Devidi-Anume 53 - FỊAFỊA BAỊBỤLỤ

Tomina Si-sịḅịḅio

¹ Oḅori atomi ma amịna aḅụụ ḅẹẹarị, “Tamụnọ ofori.” Inimgba ḅụrụ-kọsị fama wararị, tẹ ịn ḅalafama aị mịẹ tẹ, kuraye mịẹarị gbọrụḅọ-sọ ofori.

² Tamụnọ So-ḅio sime tẹ tomikiri ḅẹ atomi ma ḍikiarị, ịna ḅụ ò ye-nimi gbọrụḅọ ẹrị ḅẹ ḅoto, kpọkpọ gbọrụḅọ tẹ sunsin ọ̀ pịrịarị ḅọ emi ḅoto.

³ Kụma inimgba pịkị-so tẹ; inimgba gbọrụ ḅara kẹ si wararị. Ịna ḅụ kuraye mịẹarị gbọrụḅọ-sọ ofori, kpọkpọ gbọrụḅọ-sọ ofori.

⁴ Tamụnọ gbelarị, “In nimi-a aro? Mịna si amịẹaị mịẹarị apụ ma nimi-a apụ aro? Ini ị̀ atomi ma fọịn-fọịn tẹ kẹ angarị, tẹ gbala-gbala ini ị̀ tẹkẹ, tẹkẹ-a.”

⁵ Kụma ọkọẹrẹsị kịnị ịna tẹmẹ-naịn-naịnma ḅa, jene-jene amụ anị ịna ḅụ paka-a ḅara, gbala Tamụnọ si kẹ ori atomi ma tọn apụ ma igbe ma gala-galama ḅa. Tamụnọ ịn sịkị tẹẹ, ọkọẹrẹsị Izirẹlị gbọrsịḅị ịn nẹngịma fama ḅa.

⁶ À tẹkẹ lamarị, mịnẹ owu-ḅara-iḅi ḅo Izirẹlị pịrị ḅa Zayọnị ḅụ. Izirẹlị kpọma ḅioḅẹlẹ ḅa Tamụnọ mịẹ tẹ in siin lolo sakị!