Devidi-Anume 6 - FỊAFỊA BAỊBỤLỤ

Ḅụụ-fụka sakị ḅụ kẹ ḅarasụa ḅii Tẹkẹ

¹ KỊNỊNYANAḄỌ, ịganị ḅụ ì ḍiki-ịganị ma! Ị́ ịganịarị ogbo ì fomu ma!

² Yei KỊNỊNYANAḄỌ, ịnyọ ị̀ ḅụụ fa tẹẹ: ì ḍiki-sịḅị-kụrụkụrụụ! Ịnyọ kẹ ị̀ ḅụụ suu: ịnyọ ị̀ ḅụụ fa fama tẹ

³ tẹ ị̀ ḅụụ mamgba opu ḅụụ-fụka ḅio emi. Yei KỊNỊNYANAḄỌ, í koru mu tọ-sakị la tẹrẹmẹ ḅarasụa ị̀ pịrị ḅẹ?

⁴ KỊNỊNYANAḄỌ, ḅo tẹ ị̀ ḅọrọma-a; ị́ ọkụrụkụrụ ḅụ fịị ḅio ị̀ pụkọ-pakamaḅoo.

⁵ Ḍuḅu ḅio ḅụ tomḅọ ị́ kẹ ḅiokoroma-koroma-a: anịanga gbọrụḅọ-sọ inetẹ í tokini ḅịa.

⁶ Ḅioḅẹngbọ-sii ị̀ ḅaa tẹẹ; ḍin goyegoye à kọn-arị owu ì iḅila taụmarị: owu minji ị̀ sịḅị-sakịye pisima fama tẹ.

⁷ À ḅarị inetẹ iḅiọkụ ye ẹrị-a: ị̀ atọrụngbọ ma foin fama tẹ si kẹ ị̀ tọn apụ dogi-ḅo ị̀ pịrị owu gotẹ.

⁸ Ọmịnị ị̀ ḅụụ ḅụ sikimaa, si-mịẹapụ! KỊNỊNYANAḄỌ ḅe à kọn-arị owu mẹ naarị:

⁹ ori à ḅarasụa gotẹ kọn-arị owu mẹ pokiarị: tẹ ị̀ tẹkẹ pakịrị ḅa.

¹⁰ Si kẹ ị̀ tọn apụ ma owu ịna ḅara si tẹ ini opuma ḅụụ-jịrị ḅa: ḅiotọn-a ḅara ḅụ in pikiri-pikiri tẹ ini in dee siin ḅa.