBỤLỤ

Tamụnọ Tomḅọ Gbaịn Ḅẹ Tẹkẹ

¹ Tamụnọ, ḅụụ-fụka ị̀ la tẹẹ à kọn-arị tẹkẹ pokii! Si kẹ ị̀ tọn-arị apụ ma ị̀ ḅalafamarị ì ḍumo ḅọrọma-a!

² Si-sịḅịḅio-sụa apụ ma ḅịyarị aḅẹrẹ ma ḅụ ị̀ gbaịn, si-mịẹapụ ogbo-ogbo ma ḅụ sọ.

³ Ini okologie farị ḅara kẹ ịna aḅẹlẹ farị oḅumarị tẹ ḍịn kẹ ye da tẹ tẹịn ḅẹ ḅara kẹ ịna si ẹkwẹn ma kẹ kịnị daarị.

⁴ Ịn ḅụụ-jịrị-a tẹ sarama ịna iruo ẹkwẹn ma kọn wasamarị; ịn tọrụ ḅọị tẹ ọḅụ ẹkwẹn kẹ iḅi atomi gulugulumarị.

⁵ Ịn jụmọ-jụmọ ḅiokpọmarị in ḅịyarị si aḅẹrẹ ma ḅụ! Ini ịna ḍiein ma tuu wẹrị ḅẹ anga tọn pẹlẹ tẹ ḅẹẹarị, “Gbọrụḅọ sọ inetẹ arị ẹrị ḅịa.”

⁶ Si aị mie ịn tọn pẹlẹ tẹ ḅẹẹarị, “Wa wa mịẹ ḅẹ siye tọn kpaịnma tẹ.” Tomḅọ ḅioḅẹngbọ na kuroma na anie pokolotẹ kịnị nimi-a ḅọị ye.

⁷ Kụma Tamụnọ ori aḍịẹịn kẹ ịn tẹịn-arị, tẹ ḅiotọn-a ḅara kụma ye ịn la tẹ.

⁸ Ịn kọn-arị ẹkwẹn ma ẹrẹsị ori ịn ḅaa guluguluma ḅa; ini ẹrị apụ mamgba amịna asịḅị jike ḅa.

⁹ Inimgba ḅalafa ḅa; ịn Tamụnọ mịẹ tẹ ye mẹ kẹ ḅiokoroma ḅa, tẹ ori amịẹaị ma gboloma ẹkwẹn kọn ḅa.

¹⁰ Karakaraye-mịẹapụ mamgba ḍereku ḅa KỊNỊNYANAḄỌ ḅe mịẹ tẹ ye mẹ ẹrẹsị. Ini ẹrị ḅa ini ọ̀ ḅụụ emi ogbo ye ịn la ḅịa; iḅi-apụ mamgba ò tokini ḅa.