Devidi-Anume 5 - FỊAFỊA BAỊBỤLỤ

Tamụnọ Tomḅọ Gbaịn Ḅẹ Ẹrẹsị Kọn Tẹkẹ

¹ Yei KỊNỊNYANAḄỌ, ị̀ ẹkwẹn pokii, tẹ àrị ẹsịmarị ye mẹ naa.

² Ị̀ Tamụnọ pịkị ị̀ amadaḅọ, à ḅarasụa gotẹ kọn-arị owu mẹ pokii! Yei KỊNỊNYANAḄỌ, sisi arị í tẹkẹm;

³ dede-ḅio ị́ ị̀ pọkọ naarị; ịrụa paka ḅụ à tẹkẹarị tẹ ị́ pakịrị ḅịḅị koruarị.

⁴ Ị́yẹrị kura-a mịẹye ḅụụ-ḅẹlẹarị Tamụnọ-a; ị́ ḍụkụ tẹ gbọrụ siye sọ ị́ tọrọkọ sime-a.

⁵ Ị́ inetẹ opu-amịẹaị atomi ẹrị ḅịa ị́ tọrọkọ; ị́ si-sịḅịḅio-sụapụ mamgba ḍiki-ḅioḅuarị.

⁶ Í iruo-apụ mamgba ḅaa gulugulumarị tẹ kụrọ-ḅara mịẹ, tẹ tomi toluma famarị apụ ḍiki-iderimarị.

⁷ Kụma í opu ḅẹlẹma mẹ ẹrẹsị, arị inetẹ ị́ warị sọ ḅo ḅa; àrị inetẹ ị́ fịafịa Warị mẹ ḅio sunsin ị́ pịrị tẹ iḅo ị́ pịrị ḅa kụn ḅara ḅụ.

⁸ KỊNỊNYANAḄỌ, si kẹ ị̀ tọn-arị apụ ḅakam! Ị̀ tọrọkọ-sụn tẹ àrị í ḅii-ye mịẹ; í etela mịẹ banabanama ị̀ pịrị tẹ àrị anị ḅio mẹnjị.

⁹ Si kẹ ị̀ tọn-arị apụ ma ḍukoarị aị ma kịnị gbala-gbala inetẹ ḅioḅẹngbọ kẹ arị ḅụ gbana ḅịa; ye guluguluma kịngẹ mie ịn ḅiiarị. Ịna ẹkwẹn ma ḅịḅị-ḅẹlẹ na kịnị furuma na arị ḅio emi, tẹ kịnị toluma mu fịị ḅio suu ẹkwẹn famam.

¹⁰ Yei Tamụnọ, ḅẹrẹ si pẹlẹ ịn pịrị tẹ in fomu; yee in ḅịyarị aḅẹrẹ ma in dogi-mu fa ḅio suu. Ị́ tọrọkọ in dee siin, ịn mịẹarị tọnwa asi ma gotẹ, pịkị in kọngọ kụrọma ị́ pịrịarị mẹ ẹrẹsị.

¹¹ Kụma ị́ ḅụụ ḅọị apụ ḍereku ḅa; sakị mamgba in ḅioḅẹlẹ ḅụ nume-su ḅa. Ị́ ḅẹlẹmarịapụ ma gbaịịn; í gotẹ ịn karakara ḅara kẹ ḅioḅẹlẹarị.

¹² KỊNỊNYANAḄỌ, ị́ ḅịḅị pokiarị apụ ma bomaa; ị́ ḅẹlẹma ekpeke sọ tẹ in kikimarị.