Devidi-Anume 63 - FỊAFỊA BAỊBỤLỤ

Tamụnọ Gotẹ Ḅio-sẹsẹ

¹ Yei Tamụnọ, anie ị̀ Tamụnọ, tẹ àrị í gotẹ ḅio-sẹsẹarị. Ì bebe ḅụụ mamgba ị́ nyana ḅẹ-ḅiiarị, samụnọ-kpakịkị tẹ minji kala ye sọ ḅarị ofori kiri ọkụ, ị́ ị̀ tẹmẹ tarịarị, minji pọkọ-tarị ḅara.

² Mịẹtẹ àrị ị́ ẹrị fịafịa yọ mẹ ḅẹ; mịẹ tẹ àrị í opu kụrọ na ebube na nyana la ḅara ẹrị.

³ Í kuno-a ḅẹlẹma mẹ iḅi ḍumo ḅioju sọ nẹngịm, anịẹrẹsị àrị í tokini ḅa.

⁴ À ḍumo mu la ḅarị ene mamgba ḅụ àrị ịmịẹtẹ kẹ ị́ ḅẹ ḅa; àrị ị̀ aḅara saakị-gelema ị́ da tẹ tẹkẹ ḅa.

⁵ Ị̀ tẹmẹ alalị fị tẹ ḅụụ na-iḅi ḅa, tẹ à ḅioḅẹlẹ anume su-su í tokini ḅa.

⁶ Àrị iḅila ọgọnọ ḅọlọlọ wararị sakị àrị ị́ kẹ ḅiokoromarị; bebe ḍin mamgba í ì kuroma ḅụ emi,

⁷ sakị mamgba ị́ ḅarasụa ị̀ pịrịarị ẹrẹsị. Ị́ pamba suku-ḅio mie à sime tẹ ḍereku nume-suarị.

⁸ Àrị í fịnama sịẹma wararị, anịsakị ị́ ḅara nwẹnị ì koko kpaịnmarị.

⁹ Ị̀ ḅaa ḅẹ ḅọkọ ḍọkịarị apụ ma ini ideri Ḍuḅu ḅio mu ḅa.

¹⁰ Ọmụ ḅio mie ini ịn ḅaa ḅarịye, tẹ tuu anama ma ịna oju akpakpa ma kanị pẹị ḅa.

¹¹ Amadaḅọ ḅe ḍereku ḅa, Tamụnọ owu-ḅara-iḅi kẹ ọ̀ pịrịarị ẹrẹsị. Tamụnọ ẹrẹ ḅụ ye mininiarị apụ ma ini ò tokini ḅa, kụma iruo apụ ma aḅịḅị gbaịn ḅa.