Devidi-Anume 62 - FỊAFỊA BAỊBỤLỤ

Tamụnọ Kẹ Ḅiokpọma Ori Ị́ Gbaịn Ḅa

¹ Àrị inema tẹ Tamụnọ koruarị, ori ị̀ ḅọrọma ḅẹ ḅara; ori ngẹrị ḅụ mie à sịrẹrẹ wararị.

² Ori ngẹrị mie ị̀ gbaịn tẹ ị̀ ḅọrọmarị; ori anie ị̀ ḍụarịḅọ, tẹ gbala-gbala owu ị̀ ḅara sii ḅịa.

³ Ọmịnị-mgba owu kẹ gbọrụ tomḅọ ḅe paka mu tọ-sakị la ḅẹ; anie ḅịkị tẹ onu sọ kụrọ nẹngị-a ḅọ ḅe?

⁴ Ò simearị kụn nyana kiri mẹ ḅụ ọ̀ nụnụ iderima-ḅo kịngẹ mie ó ḅiiarị; iruo aị mie ọmịna tọrụ ḅẹlẹmarị. Boma ẹkwẹn mie ọ̀ kọn-arị, kụma ḅioḅẹngbọ ḅụ ọmịnị ò gboarị.

⁵ Tamụnọ ngẹrị ḅụ mie à sịrẹrẹ wararị; ori mie à kẹ ḅiokpọmarị.

⁶ Ori ngẹrị mie ị̀ gbaịn tẹ ị̀ ḅọrọmarị; ori mie ị̀ ḍụarịḅọ, tẹ gbala-gbala owu ị̀ ḅara sii ḅịa.

⁷ Ị̀ ḅọrọma na kụn na Tamụnọ ḅụ sịrẹrẹ wararị; ori ị̀ kụrọ tẹ gbaịn ḅọrọmaḅọ; ori ị̀ sịḅị kikima anga.

⁸ Ị̀ atomi, sakị mamgba ọ̀ Tamụnọ kẹ ḅiokpọmaa. Ọmịnị ọmịna ḅụụ-fụka mamgba ḍuko ọ̀ pịrị, gbala ori anie wamịna ḅụụ-ḅọị-yọ.

⁹ Tomikiri ḅẹ atomi mamgba kịkarị ye anie, gbọrụ ḅịḅị ḅụ sara pakamarị ọwụ; opu na kala na gbọrụ ḅara simem, papaa ye. Ịn kẹ ye-tọnye ọgọnọ gbana ḍikii, ini iku la ḅẹ gberie-sọ ofori; in feke-feke nini ḅio sara pakama-ḅoarị ọwụ mẹ nẹngịm.

¹⁰ Gbiri-gbiri-gbiri mịẹ ye kẹ ḅiokpọma ma; kụrọ-ḅara kẹ jụmọ nye ọkị kẹ ḅiokpọma ma; ị́ ngọ nwẹnị sun tọrọkọ-tọrọkọ muarị sọ, anị ḅụ sịrẹrẹ ma.

¹¹ Gbọrụ sakị nẹngị ye à nwẹn kẹ Tamụnọ ḍukoarị tẹ naa tẹẹ, mịnẹ kụrọ sime ọ̀ pịrịm,

¹² anịsakị ọ̀ ḅẹlẹma mẹ kuno-kuno-a. Yei KỊNỊNYANAḄỌ, anie ḅarana ḅẹḅọ-ḅẹḅọ amịẹaị ḍiki tẹ gbẹẹ-ye kẹ mḅọ pịrịarị.