Devidi-Anume 59 - FỊAFỊA BAỊBỤLỤ

Ye Tomḅọ Lama Gotẹ Kọn Tẹkẹ

¹ Ị̀ Tamụnọ, si kẹ ị̀ tọn arị apụ ma ḅara-ḅio ị̀ ḅọrọmaa; ị̀ kikimaa, owu kẹ ị̀ pakarị apụ ma ḅụ.

² Arị si-mịẹapụ ma ḅara-ḅio ị̀ ḅọrọmaa; arị kịnị ḅaa apụ ma ḅara-ḅio ị̀ pụkọ-pakamaḅoo!

³ Ḍikii! Ini ị̀ ḅaa ḅẹ tẹ koruarị; kụrọ-kụrọ ḅara kẹ kịnị na mịẹarị atomi ma kobiri ị̀ pịrị tẹẹ. À mịẹ si, anịanịa mịẹ-irima-ye tẹ in gotẹ ọkọ mịẹ ḅẹ ye ofori,

⁴ Yei KỊNỊNYANAḄỌ, pịkị ị̀ ḅụụ ḅẹ mịẹkọn ḅụ ḅo-a tẹ ịn nwẹn kẹ taka-takama mangị mu ịna akiri ḅụ sịẹarị ye mẹ.

⁵ KỊNỊNYANA-TAMỤNỌ, Kụrọ mamgba Nyanaḅọ, saakịị, tẹ ḅo ḅarasụa ị̀ pịrịị; Izirẹlị Tamụnọ, ị́yẹrị ḅarana ẹrị! Saakị tẹ oru nimi apụ ma fomuu; ọkụrụkụrụ nyana kịnị kẹ ịba-fịarị si-mịẹapụ ma pịrị ma!

⁶ Ḅoḅiri-so ḅụ ịn pịkị-ḅo tẹ opu ama mẹ ḅio obiri ḅio-fiema ḅara kẹ ḅio-fiema ma ḅọrọarị.

⁷ Ịna kịnị mịẹ-sima aị na ịna ẹrẹma aị ma na pokii. Ịna ḅịḅị-ḅio ḅẹ aḅẹlẹ ma okologie kịkarị anịsọ in kuromarị mịnẹ gbọrụḅọ so in ḍukoarị ye mẹ naa-a.

⁸ Kụma, KỊNỊNYANAḄỌ, ị́yẹrị ịn ḍẹrịị, oru nimi apụ mamgba komboo.

⁹ Àrị ị́ ịnyọ kẹ ḅiokpọmarị; Yei Tamụnọ, ị́yẹrị anie ị̀ ḅụụ-ḅọị-yọ.

¹⁰ Ị̀ Tamụnọ ḅe ị̀ ḅẹlẹmarị, ọ̀ pịkị ị̀ ḍọkụma-ḅo ḅa; ọ̀ mịẹ tẹ àrị ẹrị ḅa owu si kẹ ị̀ tọn arị apụ ma ḅara si tẹẹ.

¹¹ Yei Tamụnọ, ịn ḅaa ma, anieofori ị̀ atomi ma ḅofa kẹ ḅioḅọrọma. Ị́ ịnyọ kẹ ịn gala-galama tẹ owu ịna ḅara sii, Yei KỊNỊNYANAḄỌ, wa gbaịn ḅọrọmaḅọ.

¹² Ịna ḅịḅị apakịrị ọgọnọ si emi; tẹ ịna ẹkwẹn mamgba si-si-si. Yee ịna opu amịẹaị ma ḅụ ini in kun sịẹma! In ye gboarị pịkị iruoarị ẹrẹsị,

¹³ ị́ ịganị ḅụ ịn ḅaa guluguluma; ịn ḅaa guluguluma fama. Anịsakị ọrụḅọ-ọrụḅọ nimi ḅa mịnẹ Tamụnọ mie ḅẹrẹtọn-arị Izirẹlị ḅụ, mịnẹ ọ̀ ḅẹrẹtọn mẹ tomikiri mamgba gbaịn wararị.

¹⁴ Si kẹ ị̀ tọn-arị apụ ma pịkịma ḅoarị ḅoḅiri-so ḅụ, tẹ obiri ḅio-fiema ḅara kẹ ḅio-fiema ma opu ama mẹ ḅio mẹnjịma-mẹnjịmarị;

¹⁵ ini obiri ma kịka tẹ fị ḅẹ ye ḍọkị mẹnjị ikele-ikelearị, tẹ olokuarị, ịn fịye ẹrị fị furo ḅinma-a ẹrẹsị.

¹⁶ Kụma yẹrị, àrị ị́ ịnyọ mẹ ḅẹ nume-su ḅa, dede goyegoye àrị í kuno-a ḅẹlẹma mẹ ḅẹ nume-su gelema ḅa. Ị́ ḅụụ-ḅọị-yọ so ị̀ pịrị tẹẹ, ḅụụ-fụka sakị ḅụ ị́yẹrị ị̀ sịḅị-kikima-yọ.

¹⁷ Ị̀ ḍụaḅọ, àrị í tokini ḅa, Tamụnọ anie ị̀ ḅụụ-ḅọị-yọ, ị̀ ḅẹlẹmarị Tamụnọ ḅe.