Devidi-Anume 57 - FỊAFỊA BAỊBỤLỤ

Ḅarasụa Ḅii Tẹkẹ

¹ Ọkụrụkụrụ nyana ị̀ pịrịị, Yei Tamụnọ, ọkụrụkụrụ nyana-a; ye ḅarị ị̀ la ḅịa ḅara ẹrẹsị arị ị́ ḍọkụma-ḅom. Ị́ pamba suku-ḅio mie à ḅọị ḅẹ anga simearị, nwenii ḍarịarị erise ma ḅọrọ.

² À Tamụnọ sịn-arị, Gele Tẹịnḅọ ḅe, Tamụnọ, ị̀ ḅụụ-fụka goyegoye mịẹ ị̀ pịrịarị ḅọ.

³ Ò So-ḅio sime tẹ pakịrị tẹ ị̀ ḅọrọma ḅa; ori ì ponomarị apụ ma nẹngịma ḅa. Tamụnọ ò kuno-a ḅẹlẹma mẹ na ḅioḅẹngbọ kẹ ọ̀ ḅụụ ḅụ gbana na-iḅim mẹ na kẹ ì ḍie ḅa.

⁴ Si kẹ kịnị tọn-arị apụ ma ì gbori-ikelema tẹ, anie tomi pẹị, pẹị ọkụkụ ma kịkarị apụ ma. Ịna aka ma ḅẹkẹrẹ ma na ḍịn ma na kịkarị ịna aḅẹlẹ ma okologie ma oḅu ḅara oḅuarị.

⁵ Yei Tamụnọ, So-tọrụ ḅụ í opu mẹ ḍie-pakamaa, pịkị í ebube sọ kiri ọgọnọ mamgba ḅụ.

⁶ Si kẹ ị̀ tọn-arị apụ ịgbọ sụa tẹ, kẹ ì kun ḅẹm; ḅụụ-fụka ị̀ ḅaa tẹ. Ini olulu soku wẹrịm ị̀ mẹnjị-ḅọrọ-anga ḅụ, kụma ini rẹ mie anị ḅio ḅịkị sọ ye.

⁷ Yei Tamụnọ, à ḅiokpọ fama wararị; à nume-su tẹ kẹ í tokini ḅa!

⁸ Ị̀ tẹmẹ, saakịị! Saakị, ị̀ ọbọ na alili na! Àrị ịrụa mẹ sịn saakị ḅa.

⁹ Yei KỊNỊNYANAḄỌ, àrị ịmịẹtẹ kẹ ị́ ḅẹ ḅa, sịẹ-sịẹ ma ogboku. Àrị í tokini ḅa tomi ma ogboku.

¹⁰ Í kuno-a ḅẹlẹma mẹ So-ḅio laarị; ḅioḅẹngbọ kẹ ị́ ḅụụ ḅụ gbana na-iḅim mẹ So-tọrụ laarị.

¹¹ Yei Tamụnọ, So-tọrụ ḅụ í opu mẹ ḍie-pakama, pịkị í ebube mẹ sọ kiri ọgọnọ mamgba ḅụ.