Devidi-Anume 55 - FỊAFỊA BAỊBỤLỤ

Ikiaḅọ Kẹ Dẹrịma Tomḅọ Kọn Tẹkẹ Mẹ

¹ Yei Tamụnọ, ị̀ tẹkẹ naa; àrị owu-na-owu-naarị ye mẹ ḅụ tọrụ siin ma!

² Ì poki tẹ ị̀ pakịrịị; ḅụụ-ḅalaḅala ị̀ ḅụụ ịnyọ fama, fama tẹ.

³ Si kẹ ị̀ tọn apụ ma kẹ ị̀ ẹrẹmarị aị ma mịẹ tẹ tẹmẹ-naịn-naịn ị̀ ḅaarị, si-sịḅịḅio-sụapụ ma ì ponoma kọsịma tẹẹ. Ịn ḅụụ-fụka dogi-ḅo ị̀ pịrịarị, ini ịganị ị̀ pịrị tẹ ì ḍiki-ḅioḅuarị.

⁴ Ị̀ tẹmẹ-naịn-naịn tẹẹ, fịị ḅalafa ị̀ gbẹẹ-kọsịmarị.

⁵ Ḅalafa ì kun sịẹma tẹ ì oju sẹkịarị, opu ḅalafama ye ḅo ị̀ gbaịn koro tẹ.

⁶ À ḅiim arị olosịkịya kịka tẹ pamba-sụam namịna, mimgbe à fiin so mu ịnyọsara tẹ.

⁷ Mimgbe à fiin so mu iḅere-iḅerea anga la tẹ, tẹ ịkpa ḅio kẹ ì sime-yọ mịẹ tẹ.

⁸ Mimgbe à sarasarama ḅụụ kikima anga ḍọkị ị̀ ḅụụ pịrị tẹ, nwẹn ḍarịarị fẹrụ mẹ na erise mẹ na ḅụ.

⁹ Yei KỊNỊNYANAḄỌ, si kẹ ị̀ tọn-arị apụ ma ẹkwẹn mẹ pikirima! Kụrọ-kụrọ amịẹaị na gbiri-gbiri-gbiri na mie opu ama mẹ ḅio arị ẹrịarị,

¹⁰ ḍin na eneḅaka na ịn mẹnjị opu ama mẹ ikelemarị, tẹ si mịẹ ye na ḅụụ-fụka na kẹ opu ama mẹ ḅio ḅinmarị.

¹¹ Anga-anga ḅụ ḅaa guluguluma emii; etela ma ḅụ ponoma na oḅori-kẹ-kịnịsịn na ḅin wararị.

¹² Si kẹ kịnị tọn-tọn ḅọ tẹ mị-ḅara kẹ ì komboarị ḅẹ kụma, arị inetẹ inema alama ḅarị ya; anị nwẹnị ị̀ na tụḅụrụ-tụḅụrụ ḅọ tẹ mị-ḅara kẹ ḅụụ-boma ị̀ pịrịarị ḅẹ kụma, àrị inetẹ mḅọ ḅụ ị̀ ḅụụ kikima ḅarị ya.

¹³ Kụma ị́yẹrị, ị̀ na mẹnjịarịḅọ, ì jụ ḅẹ ḅọ, pịkị ị̀ iḅi ikiaḅọ.

¹⁴ Wa tẹmẹ-la ẹkwẹn kọn jụmọ-jụmọ pịrị-pịrịm wa pịkị sunsin gboloma-gbolomam Tamụnọ-warị mẹ ḅio.

¹⁵ Yee si kẹ ị̀ tọn-arị apụ ma ini amụ fịị ḅẹ sakị la-a ogbo fịị; yee ini ịnyọ biin-a ḅara kẹ ideri ḍuḅu ḅio mu! Ịna sime anga ma na ịna ḅioḅẹngbọ na ḅụ si emii.

¹⁶ Kụma à ḅarasụa gotẹ KỊNỊNYANA-TAMỤNỌ ḅe tẹkẹarị, tẹ ori ị̀ ḅọrọma ḅa.

¹⁷ Dede na, eneḅaka-ogbo na ḍin na ḅụ, à ḍuko sụarị aị na à kọn-arị iningi ma na iwo mu ọ̀ laarị, tẹ ori ị̀ pọkọ naa ḅa.

¹⁸ À kẹ si kẹ ị̀ tọn-arị tọnwa-apụ ma na gbin-arị ọmụ ma ḅụ, ò gberie-sọ ị̀ la-a ḅara kẹ ị̀ kẹ pịkịma ḅo ḅa.

¹⁹ Tamụnọ, Anịngẹ-kụraḅio ḅẹrẹtọn mu ḅẹẹ-sakị ḅẹẹ-sakị laarị ḅọ, ị́ ị̀ naa tẹ mịẹ tẹ owu ịna ḅara sii ḅa; in ḍima ḍụkụ-a ẹrẹsị, tẹ ịn pịkị ò ḍiki-ḅalafa-a.

²⁰ Tarị pịrị-pịrị ị̀ na mẹnjị sime ḅọ ḅe owu kẹ amịna ikiapụ pakam; ori ọ̀ ḅịḅị simam ò minini aị ma ḅụ.

²¹ Ori ẹkwẹn lọkọ bọta nẹngịm, kụma ò ḅioḅẹngbọ ḅụ ḍiki-ḅioḅu simem; ori ẹkwẹn olo sịnịnị ḅara sịnịnịm, kụma anị okologie oḅu ḅara oḅum.

²² Ị́ ḅụụ-fụka ma wẹrịso KỊNỊNYANAḄỌ ḅe pịrịị, tẹ ori ị́ ḍụa ḅa; gbala-gbala ọ̀ ḍụkụ tẹ karakara atomi owu kiri ḅịkị-ḅịkị-a.

²³ Kụma, Yei Tamụnọ, arị kịnị ḅaa apụ ma na iruo apụ ma na kẹ ịna aḍuḅu fịrịma ḅa, tẹrẹmẹ ịna ḍumo-ene ma kẹ maa anga ḍiya ḅẹ gbọrụ anga ḅọrọ sakị la, yẹrị kịngẹ kụma, arị ị́ kẹ ḅiokpọma ḅa.