Devidi-Anume 56 - FỊAFỊA BAỊBỤLỤ

Tamụnọ Kẹ Ḅiokpọma Tẹkẹ

¹ Yei Tamụnọ, ì ḍiki-sịḅị-kụrụkụrụụ, kịnị owu kẹ ị̀ paka wararị ẹrẹsị; si kẹ ị̀ tọn-arị apụ ma sakị mamgba ị̀ ḅaa ḅẹ ḅọkọ ḍọkịarị.

² Bebe ene mamgba ị̀ na tụḅụrụ apụ ma owu kẹ ị̀ pakarị. Owu kẹ ị̀ na sọarị apụ ḅakam.

³ Yei Kụrọ mamgba nyana KỊNỊNYANAḄỌ, ị̀ ḅalafaarị sakị ḅụ, mie à kẹ ḅiokpọmarị.

⁴ À Tamụnọ kẹ ḅiokpọmarị, tẹ ḅarị ḅalafa-a; ò minini ị̀ pịrị tẹ ye gotẹ arị ò tokiniarị. Papaa tomḅọ inetẹ tiye kẹ ị̀ mịẹ ḅẹ?

⁵ Bebe ene mamgba si kẹ ị̀ tọn apụ ma ḅụụ-fụka ḅo ị̀ la ḅẹ ye mịẹarị; sakị mamgba in ye kẹ ị̀ lama ḅẹ ḅẹrẹ ḅịyarị!

⁶ In kobiritẹ ḅụụ kikima tẹ à mịẹarị ye goyegoye ẹbịarị, ini ị̀ ḅaa ḅẹ ḅara.

⁷ Yei Tamụnọ, ịna si gotẹ in fomuu; ị́ ịganị ḅụ mịẹ tẹ owu arị atomi ma ḅara si.

⁸ Ḅụụ-fụka ị̀ na la ḅara í nimi wararị; owu-aminji ị̀ tọrụ sara la ḅara ị́ kịẹn nimim. Arịḅẹ kịẹn-aḅịḅị ma í ḍiri ḅio kẹẹ koro-a?

⁹ Àrị ị́ sịn gbọrụ ene, si kẹ ị̀ tọn apụ ma pịkị ọḅụ da ḅa. À kẹ mie nimi ye, Tamụnọ ị̀ pakịrị angaa emi.

¹⁰ KỊNỊNYANAḄỌ, àrị ò minini aị ma tokiniarị ḅọ ḅe.

¹¹ Àrị ọ̀ kẹ ḅiokpọmarị, à ḅalafa ḅịa. Papaa tomḅọ tiye kẹ ị̀ mịẹ ḅẹ?

¹² Yei Tamụnọ, àrị à minini aị kẹ agba mịẹ ị́ pịrị ḅa; àrị ị̀ ịmịẹtẹ ḅẹ agba mịẹ ị́ pịrị ḅa,

¹³ Ị́ fịị ḅio ị̀ pụkọ-pakamaḅo tẹ ẹrẹsị, tẹ mịẹ tẹ owu ḅarị ị̀ ḅara si-a som. Anie mịẹ tẹ à Tamụnọ tọrọkọ ḅụ mẹnjịarị ḅịya ḍumo wararị apụ ma saramarị bele mẹ ḅio.