Devidi-Anume 58 - FỊAFỊA BAỊBỤLỤ

Tamụnọ Fomu-ḅara Kẹ Si-sịḅịḅio-sụapụ Pịrịị Ẹrẹsị Kọn Tẹkẹ

¹ Ọmịnị ḅẹrẹtọn apụ, jen sakị ọ́ karakara ḅẹrẹ pẹlẹ kịnị pịrị tẹ? Ọmịnị aḍụa ofori ḅara kẹ tomi mamgba kọn tẹ?

² Gbala-gbala! Ọmịnị inetẹ mịẹ ḅẹ siye ngẹrị mie ọ́ kẹ ḅiokpọmarị, tẹ gbiri-gbiri-gbiri si amịẹaị mịẹarị ama kiri mẹ ḅụ.

³ Si atomi ma ịna aḍumo-ene mamgba ḅụ kura-a etela mie ịn mẹnjịarị ini iyi ene kụra-ḅio iruo aị mie in ḍukoarị.

⁴ Ododo sime-ḅara, ịna ḅụụ ḅio kịnị-ḅaaḅa ye ḅin wararị; ini ajụala si ododo ḅe kịka tẹ ịna aḅeri suke pụnma wararị;

⁵ anie ẹkwẹn ododo pịrị ḅọ pọkọ naa, naa-a ye ḅe, anịanịa ọbọ farị ḍin ḅọ farịarị ḅẹlẹ nume naa ye ḅe.

⁶ Yei Tamụnọ, mịna ḅalafamarị ọkụkụ ma aka ma anyịmaa.

⁷ Yee ini ideri ḅọrọ-soarị minji kụnụnụ ḅara kụnụnụ, tẹ kịnị ḅarị ini ẹrị ma; Yee in tomi mẹnjị-ḅọrọarị anga paka osuka nanga kọsịma ḅara kẹ kọsị fa.

⁸ Yee ini osin-akongo sụa-a osin sịkịrị fa ḅara kẹ kụlala so; yee in furo ḅio fịị tẹrẹmẹ paka-ḅo tẹ gbala-gbala bele ẹrị-a tụḅọ kịka.

⁹ Tẹrẹmẹ in ḅo nimi, ini ịna pẹlẹ-gbin tẹ, osuka pẹlẹ sara ḅara; ori opu ịganị ḅụ Tamụnọ fẹrụ fiema ye fọnọ so ḅara kẹ ịn fọnọ so ḅa, ịn paa ḍumo wararị ogbo.

¹⁰ Karakaraye-mịẹapụ ma ḅioḅẹlẹ ḅa, ịn si-mịẹapụ ma fomu-ḅara daarị ye mẹ ẹrị sakị; in si-sịḅịḅio-sụapụ ma ọmbie mẹ ḅio mẹnjị tolu ḅọrọ ḅa.

¹¹ Tomi ḅẹẹ ḅa, “karakara-ḅara-ḅụ, karakaraye-mịẹapụ ma ịn gbẹẹ-ye nyana tẹẹ; karakarayee, tomikiri mẹ kọn-arị Tamụnọ emii.”