Devidi-Anume 51 - FỊAFỊA BAỊBỤLỤ

Si-wẹrịso pịrị Ḅii Tẹkẹ

¹ Yei Tamụnọ, ọkụrụkụrụ nyana ị̀ pịrịị, í kuno-a ḅẹlẹma mẹ ẹrẹsị, í opu ọkụrụkụrụ mẹ ẹrẹsị ị̀ asi ma kụrọrọ siin!

² Ì si mẹmgba sịkịrị siin tẹ mịẹ tẹ à fịafịa ì si ḅụ!

³ Ị̀ amịẹ-kọn ma, à lekiri tẹ, ị̀ asi ma sakị mamgba ì ḅiokoromarị.

⁴ Ị́yẹrị mie à si kẹ mịẹ yee; ị́yẹrị kịngẹ — tẹ ị́ kẹ si sịn ye mie à mịẹ yee. Mie ḅụ ị́ kura ḅẹrẹ kọn ị̀ pịrịm, ị́ pẹlẹ ị̀ ḅara sima ḅẹrẹ mẹ ḅụ aḍụa ofori.

⁵ Àrị iyi paka-ḅo kụra-ḅio yẹrị si-mịẹḅọ; àrị iyi paka-ḅo ene ḅụ ḅo mịmgba la ị̀ ḅụụ mẹmgba si-si-si.

⁶ Aka ofori ḅioḅẹngbọ na karakara na mie í ḅiiarị, ị́ ḅara ḅo nimi kẹ ì kuroma suu ḅinma.

⁷ Ì si siin, anịsakị à fịafịa ḅa, ị̀ sịkịrị fịafịamaa, anịsakị à pịna eene mgbọlị nẹngị ḅa.

⁸ Yee à ḍereku na ḅioḅẹlẹ na fiearị apọkọ ma naa; karakaraye ị́ ị̀ mgbe ma gbẹẹ-kọsịma tẹ sọ, à pịkị siin jen kẹ ḅioḅẹlẹ ḅa.

⁹ Ị́ atọrụngbọ gbaịn ị̀ asi ma pịrịị, tẹ ì si sime-ḅara mẹ kụrọrọ siin.

¹⁰ Yei Tamụnọ, kpaịntẹ ḅioḅẹngbọ tẹmẹ ị̀ ḅụụ ḅio suu, tẹ ịwọ tẹ sịḅị-tuuarị tẹmẹ kẹ ị̀ ḅụụ ḅio suu.

¹¹ Gbọrsịḅị ì dee-siin ma ị́ tọrọkọ ḅụ, ị́ fịafịa tẹmẹ siin ọkị ma ị̀ ḅụụ ḅio.

¹² Pịkị siin ị́ ḅọrọma dogi-ḅoarị ḍereku mẹ kẹ ị̀ pịrị, tẹ ị̀ mịẹ tẹ à minini tẹ ị́ ḅịḅị poki.

¹³ Anịsakị arị ị́ tọn kuroma aị ma kẹ si-mịẹapụ ma toluma ḅa, tẹ ịn pịkịma ị́ dama-ḅo ḅa.

¹⁴ Yei Tamụnọ, ḍụkụ tẹ à fịị ma, tẹ ị̀ ḅọrọma, tẹ à ḅioḅẹlẹ ḅara kẹ ị́ karakara mịẹ mẹ ḍuko wasama ḅa.

¹⁵ KỊNỊNYANAḄỌ, ḅarasụa ị̀ pịrịarị ẹkwẹn, tẹ àrị í tokini ḅa.

¹⁶ Ị́ agba mịẹ-mịẹ ị́ pịrị ḅii-a, ọkọ-a namịna à mịẹ-mịẹ ị́ pịrị tẹẹ; dọkịma-agba ma sọ ị́ arị ḍiki ḅioḅẹlẹ-a.

¹⁷ Yei Tamụnọ, à kẹ ḅo agba anie ḅụụ-lẹgịma tẹmẹ; ḅụụ-lẹgịma na si ḅụ pịkị na ḅioḅẹngbọ ị́ sịkị ḅịa.

¹⁸ Yei Tamụnọ, ịyọrọma Zayọnị na mịẹ, tẹ ḅarasụa á pịrịị; siin Jeruselemu onu ma nama saakịị.

¹⁹ Anịtẹso wa mịẹ ḅarị karakara agba ma í ḅioḅẹlẹma ḅa, pịkị wamịna dọkịma-agba ma sọ, tẹ wa pịkị nambulo-nambulo kẹ ị́ agbamịẹ-anga mẹ ḅụ agba mịẹ-mịẹ ị́ pịrị ḅa.