Devidi-Anume 60 - FỊAFỊA BAỊBỤLỤ

Ḍụa-ḅọrọma Gotẹ Kọn Tẹkẹ

¹ Tamụnọ, ị́ wa sịkị tẹẹ, pịkị wa nẹngịma tẹẹ; ị́ ịganị wa pịrị tẹẹ, kụma mịọkụ pịkị-ḅo wa laa.

² Ị́ mịẹ tẹ amakiri mẹ jike tẹẹ, ị́ anị puu finji tẹẹ; mịọkụ anị ḅẹ ịnọ ma gwọ, anị kaan ḅele-ḅele-ḅelearị ẹrẹsị.

³ Ị́ mịẹ tẹ ị́ atomi ma opuma tọrụsiẹrị tẹ; wa pụmbụma-pụmbụmarị, iru ḅuu tọrụ-ḅaama apụ ọkụ.

⁴ Í í ḍiki-ḅalafarị apụ ma ḅeri nụnụ tẹ, mịẹ tẹ ịn ḅẹrẹ-ḅarasii ḅụ sọ ḅịa ḅara.

⁵ Í opu kụrọ ḅụ wa ḅọrọma-a; wamịna tẹkẹ pakịrịị, mịẹ tẹ ị́yẹrị ḅẹlẹmarị atomi ma pụkọ-pakaḅo ḅẹ ḅara.

⁶ Tamụnọ ọ̀ fịafịa yọ mẹ ḅụ sime tẹ ḅẹẹ tẹ, “Owu-ḅara-iḅi ḅụ à Sẹkẹmụ kẹ pakịrị-pakịrị ḍie ḅa, à pịkị Sukọtị nwẹn-sịn Lẹsẹrẹ-kiri mẹ puu ị̀ atomi pịrị ḅa.

⁷ Giliyadi ì nye, Manasẹ sọ ì nye, Iferemu anie ì okpoko-sun, tẹ Juda pịkị ị̀ ama-da mkpara.

⁸ Kụma à Mohabụ kẹ ị̀ ḅara sịkịrị panị mịẹ ḅa, tẹ à nwẹnị ị̀ ḅụọ ọgọnọ gbaịn-a okuro kẹ Idọmụ kiri ọgọnọ wakị kuroma ḅa, yẹrị anị nyanam nwẹn ḅẹẹ elekima ḅụ. Filisiteniapụ ma in kuromam mịnẹ ini owu kiri ḅụ ị̀ nẹngịma tẹ owu-ḅara-iḅi oloku kọn ị̀ pịrị ḅẹm aro?”

⁹ Yei Tamụnọ, tụḅọ ị̀ kẹ so kụrọnị opu ama mẹ ḅio mu ḅẹ? Tụḅọ ị̀ tọrọkọ-sụn mu Idọmụ ama lama ḅẹ?

¹⁰ Karakara-ḅara-ḅụ ị́ wa sịkị tẹ aro? Ị́ ḅarị wamịna ọmụ-ogbo-ogbo ma na mẹnjị paka ḅịa aro?

¹¹ Si kẹ wa tọn-arị apụ ma ḅụ ḅarasụa wa pịrị; tomina ḅarasụa anie papaaye.

¹² Tamụnọ wamịna pakịrị anga emi sakị goyegoye, wa owu-ḅara-iḅi nyana ḅa; ò si kẹ wa tọn-arị apụ ma nẹngịma ḅa.